MBALI 3
Kutumbila ‘Naga Jwine Atulemwecesye’
“Mlongo jwine jwa mumpingo wetu ŵalambucisyaga kuti namjiŵile mbiya. Ŵanesoni pampingopo paŵayimanyi yeleyi ŵatandite kuŵeceta mwakum’ŵicila kunyuma mlongojo. Pambesi pakwe Mlongoju ŵasalile une kuti ŵapocele utenga wakumsalila ya mundu jwaŵajiŵile mbiya syakwesyo. Atamose ŵapelece pepani, nambo mumtima mwangu nasimicisye yakuti ngasinamkululucila ligongo lya yaŵandendeleyi.”—Linda.
ANA wawojo ŵasimene ni yindu yakupweta mpela yeleyi kutyocela kwa jwakulupilila mjawo? Cakutesa canasa cili cakuti, yitendo ya ŵane yasokonasisye mwausimu ŵakulupilila acimjawo. Ana mwelemu ni mwayiŵelele yindu paumi wawo?
Ana Apali Ŵampaka ‘Atulekanganye ni Cinonyelo ca Mlungu’?
Kusala yisyene, ndaŵi sine yikusatusawusya kumkululucila jwakulupilila mjetu jwatutendele yindu yakupweteka, atamose kuti malemba gakusasala kuti tunonyelaneje jwine ni mjakwe. (Yohane 13:34, 35) Naga jwakulupilila mjetu atuleŵele yikusaŵa yakudandawulisya nambosoni yakupweta mnope.—Salimo 55:12.
Baibulo jikusajiticisa kuti ndaŵi sine Mklistu mjetu mpaka ‘atulemwecesye.’ (Akolose 3:13) Atamose yili m’yoyo, yeleyi payitutendecele, yikusaŵape yakupweteka. Ana pana campaka citukamucisye payitendekwe yeleyi? Kwende tutagulilane songa sitatu sya m’Malemba:
Atati ŵetu ŵakwinani akusamanyilila yosope. Yehofa akusalola yosope, kupwatikapo yindu yangali cilungamo yayikututendecela, soni yakuyicisya yakwe yatukusalaga nayo. (Ahebeli 4:13) Konjecesya pelepo, Yehofa yikusamkwaya patukulaga. (Yesaya 63:9) Jwalakwe ngasakunda kuti ‘kulaga kapena yipwetesi’ kapenasoni cindu cilicose, atamose jwakutumicila jwakwe kuti “yitulekanganye ni cinonyelo ca Mlungu.” (Aloma 8:35, 38, 39) M’wejisoni tukakunda cindu cilicose kapena mundu jwalijose kutulekanganya ni Yehofa.
Kumkulucila mundu nganikuŵa kulecelela yakulemweceka. Naga tukusiŵakululucila ŵatulemwecesye, ngaŵa kuti ngatukusamala, kunandiya, kulimbikasya kapena kulecelela yitendo yawo. Akumbucileje kuti Yehofa jwangasangalala ni yakulemwa nambo akusamkululucila mundu naga pana magongo gakupikanika. (Salimo 103:12, 13; Habakuku 1:13) Yehofa pakutulimbikasya kuti twakululucileje ŵane, yikusalosya kuti jwalakwe akusaka kuti tumsyasyeje. Jwalakwe ngaŵa ‘mkututumbilila mpaka kalakala.’—Salimo 103:9; Matayo 6:14.
Naga ngatukwasunjila ŵane cakulukosi yikusatukamucisya. Catuli? Aganicisye ayi: Tujile kuti wawojo anyakwile liganga lya usito ni mkono wawo uli wetambasukule. Naga akunyakula ligangalyo kwa maminisi gamnono, mkono wawo mpaka upele panandi. Nambi wuli kwa maminisi gejinji kapena awaala mwinesoni kupunda? Mwangakayicila, mkono wawo mpaka upele mnope. Yeleyi ngayikugopolela kuti usito wa ligangalyo ucenjile, nambo ligongo lyakuti anyakwile ligangalyo kwa ndaŵi jelewu. Yakulandana ni yeleyi ni yayikusatendekwa naga tukwasunjila ŵane cakulukosi, cinga camwana kapena cekulungwa kwandaŵi jelewu. Kutenda yeleyi mpaka kutuwulasye. Ni ligongo lyakwe Yehofa akusatulimbikasya kuti tukasunjilaga acimjetu cakulukosi. Kusala yisyene, naga ngatukusasunga cakulukosi, yikusatukamucisya acimsyewe.—Miyambo 11:17.
Naga ngatukusasunga cakulukosi, yikusatukamucisya acimsyewe
“Napikene Mpela Yehofa Msyene Akuŵeceta ni Une”
Ana cici cacamkamucisye Linda kuti akasunga cakulukosi atamose kuti jwakulupilila mjakwe ŵamtendele yindu yangali cilungamo? Cimo mwa yindu yayamkamucisye caliji kuganicisya mwakusokoka magongo ga m’Malemba gakamucisya kuti ŵakulucile ŵane. (Salimo 130:3, 4) Linda ŵatesile yeleyi pakumanyilila kuti naga akumkululucila mjakwe, Yehofa cacimkululucilasoni. (Aefeso 4:32–5:2) Paŵaganicisye malembaga, yamkwayiye, ni ŵaŵecete kuti, “Napikene mpela Yehofa msyene akuŵeceta ni une.”
Kaneko Linda ŵamkululucile mlongo jula, mwati apano ali mjakwe jwapamtima. Jwalakwe akwendelecela kumtumicila Yehofa. Yehofa akusakasoni kwakamucisya wawojo.