Ligongo Cici Tukusawala Cenene Pamisongano Jetu ja Mpingo?

Ana ayiweni mu yiwilili ya m’kabukuka kuti Mboni sya Yehofa sikusawala cenene pamisongano jawo jampingo? Ligongo cici tukusawala ni kulisalalisya mwakuŵajilwa?

Tukusasaka kulosya ucimbicimbi kwa Mlungu jwetu. Yili yisyene kuti Mlungu jwangagambape kulola kawonece ketu kakusa. (1 Samueli 16:7) Nambo patusongene kuti tumlambile, tukusasaka mnope kumcimbicisya jwalakwe, soni ŵakulambila acimjetu. Naga tukwawula panganya pameso pa jwakwelusya, tukusalolecesya kuti tukuwoneka mwakulicimbicisya. M’yoyosoni, kawonece ketu pamisongano jampingo kakusalosya kuti tukusacimbicisya “Jwakwelusya jwa cilambo capasi cosope,” Yehofa Mlungu, soni malo gatukusamlambilila.—Genesis 18:25.

Tukusasaka kulosya ndamo syatukusakuya pa umi. Baibulo jikusalimbikasya Aklistu kuti awaleje “mwaucimbicimbi ni kuligosa” mpela ŵandu ‘ŵakusapopela Mlungu.’ (1 Timoteo 2:9, 10) Kuwala “mwaucimbicimbi” kukugopolela kuŵambala yakuwala yampaka yatendekasye ŵane kola lung’wanu pa m’weji, mpela kuwala yakulilosya, yakwatendekasya ŵandu kola lung’wanu lwa kugonana, kapena yakuwonecela mkati. Kuŵa “ŵakuligosa” kukusatukamucisya kusagula yakuwala yambone ngaŵaga yangasamalika, kapena yakupundanganya. Nambope maloŵe gakutulongolaga gakusampaga mundu ukoto wekulungwa wakulisagulila jika. Mwangaŵeceta maloŵe, kuwala mwakuŵajilwa, soni kuwoneka cenene mpaka ‘kunonyelesye cijiganyo ca Mkulupusyo jwetu,’ soni “kumcimbicisya Mlungu.” (Tito 2:10; 1 Petulo 2:12) Kuwala kwetu mwakuŵajilwa pamisongano jampingo, kukusakamucisya kuti ŵane ayiwoneje kuti kulambila Yehofa kuli kwambone.

Nambope naga nganakola yakuwala yakuŵajilwa komboleka kuyika kumisongano pa Nyumba ja Ucimwene. Yakuwala yetu komboleka kuŵa yacasa, soni yakuŵajilwa nambo yili yakucipa.

• Ana kawale ketu kali kakusosekwa catuli patukumlambila Mlungu?

• Ana maloŵe gakutulongola gapi gampaka gatukamucisye kusagula cenene yakuwala, soni kulisalalisya kwetu?