Yakobo Jwapocele Cipanje

Isaki ali akwete yaka 40, jwamlombile Labeka. Jwalakwe ŵamnonyelaga mnope Labekajo. Mkupita kwandaŵi jemanjaji ŵaŵelece ŵanace ŵaŵili ŵacalume ŵamaŵila.

Mwanace jwandanda kupagwa jwaliji Esawu, jwinejo jwaliji Yakobo. Esawu jwanonyelaga kwendajenda soni kusakula yinyama. Nambo Yakobo jwanonyelaga kutama pamlango.

M’masiku gelego, mwanace jwamlume jwandanda kupagwa ni juŵapocelaga cipanje mpela malo ni mbiya babagwe pawile. M’liŵasa lya Isaki cipanjeci capwatikagapo yilanga ya Yehofa yiŵamlagucisye Abulahamu. Esawu nganayikosyaga mnope yilangayi nambo Yakobo ŵamanyililaga kuti yaliji yakusosekwa mnope.

Lisiku line Esawu ŵakopocele pamlango ali apesile mnope paŵatyocelaga kusakula yinyama. Jwalakwe ŵapikene kununjila kwa yakulya yiŵatelekaga Yakobo ni ŵamsalile kuti, ‘Mbesile! Mumbeko ngunde syecejuwosyo!’ Yakobo jwajanjile kuti, ‘Cinampe, nambo candanda mulagusye kuti cinjipocele cipanje cenu.’ Esawu jwatite, ‘Nganingola nayo masengo ya cipanjeco! Une ngusaka kulya basi.’ Ana mkuganisya kuti lwaliji lunda kutenda yeleyo? Iyayi, nganiluŵa lunda. Esawu ŵacengenye cindu cakusosekwa mnope ni mbale ja ngunde.

Isaki ali akalambele, ŵasakaga kumpa majali mwanagwe jwandanda jula. Nambo Labeka ŵamkamucisye Yakobo mwanace jwaŵili kupagwa jula kuti apocele majaligo. Esawu ali ayimanyi yeleyi jwatumbile mnope mwamti ŵalinganyisye yakuti am’wulaje mpwakwejo. Isaki ni Labeka ŵasakaga kumcenjela Yakobo ni ŵamsalile kuti, ‘Mjawule mkatameje ni mjomba ŵenu, Labani mpaka pandaŵi jele mtima wa Esawu ucitulala. Yakobo jwapikanile acinangolo ŵakwewo ni jwatisile.