Ana Misongano Jetu ja Mpingo Jikusatendekwa Mwatuli?

Pamisongano ja Ciklistu jakala, ŵandu ŵajimbaga nyimbo, kupopela, soni kuŵalanga ni kutagulilana Malemba. Pakutenda yeleyi paliji pangali misyungu jilijose. (1 Akolinto 14:26) Yakulandana ni yeleyi ni yampaka akayiwone pamisongano jetu.

Ngani syakwe sikusatyocela m’Baibulo, soni sili syakamucisya. Kumbesi kwa mlungu, mpingo uliwose ukusasongana kuti upikanile ngani ja m’Baibulo ja maminisi 30 jajikusatagulila yampaka tutende pakamulicisya masengo Malemba pa umi wetu, soni yagakusaŵeceta Malemba pakwamba ya ndaŵi jatukutamaji. Ŵane wosope tukusakuya m’Baibulo jetu. Ngani pajimasile, pakusaŵa Lijiganyo lya “Nsanja ya Olonda.” Palijiganyoli Aklistu wosope akusaŵa ŵagopoka kwanga pakutagulilana ngani jakutyocela mu Nsanja ya Olonda jakulijiganya. Kutagulilanaku kukusatukamucisya kuti Baibulo jitulongoleje pa umi wetu. Lijiganyoli likusatendekwa m’mipingo jakupunda 100,000 pacilambo cosope.

Misonganoji jikusatukamucisya kwawusya m’bujo lunda lwakwiganya. Tukusasonganasoni masiku gane kuti tutende pologalamu ja mbali sitatu. Mbali jandanda jikusaŵa Lijiganyo lya Baibulo lya Mpingo, lyalikusatendekwa kwa maminisi 30. Mbaliji jikusaŵa kutagulilana mawusyo ni kwanga kwakwe. Yeleyi yikusakamucisya kupikanicisya maloŵe gakutulongola ga m’Malemba, soni yajalocesye Baibulo. Kaneko pakusaŵa Sukulu ja Undumetume wa Mlungu jajikusatendekwa kwa maminisi 30. Jikusatanda ni kutagulilana mbali jine ja m’Baibulo jajikosecele ŵandu mkanipaŵe. Kaneko ŵakulijiganya ŵaŵajinjile nawo sukulu akusaŵecetaga ngani syasijipi. Jwakutendesya sukuluji akusalolecesyaga kuti atukamucisye mwampaka tujawucisye m’bujo lunda lwetu lwakuŵalanga, soni kuŵeceta. (1 Timoteo 4:13) Kumbesi, kukusaŵa Msongano wa Undumetume, kwa maminisi 30, wawukusaŵa ni ngani, yilosyo, soni kuwusya ŵandu, tukusalijiganya yampaka tutende pakwajiganya ŵane Baibulo.

Naga akusimanikwa pamisongano jetu, mwangakayicila cacisangalala ni majiganyo gambone ga m’Baibulo gatukusapocela.—Yesaya 54:13.

• Ana mpaka akapikane cici pamisongano ja mpingo ja Mboni sya Yehofa?

• Ana mpaka asace kusimanikwa pamisongano jetu japi jajikusatendekwa mlungu uliwose?