Esala Ŵajiganyisye Ŵandu Cilamusi ca Mlungu

Paliji pali pamasile yaka ciŵandika 70 Ayisalayeli ciwujile ku Yelusalemu. Nambo ŵane ŵajendelecele kutama m’mikuli jakulekanganalekangana mu Ulamusi wa Pelesiya. Jumo mwa ŵanduŵa jwaliji jwambopesi Esala. Jwalakwe jwajiganyaga Cilamusi ca Yehofa. Esala ŵapikene kuti ŵandu ku Yelusalemu ngakukuya Cilamusi, ni ŵasacile kuti ajawule akakamucisye. Mwenye jwa ku Pelesiya, Alitasasita jwamsalile Esala kuti, ‘Mlungu ampele lunda kuti mjiganyeje Cilamusi cakwe. M’yoyo mjawule mkamjigale jwalijose jwakusaka kuti mlongane najo.’ Esala ŵasimene ni wosope ŵaŵasakaga kuti awujile ku Yelusalemu. Jemanjajo ŵapopesile kwa Yehofa kuti ŵacenjele paulendo wawulewuwu, kaneko ŵanyakwice.

Pali papite miyesi mcece, jemanjaji ŵakopocele ku Yelusalemu. Acimlongola ŵa ku Yelusalemu ŵamsalile Esala kuti, ‘Ayisalayeli alesile kupikanila Yehofa soni akulombela acakongwe ŵakulambila milungu jawunami.’ Ana Esala ŵatesile cici? Esala jwatindiŵele pameso pa ŵanduwo ni jwapopesile kuti, ‘Yehofa atesile yindu yambone yejinji kwa m’weji nambo tulemwisye pameso pawo.’ Ŵanduwo ŵalitendele canasa, nambo ŵajendelecelepe kutenda yindu yangaŵajilwa. Esala ŵasagwile acakulungwa soni ŵakulamula kuti ŵakamucisyeje ŵandu payakulemwa yaŵatendagayo.

Pali pamasile yaka 12, lutenje lwa msinda wa Yelusalemu lwataŵidwesoni. Esala ŵasongangenye ŵandu ku luŵala kuti ŵaŵalanjile Cilamusi ca Mlungu. Esala paŵawugwile buku ja Cilamusico, ŵandu wosope ŵajimi. Jwalakwe jwatandite kumlumba Yehofa soni ŵandu wosope ŵakwesisye makono gawo mwinani pakulosya kuti akamulana nayo. Kaneko Esala ŵaŵalasile ni kutagulila Cilamusico, ni ŵanduwo ŵapikanile mwalung’wanu. Ŵanduwo ŵajiticisye kuti amlesile Yehofa ni ŵatandite kulila. Lisiku lyakuyicisya, Esala ŵaŵalasile yejinji ya Cilamusici kwa ŵanduwo. Ŵanduwo ŵalijiganyisye kuti pacangakaŵa akusosekwa kutenda Cindimba ca Masakasa. Ndaŵi jijojo ŵatandite kosecela cindimbaco.

Kwa masiku 7 ga cindimba cila, ŵandu ŵasangalele soni kum’yamicila Yehofa ligongo lyakuti ŵagowele yindu yejinji. Kutandila m’masiku ga Yoswa nganipatendekwa Cindimba ca Masakasa mpela celeci. Pacamasile cindimbaci ŵandu ŵasongene ni ŵapopesile kuti, ‘Yehofa ŵatukulupwisye mu ukapolo, ŵatupele yakulya m’cipululu, soni ŵatupele cilambo cakusalala. Nambo mwakuwilisyawilisya nganitwapikanila wawojo. Ŵatumisye ŵakulocesya kukutukalamusya, nambo nganitupikanila. Nambo wawojo nganatumbila. Ŵasunjile cilanga cawo caŵatesile ni Abulahamu. Sano m’weji tukutenda cilanga cakuti citwapikanileje wawojo.’ Ŵanduwo ŵalembile cilangaci, kaneko acimlongola, Alefi soni ŵambopesi ŵasayinile yakulembedwayo.