Cikalata Cakutyocela ku Likuga Lyakulongolela

Ŵakunonyelwa ŵakulupilila ajetu:

Tukusamanyilila kuti acalume ni acakongwe ŵajinji ŵakulupicika ŵakusiŵasala m’Baibulo ŵasimanaga ni yindu yakusawusya mpela yatukusasimana nayo. Jemanjaji ŵaliji ‘ŵandu mpela m’weji.’ (Yakobo 5:17) Ŵane ŵasimanaga ni yindu yakusawusya, soni ŵalagaga nganisyo. Ŵane ŵalagaga ni yindu yangalwe kutyocela kwa acalongo acimjawo kapena ŵakulambila acimjawo. Ŵandu ŵanesoni ŵalijimbaga magambo pa yindu yaŵalemwisye.

Ana ŵandu ŵeleŵa ŵamlesile Yehofa mpaka kalakala? Iyayi. Ŵajinji mwa ŵanduŵa ŵaliji mpela jwamalumbo jwaŵapopesile kuti, “Ngwamba kulijendela mpela ngondolo jesokonecele. M’yoyo, ayice kukundolesya une jwakutumicila jwawo. Ligongo nganinagaliŵalila malamusi gawo.” (Salimo 119:176) Ana wawojo akulipikana mpela jwamalumboju?

Yehofa ngaŵa mkwaliŵalila ŵakulambila ŵakwe ŵaŵalesile kutenda yindu ni mpingo wakwe. Ndaŵi syejinji Yehofa akusiŵakamucisya ŵanduŵa pakamulicisya masengo ŵakulupilila acimjawo. Mwambone, Yehofa ŵamkamucisye jwakulambila jwakwe Yobu juŵasimene ni yindu yejinji yakusawusya. Cipanje cakwe camasile, ŵanace ŵakwe ŵawile, ŵalasile ni ulwele, nambosoni ŵapilile maloŵe gacipongwe gakutyocela kwa ŵandu ŵakasosekwe kuti amlimbikasyeje. Atamose kuti nganisyo syakwe syasokonecele kwakandaŵi, nambope nganamleka Yehofa. (Yobu 1:22; 2:10) Ana Yehofa ŵamkamucisye catuli Yobu kuti atandesoni ganisya cenene?

Litala limo lyaŵakamulicisye masengo Yehofa pakumkamucisya Yobu, lyaliji kupitila mwa jwakulupilila mjakwe, lina lyakwe Elihu. Yobu paŵasalaga yakudandawula yakwe, jwalakwe ŵampikanilaga, kaneko yamtendekasisye kuti aŵecete. Ana ŵaŵecete yatuli? Ana ŵamjimbile magambo Yobu kapena kum’ŵecetela maloŵe gagakamtendekasisye kuliwona kuti ali jwakulemwa kapena kumtendekasya sooni? Jwalakwe nganatenda yeleyo! Soni nganaliwona kuti ali jwapenani kupunda Yobu. Mwakulongoleledwa ni msimu weswela ŵatite, “Une ndili mundu mpela wawojo pameso pa Mlungu, none jwakwe ŵambanganyisye kutyocela ku lilongo.” Kaneko ŵamlimbikasisye Yobu kuti, “Pangali cindu cakuti wawojo ajogope kwa une, soni maloŵe gangu ngaŵa mkwasitopesya.” (Yobu 33:6, 7) Elihu nganam’ŵecetela Yobu maloŵe gagakajonjecesye nganisyo syakwe syakudandawula, m’malo mwakwe mwacinonyelo, ŵaŵecete maloŵe gakamucisya soni gakumlimbikasya gaŵasosecelaga.

M’wejisoni tulinganyisye kabukuka ni cakulinga cakuti kalimbikasye. Pakulemba kabukuka, candanda twapikanile ni kuganicisya cenene yindu yaŵaŵecete, soni yaŵasimene nayo ŵandu ŵaŵalesile kutenda yindu ni mpingo wa Yehofa. (Miyambo 18:13) Kaneko twapopesile kwa Yehofa kuti atukamucisye kusagula cenene ngani sya m’Malemba, syakusala yaŵatesile Yehofa pakwakamucisya ŵakutumicila ŵakwe ŵaŵasimene ni yindu yakulandanda ni yakusimana nayo. Pambesi pakwe tupwatikenye nganisi ni yakutendekwa ya moŵa agano ni kupanganya kabukuka. Tukwaŵenda kuti aŵalanje kabukuka, soni amanyilile kuti tukusanonyela mnope.

Likuga Lyakulongolela lya Mboni sya Yehofa