Msilikali ni Kamsikana

M’cilambo ca Siliya, mwapali kamsikana ka Ciyisalayeli kakatamaga mwakutalicilana ni kumangwakwe. Kamsikanako kajigalidwe ni asilikali ŵa Asiliya. Kamsikanaka kakamulaga masengo kwa jwamkongwe jwa msilikali, soni kalambilaga Yehofa atamose kuti ŵandu ŵaŵatamaga nako nganalambilaga Yehofa.

Namani jwakwete ulwele wakogoya wa pacilu, soni jwalagaga mnope ni ulwelewu. Kamsikanaka kasacilile mnope kumkamucisya jwalakwe. Ni kasalile ŵamkwawo Namani kuti, ‘Ngumanyilila mundu jwampaka ŵakamucisye ŵamkwawo. Ku Yisalayeli kwana jwakulocesya jwa Yehofa lina lyakwe Elisa. Jwalakwe mpaka ŵaposye ŵamkwawo.’

Ŵamkwawo Namaniwo ŵasalile ŵamkwawo yakasasile kamsikanako. Namani ŵaliji ŵakusacilila kutenda cilicose kuti apole. Ni ŵapite ku Yisalayeli kukuwonegana ni Elisa. Namani ŵajembeceyaga kuti Elisa cakampocele mpela mundu jwakusosekwa mnope. Nambo m’malo mwakuŵecetana najo, Elisa ŵatumisye jwakutumicila jwakwe kuti akamkomasye soni akapelece utenga kwa jwalakwe wakuti, ‘Mjawule mkajoje mawulendo 7 ku Lusulo lwa Yolodani. Kaneko cimkapole ulwele wenuwo.’

Namani yamsakalisye mnope. Jwalakwe jwatite, ‘Naganisyaga kuti jwakulocesyaju cambosye mwakumbopelela kwa Mlungu jwakwe soni kwendesya magasa gakwe pa une. M’malo mwakwe, akusalila une kuti njawule ku lusulo lwa ku Yisalayeli. Tukwete sulo syambone ku Siliya. Ligongo cici nganagamba kusalila une kuti njawule kweleko?’ Namani ŵatumbile, ni ŵatyosile kunyumba ja Elisa.

Ŵakutumicila ŵa Namani ŵamkamucisye kuti aganisye cenene. Jemanjaji ŵatite, ‘Ana ngamkanatenda cilicose akasalile kuti atende yindu yakusawusya kuti apole? Yakwasalila jwakulocesyaju kuti atende yili yangasawusya. Wuli ngagamba kutenda yeleyi? Namani ŵapikanile jemanjaji. Jwalakwe jwapite ku Lusulo lwa Yolodani ni kulitiŵisya m’mesi maulendo 7. Pambesi paulendo wa 7, Namani ŵacuwice m’mesimo ali aposile. Jwalakwe jwasangalele mnope, soni jwawujile kukum’yamicila Elisa. Namani jwatite, ‘Sambano manyilile kuti Yehofa ali Mlungu jusyesyene.’ Ana mkuganisya kuti kamsikana ka ku Yisalayeli kapikene wuli Namani paŵawujaga ali aposile?