Ngani Syambone Sikuwanda

PAULO paŵaŵele Mklistu, ŵalimbicilaga kulalicila ngani syambone syakwamba ya Ucimwene wa Mlungu, ni yeleyi yamtendekasisye kuti jwalakwe juŵatendelaga ŵane ngalwe, atande nombe najo kusimana ni ngalwe. Ndumetume jwamtawuju ŵajesile maulendo gejinji gakwanawula, pakulalicila ngani syambone syakwamba ya Ucimwene wawucikwanilisya lisosa lyandanda lya Mlungu pakwamba ya ŵandu.

Paŵaliji ku Lusitala, paulendo wakwe wandanda wakulalicila, Paulo ŵamposisye jwamlume jwine juŵaliji jwamlemale cipagwile. Likuga lya ŵandu lyatandite gumila ni kuŵeceta kuti Paulo ni mjakwe juŵajendaga najo lina lyakwe Banaba, ŵaliji milungu. Ŵanduŵa ŵatandite kupeleka mbopesi kwa Paulo ni Banaba, soni nganiyikomboleka kuti ŵalekasye ŵanduwo. Nambo kaneko acimmagongo ŵa Paulo ŵatendekasisye ŵanduŵa kuti amponye maganga Paulo ni kumleka ali asigele panandi kuwa. Paulo ŵalamile, soni pandaŵi jine ŵawujile ku msinda wuwowo kukwatagulila ŵakulijiganya maloŵe gakulimbikasya.

Aklistu ŵane ŵa Ciyuda ŵalimbicilaga kuŵeceta kuti ŵakulupilila ŵanganaŵa Ayuda ŵasosekwaga kuya yayili m’Malamusi ga Musa. Paulo ŵajawile najo nganiji ku Yelusalemu kwa ŵandumetume ni acakulungwa. Ali ajitagulilene cenene nganiji mwakamulana ni Malemba soni mwakulongolelegwa ni msimu weswela wa Mlungu, acalumewo ŵalembile yikalata ku mipingo kwasalila kuti aŵambale kulambila mitembe, akalyaga miyasi ni yakupopotola, soni aligoseje ku yitendo ya msese. Malamusi gelega galiji ‘gakusosekwa,’ nambo kugapikanila nganikuŵa kuya Malamusi ga Musa.—Masengo 15:28, 29.

Pa ulendo wakwe waŵili wakuja kukulalicila, Paulo ŵajile kwika ku Beleya, m’cilambo cacikumanyika moŵa agano kuŵa Greece. Ayuda ŵaŵatamaga kweleku ŵagapocele maloŵe ni mtima wosope, soni ŵalolaga m’Malemba lisiku lililyose kuti asimicisye yaŵajiganyaga Pauloyo. Nambo ligongo lya kusisya kukwapalisoni kweleko, jwalakwe ŵatyosile ni kwawula ku Atene. Pameso pa ŵandu ŵakulijiganya mnope ŵa ku Ateneko, Paulo ŵaŵecete ngani jakamula mtima mnope, jaŵajiŵecete mwakusamala, mwalunda, soni jaliji jakusangalasya kujipikanila.

Pambesi paulendo wakwe watatu wakuja kukulalicila, Paulo ŵapite ku Yelusalemu. Kweleko paŵapite ku nyumba jakupopelela, Ayuda ŵane ŵatandisye yitendo yakuwulasya, acisakaga kum’wulaga Paulo. Asilikali ŵa Ciloma ŵamkulupwisye ni kumjigalila ku luŵala lwa magambo. Pakuŵa ŵaliji jwa Ciloma, jwalakwe kaneko ŵajile kukuliŵalanga pameso pa Felike jwakwimila cilambo ca Aloma. Ayuda nganakombola kupeleka umboni pa yindu yiŵamlambucisyaga Paulo. Pakogopa kuti Fesito jwakwimila cilambo ca Aloma campelece kwa Ayuda, ŵaŵecete kuti: “Mwenye jwa ku Loma ni jwele jutakalamule magambo gangu!” Ni Fesito ŵajanjile kuti: “Cambone . . . kukoko timjawule.”—Masengo 25:11, 12.

Paulo kaneko ŵamkwesisye liboti kwawula najo ku Italiya kukuŵeceta magambo gakwe. Libotilyo palyakasice paulendowu, jwalakwe ŵamalile miyesi jakusisima ali pacilumba ca Malita. Pambesi pakwe paŵayice ku Loma, ŵamasile yaka yiŵili ali mkutama nyumba ja lendi. Atamose kuti asilikali ŵaliji mkumlondela, ndumetume jwamtawuju ŵajendelecele kulalicila pakwamba ya Ucimwene wa Mlungu kwa wosope ŵaŵayikaga kukumlola.

​—Nganiji jityocele pa Masengo 11:22–28:31.