Kulinjidwa Cikulupi

Abulahamu ŵamjiganyisye mwanagwe Isaki, kuti amnonyeleje Yehofa soni akulupilileje yilanga yakwe. Nambo Isaki paŵaliji ni yaka 25, Yehofa ŵamsalile Abulahamu kutenda cindu cakusawusya. Ana caliji cici?

Mlungu ŵamsalile Abulahamu kuti, ‘Mjigale mwanace jwenu jumopejo ni mkampelece mbopesi ku litumbi lya Moliya.’ Abulahamu nganamanyililaga ligongo lyakwe Yehofa ŵamsalile kuti atende yeleyo. Nambope ŵampikanile.

Kundaŵi kwakwe, Abulahamu ŵamjigele Isaki ni ŵamasengo ŵaŵili ulendo wa ku Moliya. Ali ajesile kwa masiku gatatu ŵatandite kuliwona litumbi lya Moliya. Abulahamu ŵasalile ŵamasengo ŵakwe kuti amjembeceyeje pele jwalakwe ni Isaki ŵajawulaga kukupeleka mbopesi. Abulahamu ŵampele Isaki sasu kuti anyakule, jwalakwe ŵajigele cipula. Isaki ŵawusisye atatigwe kuti, ‘Ana nyama jakuti tukapelece mbopesijo jili kwapi?’ Abulahamu ŵamjanjile kuti, ‘Mwanangu, Yehofa cakatupe kukoko.’

Ali ayice kwitumbiko ŵataŵile malo gakupecela mbopesi. Kaneko Abulahamu ŵamtaŵile Isaki makono ni ngongolo syakwe ni kum’ŵika pa malo gakupelecela mbopesigo.

Abulahamu ali ajigele cipula kuti am’wulaje mwanacejo, ndaŵi jijojo lilayika lya Yehofa lyam’ŵilasile kutyocela kwinani kuti, ‘Abulahamu! Mkamsim’wulasya mwanacejo! Sambano manyilile kuti mkwete cikulupi mwa Mlungu ligongo mli ŵakusacilila kumpeleka mbopesi mwanagwenu.’ Kaneko ŵajiweni ngondolo jili jitanjile ni misengo jakwe m’citekete. Ndaŵi jijojo ŵamgopwele Isaki ni kujipeleka ngondolojo mbopesi.

Kutandila palisiku lyelelyo, Yehofa ŵamkolasile Abulahamu kuti mjakwe. Ana mkumanyilila ligongo lyakwe? Ligongo lyakuti jwalakwe ŵatesile yindu yele Yehofa ŵasakaga kuti atende atamose kuti nganamanyililaga ligongo lyakwe Yehofa ŵasakaga kuti atende yeleyo.

Yehofa ŵawilisyesoni cilanga cakwe kwa Abulahamu kuti, ‘Cinjimjaliwa mmwejo soni cinjitupiya ŵanace ŵenu.’ Yeleyi yagopolele kuti Yehofa cacijaliwa ŵandu wosope ŵambone kupitila m’liŵasa lya Abulahamu.