Lutenje lwa ku Yelusalemu

Kwende tulole yayatendekwe mundaŵi ja Nehemiya. Jwalakwe jwaliji jwakutumicila jwa Mwenye Alitasasita. Jwalakwe jwaliji mwisalayeli juŵatamaga ku Pelesiya mumsinda wa Susani. Mkulugwe Nehemiya jwayice kutyocela ku Yuda, ni utenga ŵangasangalasya wakuti, ‘Ŵandu ŵaŵawujile ku Yelusalemu ŵangali citeteyo. Lutenje lwa msindawo soni yipata yaŵajonasile Ababulo nganaŵe kuyitaŵa.’ Nehemiya paŵapikene yeleyi yamsakalisye. Jwalakwe jwasacile kwawula ku Yelusalemu kuti akakamucisye. M’yoyo jwapopesile kwa Mlungu kuti mwenye amkunde kwawula.

Kaneko mwenyewo ŵam’weni Nehemiya ali ngakusangalala. Mwenyewo ŵatite, ‘Nganim’woneceje m’yiyi. Ana cisawisye cici?’ Nehemiya jwajanjile kuti, ‘Ana mpaka sangalale camtuli pakuŵa msinda wakumangwetu wajonanjidwe?’ Mwenyewo ŵam’wusisye kuti, ‘Ana mkusaka ndili namtendele cici?’ Mwangacelewa Nehemiya jwapopesile camumtima. Kaneko jwalakwe jwajanjile kuti, ‘Conde angunde njawule ku Yelusalemu kuti ngataŵesoni lutenje lwa msindawo.’ Mwenye Alitasasita ŵamkundile Nehemiya kuti ajawule. Soni ŵalinganyisye yakuti akole ŵakumcenjela paulendo wakwe wawulewuwu. Mwenyewo ŵam’ŵisile Nehemiya kuŵa mlongola jwa Ayuda soni ŵampele matabwa kuti akakamulicisye masengo pakulinganya yipata ya msindawo.

Nehemiya ali ayice ku Yelusalemu, jwatandite kwendela lutenje lwejonasice lwa msindawo. Kaneko ŵasongenye ŵambopesi soni ŵakulamula ni ŵasalile kuti, ‘Ayi yili yakutesya canasa. Tukusosekwa tukamule masengoga.’ Ŵanduwo ŵajiticisye, soni ŵatandite kutaŵa lutenjelo.

Nambo acimmagongo ŵane ŵa Ayisalayeli ŵanyosyaga jemanjajo kuti, ‘Likule mpaka ligwisye lutenje lwakutaŵalo.’ Ŵakutaŵawo nganatenguka ni yaŵaŵecetaga ŵakunyosyawo mwamti ŵajendelecele kutaŵa lutenjelo. Masengo gakutaŵa lutenjelo gajendaga cenene.

Acimmagongo ŵalinganyisye yakuti atyoceleje mbali syakulekanganalekangana kuti amjimucile Yelusalemu mwakusupucisya. Ayuda ali apikene yeleyi wakamwile woga. Nambo Nehemiya jwatite, ‘Akatenda woga, Yehofa ali ni m’weji.’ Jwalakwe ŵasagwile acalume ŵane kuti aŵe asilikali ŵakwacenjela ŵakutaŵawo. Ligongo lya yeleyi acimmagongowo nganapakombola kwimucila.

Pali papite masiku 52, lutenje soni yipata ya Yelusalemu yamasile kutaŵidwa. Nehemiya ŵaŵilasisye Alefi wosope kuti ayice ku Yelusalemu kuti akasangalalile kumalisya kwa masengo gakutaŵa lutenje. Jwalakwe ŵagaŵile jemanjajo makuga gaŵili gakwimba. Jemanjajo ŵakwesile penani palutenje kupitila pa masitepe gagaliji Pacipata ca Uliŵa. Likuga line palyajawulaga mbali jine, linelyo lyajawulaga mbali jine, ni ŵawusyungulile msinda wosopewo. Jemanjaji ŵakamulicisyaga masengo yitolilo, yisyano yakwimbila soni magitala pakumjimbila Yehofa. Esala ŵajesile ni likuga line, soni Nehemiya ŵajesile ni likuga linelyo, mpaka ŵasimene panyumba jakulambila. Ŵandu wosope ŵapelece mbopesi kwa Yehofa soni ŵasangalele ni cindimbaco. Nyimbo syaŵajimbaga mwakusangalala syapikanicilaga kwakutalika.