MBALI 1
‘Cinjijisosa Ngondolo Jesokonecele’
Ngondolo jine jikulya manyasi ni ngondolo sijakwe. Pajikwenda m’cilyaga, jikwawula kwakutalikangana ni sijakwe, kaneko jikulola kuti ngondolo sijakwe sila soni mkucinga kwangali. Kusa kutandite kuswa, mwilambo mwajisokonecele ngondoloji mukusajenda yinyama yakogoya, soni pangali jwampaka ajicenjele. Kaneko jikupikana maloŵe ga mkucinga jakwe jwakuwutucila kujili ngondolojo. Pajisimene, akujinyakula, akujiwunicila ni malaja gakwe, ni kwawula najo kunyumba.
NDAŴI syejinji Yehofa akusalilandanicisya ni mkucinga mpela jweleju. M’Maloŵe gakwe, akusatusimicisya kuti, “Une namsyene cinjisosasosa ngondolo syangu ni kusisamalilaga.”—Ezekieli 34:11, 12.
“Ngondolo Syangusasisamalila”
Ana ŵani ŵali ngondolo sya Yehofa? Ali ŵandu ŵakusamnonyela soni kumlambila. Baibulo jikusasala kuti, “Ayice kuti tumlambile soni tumjinamile. Kwende tutindiŵale pameso pa Yehofa, Mkupanganya jwetu. Pakuŵa jwalakwe ali Mlungu jwetu, soni uweji tuli ŵandu ŵakwe. Jwalakwe akusatusamalila mpela ngondolo syakusilanga.” (Salimo 95:6, 7) Ngondolo sisyesyene sikusamkuya mkucinga, mwakulandana ni yeleyi ŵakulambila ŵa Yehofa ali ŵakusacilila kuya Mkucinga jwawo. Ana jemanjaji ŵangalemwesya yindu? Iyayi. Ŵakutumicila ŵa Mlungu pakwete paŵeje mpela ‘ngondolo syebalalikane,’ “ngondolo syakusokonecela,” soni “mpela ngondolo syesokonecele.” (Ezekieli 34:12; Matayo 15:24; 1 Petulo 2:25) Atamose jwakulambila juŵalesile kutenda yindu ni mpingo, Yehofa akusajembeceya kuti lisiku line caciwujila.
Ana akusam’wonape Yehofa kuŵa Mkucinga jwawo? Ana jwalakwe alosisye catuli lelo jino kuti ali Mkucinga? Kwende tulole matala gatatu:
Akusatulisya mwausimu. Yehofa ŵasasile kuti, “Ngondolosyo cinjisilicisya m’malo ga manyasi gambone. . . . Sicigona kweleko m’malo ga manyasi gambone, soni sicilya manyasi gakubiliŵita cenene.” (Ezekieli 34:14) Pangali lisiku lyele Yehofa ŵalepele kutupa cakulya causimu pandaŵi jakwe. Ana mpaka akumbucile ngani kapena buku jine jakwe mwinesoni fidiyo, jajajanjile lipopelo lyawo? Ana yeleyi nganiyatendekasya kum’wona kuti Yehofa akusiŵasamalila wawojo pajika?
Akusatucenjela soni kutukamucisya. Yehofa ŵatulajisye kuti, “Cinjisiwusya ngondolo syasibalalikangene, syasiwulele cinjisitaŵa maŵanga gakwe, soni syakulepetala cinjisilimbisya.” (Ezekieli 34:16) Yehofa akusiŵalimbikasya ŵandu ŵalepetele kapena kuti ŵawujilile munyuma mwausimu ligongo lya nganisyo. Jwalakwe akusasitaŵa maŵanga ngondolo syakwe syasiwulele, mwine ligongo lya ŵakulupilila acimjawo. Yehofa akusiŵawusya ŵandu ŵakwe ŵabalalikangene soni ŵakulimbana ni nganisyo syakuliwona kuti ŵangali mate.
Akusalipikana kuti akwete ukumu wakutusamalila. Yehofa ŵasasile kuti, “Cinjisikulupusya ngondolo syangu kulikose kwasibalalikangene.” “Cinjisisosa Ngondolo Syesokonecele.” (Ezekieli 34:12, 16) Ngondolo ja Yehofa pajisokonecele, ngaŵa kuti basi pangali cembeceyo. Jwalakwe akusamanyilila, ni akusajawula kukujisosasosa, soni pajisimene akusasangalala. (Matayo 18:12-14) Ni ligongo lyakwe akusiŵakolanga ŵakulambila ŵakwe ŵasyesyene kuti ali ‘ngondolo syakwe syakusasisamalila.’ (Ezekieli 34:31) Wawojo ali jumo mwa ngondolo syelesi.
“Awucisye Yindu Kuti Yiŵe Mpela Mwayaŵelele Pandanda”
Ligongo cici Yehofa akwasosasosa wawojo soni kwaŵenda kuti awujile kwa jwalakwe? Akusaka kuti wawojo asangalaleje. Jwalakwe ŵalajisye kuti ‘cacipeleka majali gejinji’ kwa ngondolo syakwe mpela mwajikusagwila wula. (Ezekieli 34:26) Yeleyi ngaŵa yakwelegula. Komboleka kuti paumi wawo awuweni umboni wakuti yeleyi yili yisyene.
Akumbucile yindu yakusangalasya yayatendekwe ali agambile kumanyilila kwene yakwamba Yehofa. Mwambone, ana ŵapikene wuli paŵalijiganyisye kandanda usyesyene wakwamba lina lya Mlungu soni lisosa lyakwe kwa ŵandu? Ana akukumbucila mwaŵasangalalilaga ni Aklistu acimjawo pamisongano jekulungwakulungwa? Nambi wuli yayatendekwe paŵajinjile muundumetume ni kumlalicila mundu jwine jwaŵalosisye lung’wanu, ana nganawujila kunyumba ali mkusangalala soni ali ajikutile?.
Mpaka atandilesoni kusangalala. Ŵakutumicila ŵa Mlungu ŵakalakala ŵapopesile kuti, “Atuwucisye kwa ŵalakwe, wawo Yehofa, soni m’weji tuciwujila mwacitema. Awucisye yindu kuti yiŵe mpela mwayaŵelele kalakala.” (Maliro 5:21) Yehofa ŵajanjile lipopeloli, soni ŵandu ŵakwe wawujilile ni kutandilasoni kumtumicila mwakusangalala. (Nehemiya 8:17) Yehofa cacitendasoni yakulandana ni yeleyi kwa wawojo.
Nambope, kuŵeceta kuti cawujile kwa Yehofa kuli kwangasawusya nambo kutenda yakuti awujile. Kwende tutagulilane yindu yine yampaka yalepekasye kuwujila kwa Yehofa soni tulole mwampaka amalanile nayo.
Ngondolo ja Yehofa pajisokonecele, ngaŵa kuti basi pangali cembeceyo. Jwalakwe akusasangalala pajisimene