MBALI 4
Kulijimba Magambo “Aswejesye Une ku Cakulemwa Cangu”
“Masengo ganapatile gakamucisyaga mnope liŵasa lyetu, nambo ganjinjisye mu ndamo syangaŵajilwa. Natandite kutenda nawo yindimba yacikusa, kwinjilila ya ndale, soni kwawula ku dini syacikusa. Nalesile kutenda yindu mpela jwa Mboni sya Yehofa kwa yaka 40. Ligongo natemi yaka yejinji, naliwonaga mpela Yehofa ngaŵa mkungululucila. Naliwonagasoni kuti ngaŵa mkulikululucila namsyene. Atamose natendaga yeleyi, usyesyene nawumanyililaga.”—Martha.
KULIJIMBA magambo pa yakulemwa yatwatesile kuli kwakogoya. Mwenye Daudi ŵalembile kuti, “Yakulemwa yangu yipundile msingu wangu. Yisitopele mnope mpela ndundu syausito.” (Salimo 38:4) Ligongo lya kulitendela canasa mnope pa yakulemwa yaŵatesile, Aklistu ŵane akusajasa mtima ni kayicilaga kuti Yehofa ngaŵa mkwakululucila. (2 Akolinto 2:7) Ana yeleyi yili yisyene? Atamose naga ŵatesile yakulemweceka yekulungwa, ana akuganisya kuti Yehofa ngaŵa mkwakululucila? Iyayi!
‘Kwende Tutagulilane Nipo Cinjakamucisya Kuti Tukamulanesoni’
Yehofa jwangajasa ŵandu ŵapitikwice mtima. Jwalakwe akusasaka kuti akamulanesoni ni ŵanduwo. M’citagu ca mwanace jwamsokonecele, Yesu ŵalandanyisye Yehofa ni mtati jwacinonyelo, jwele mwanagwe ŵatyosile pamlango pakwe ni kuja kwinjilila mu ndamo syakusakala. Pali papite ndaŵi, mwanaceju ŵaganisisye yakuwujilila kumangwawo. “[Mwanacejo] paŵaliji palutando, babagwe ŵam’weni ni ŵamtendele canasa. Babagwewo ŵam’wutucile ni kumkumbatila soni kumkisa.” (Luka 15:11-20) Ana akusaka kum’ŵandicila Yehofa nambo akuliwona kuti atalikangene najo mnope? Mpela mtati jwa m’citagu ca Yesu cila, Yehofa akwatendela mnope canasa wawojo. Jwalakwe ali jwakusacilila kwapocela.
Nambi wuli naga akuganisya kuti yakulemwa yawo yili yekulungwa mnope kapena yejinji mwati Yehofa ngaŵa mkwakululucila? Aganicisye yakutuŵenda Yehofa kuti tutende yayili pa lilemba lya Yesaya 1:18, ‘Kwende tutagulilane nipo cinjakamucisya kuti akamulanesoni ni une. Atamose yakulemwa yawo yili yicejele mnope, cinjiyiswejesya.’ Yehofa mpaka ŵakululucile yakulemwa yawo atamose yili yicejele mnope mpela penti jecejewu pa nguwo jeswela.
Yehofa ngakusaka kuti cikumbumtima cawo cajimbeje magambo. Nambo, ana mpaka atende yatuli kuti Mlungu ŵakululucile ni kuŵasoni ni cikumbumtima ceswela? Kwende tulole yindu yiŵili yaŵatesile Mwenye Daudi. Candanda, ŵatite, ‘Cinjijuwula kwa Yehofa yakulemwa yangu.’ (Salimo 32:5) Akumbucile kuti Yehofa ni jwakwasalila wawojo kuti am’ŵandicile kupitila mwipopelo soni kuti ‘ŵakamucisye kamulanasoni.’ Akusosekwa kupikanila yeleyi ni kwiticisya yakulemwa yawo pameso pa Yehofa, soni kumsalila mwakupikanila mumtima. Ligongo lyakuti Daudi ŵamanyililaga yeleyi, jwalakwe ŵapopesile kuti, “Aswejesye une ku cakulemwa cangu. . . . Wawo Mlungu, ngasawucembulusya mtima wekasice ni wacanasa.”—Salimo 51:2, 17.
