Mlungu Akutenda Cilanga ni Abulahamu

YAKA 350 yapite citendecele Cikumba m’moŵa ga Nowa. Abulahamu (Ibrahimu) nangolo jwakala ŵatamaga mu msinda wakusicila wa Uli, wawaliji m’cilambo cacikumanyika moŵa agano kuti Iraq. Abulahamu ŵakwete cikulupi cekulungwa mnope. Nambo sambano yatendece yakulinga cikulupi cakwe.

Yehofa ŵamsalile Abulahamu kuti atyoce m’cilambo caŵapagwile cila ni kwawula ku cilambo cacilendo ca Kanani. Abulahamu ŵapikanile yeleyi mwangasawusya. Jwalakwe ŵanyakwice ni liŵasa lyakwe lyosope yimpepe ni Sala ŵamkwakwe, soni Loti mwipwa jwakwe. Ali ajesile lutando lwekulungwa, ŵayice ku Kanani kuŵatandite kutama m’matenti. Yehofa mu cilanga ciŵatesile najo Abulahamu ŵaŵecete kuti Abulahamu caciŵa nangolo jwa mtundu wawukulungwa. Maŵasa gosope gapacilambo capasi gacipata upile kutyocela mwa jwalakwejo, soni cilambo ca Kanani ciciŵa ca yisukulu yakwe.

Abulahamu ni Loti yindu yatandite kwajendela cenene mwakuti ŵakwete ngondolo ni ng’ombe syejinji. Mwakulinandiya, Abulahamu ŵamkundile Loti kusagula malo galigose gaŵasacile. Loti ŵasagwile upande wacajila mnope wa ku Lusulo lwa Yolodani, ni ŵatemi mu msinda wa Sodomu. Nambo ŵandu ŵa ku Sodomu ŵaliji ŵayitendo yakusakala, soni ŵakwete ulemwa wekulungwa mnope pameso pa Yehofa.

Yehofa Mlungu kaneko ŵamsimicisye Abulahamu kuti yisukulu yakwe yiciŵa yejinji mnope mpela ndondwa sya kwinani. Abulahamu ŵakulupilile maloŵega. Nambope Sala, ŵamkwakwe ŵakunonyelwa, ŵaliji mkanakole mwanace. Kaneko Abulahamu ali akwete yaka 99, soni ya Sala yili ciŵandika 90, Mlungu ŵamsalile Abulahamu kuti jwalakwe ni Sala cacikola mwanace. Mwakamulana ni maloŵe ga Mlungu, Sala ŵaŵelece mwanace lina lyakwe Isaki. Abulahamu ŵakwete ŵanace ŵane, nambo Jwakulupusya juŵamsasile mu Edeni jula ŵaliji jwakuti caciyika kutyocela mwa Isaki.

Pandaŵiji Loti ni liŵasa lyakwe ŵaliji mkutama mu Sodomu, nambo Loti jwakulupicikaju nganatendaga nawo yakusakala ya ŵandu ŵa mu msindamo. Yehofa paŵaganisisye yakonanga Sodomu, ŵatumisye malayika kuti gakamkalamusye Loti yakonasika kwa Sodomu. Malayikaga gamgombelecesye Loti ni liŵasa lyakwe kuti atile mu msinda wa Sodomu, soni kuti akalola munyuma. Kaneko Mlungu ŵagwisisye moto ni maganga ga sulufule pa Sodomu, soni pa msinda wine wakusakala wa Gomola wakuŵandikana nawo, ni ŵajonasice ŵandu wosope m’misindajo. Loti ni ŵanace ŵakwe ŵaŵili ŵacakongwe ŵakulupwice. Nambo ŵamkwakwe Loti ŵalolite munyuma, mwine ŵaganicisyaga ya yindu yiŵayilesile munyuma. Ligongo lya ungapikanilawu, jwamkongweju ŵawile.

—Nganiji jityocele m’buku ja Genesis, macaputala 11:10–19:38.