Gabuliyele Akuwonecela kwa Maliya

Elisabeti jwakwete m’balegwe jwacinondipile lina lyakwe Maliya, juŵatamaga mumsinda wa Nasaleti ku Galileya. Maliya jwaliji pawuganja ni Yosefe juŵaliji kalipentala. Elisabeti ali akwete citumbo ca miyesi 6, lilayika lyakolanjidwa Gabuliyele lyawonecele kwa Maliya. Lilayikalyo lyatite, ‘Moni Maliya. Yehofa amnonyele mnope.’ Jwalakwe nganapikanicisya yalyagopolelaga lilayikalyo. Kaneko lyamsalile kuti, ‘Cimcikola citumbo ni cimciŵeleka mwanace jwamlume, ni cimumpe lina lyakuti Yesu. Jwalakwe cacilamulila mpela Mwenye. Soni Ucimwene wakwe ngasiwumala.’

Maliya jwatite, ‘Nambo une ndili mwali. Ana mpaka yikombolece camtuli kola mwanace?’ Gabuliyele jwatite, ‘Pangali campaka cimleme Yehofa. Msimu weswela wucimyicila, ni cimcikola mwanace jwamlume. Nombenajo m’balegwenu Elisabeti akwete citumbo.’ Kaneko Maliya jwatite, ‘Une ndili kapolo jwa Yehofa. Yitendekwe mwaŵecetele.’

Maliya jwapite kumsinda wawaliji kumatumbi kukumlola Elisabeti. Maliya paŵagambile kumkomasya Elisabeti, ndaŵi jijojo Elisabeti jwapikene mwanace ali mkuwulukuta m’matumbo mwakwe. Mwagumbalilwa ni msimu weswela, Elisabeti jwatite, ‘Maliya, Yehofa ampele majali. Uli upile wekulungwa kupocela mama ŵawo Ambuje kumangwetu kuno.’ Maliya jwatite, ‘Ngumlumba Yehofa ni mtima wangu wosope.’ Jwalakwe jwatemi ni Elisabeti kwa miyesi jitatu. Kaneko jwawujile kumangwakwe ku Nasaleti.

Yosefe ali ayimanyi kuti Maliya akwete citumbo, jwasakaga kuti amasye uganjawo. Nambo lilayika lyam’wonecele musagamisi ni lyatite, ‘Mkajogopa kumlomba Maliya. Jwalakwe nganatenda cakulemwa cilicose.’ Kaneko Yosefe ŵamlombile Maliya ni kuja kutamaga najo kumangwakwe.