Caŵili, Daudi ŵapocele cikamucisyo kupitila kwa Natani, jwakulocesya jwa Mlungu. (2 Samueli 12:13) Lelo jino, Yehofa atupele acakulungwa ŵa mumpingo ŵaŵalijiganyisye cenene kuti ŵakamucisyeje ŵandu ŵapitikwice mtima kamulanasoni ni Yehofa. Wawojo payice kwa acakulungwaŵa, cacikamulicisya masengo Malemba, soni kwapopelela mwakutyocela pasi pa mtima kuti ŵatamice mtima pasi. Cacakamucisyasoni kunandiya kapena kutyosya nganisyo syakulijimba magambo, soni kwaposya mwausimu.—Yakobo 5:14-16.
Yehofa akusaka kuti cikumbumtima cawo ciŵesoni ceswela
‘Jwakusangalala Ali Mundu Jwele Yakulemwa Yakwe Yikululucikwe’
Nambo mwine mpaka ayiwone kuŵa yakusawusya mnope kumsalila Yehofa yakulemwa yawo, soni kwawula kwa acakulungwa ŵa mumpingo. Daudi ŵapikanagasoni m’yoyo. Kwakandaŵi, jwalakwe nganasaka ‘kusala’ yakulemwa yakwe. (Salimo 32:3) Nambo kaneko, ŵayiweni kuti kwiticisya yakulemwa, soni kutenda yakuŵajilwa kwaliji kwakamucisya mnope.
Kupunda yosope, kwamkamucisye Daudi kutandilasoni kusangalala. Jwalakwe ŵalembile kuti, ‘Jwakusangalala ali mundu jwele yakulemwa yakwe yikululucikwe.’ (Salimo 32:1) Ŵapopesilesoni kuti, “Wawo Yehofa, awugule ngomo syangu, kuti pakamwa pangu paŵecete yakwalumba ŵalakwe.” (Salimo 51:15) Paŵalesile kulijimba magambo, soni pakulosya kuyamicila ligongo lyakuti Mlungu ŵamkululucile, Daudi ŵatandite kwasalila ŵane ya Yehofa.
Yehofa akusaka kuti cikumbumtima cawo ciŵesoni ceswela. Akusakasoni kuti wawojo ŵasalileje ŵane ya jwalakwejo soni yakulinga yakwe. Jwalakwe akusaka kuti atendeje yeleyi ni mtima wosope soni mwakusangalala, ngaŵa ali mkulijimba magambo. (Salimo 65:1-4) Akumbucile kuti jwalakwe akusaka ‘kwatyocesya yakulemwa yawo, kuti jiyice ndaŵi jakupumula kutyocela kwa Yehofa.’—Masengo 3:19.
Yeleyi ni yayatendekwe kwa Martha jula. Jwalakwe ŵatite, “Mwanace jwangu jwamlume jwandumicisyaga magasini ga Sanja ja Mlonda ni Galamukani! Mwapanandipanandi, natandilesoni kumnonyela Yehofa. Nambo cindu cacandemaga mnope kutenda kuti mbujilesoni kwa Yehofa, caliji kulepela kum’ŵenda kuti angululucile yakulemwa yangu yosope. Pambesi pakwe napopesile kwa Mlungu ni kum’ŵenda kuti angululucile. Apano yikusambweteka kuyiwona kuti yaka 40 yamasile mkanimbujile kwa Yehofa. Yayandendeceleyi yikulosya kuti atamose pamale yaka yejinji mundu ali alesile kutenda yindu ni mpingo wa Yehofa, upile upalipe wakuŵasoni m’cinonyelo cakwe ni kutandilasoni kumtumicila.”