2. Ana Tukusosekwa Kulijimba Magambo Pa Yakusawusya Yatukusasimana Nayo?
Kusosekwa kwa Chiwusyochi
Naga kwanga kwa chiwusyochi kuli elo, nikuti mpaka tukombole kunandiya yakusawusya yatukusasimana nayo.
Yakusosekwa Kuyiganichisya
Ligongo chichi mpaka tujile kuti ŵandu atandikasisye yakusawusya m’matala gakuyichisyaga?
Ngasa.
Bungwe jakulola ya umi wa ŵandu (World Health Organization) jasasile kuti pa ŵandu mcheche ŵaliwose, mundu jumo jwatendeledwepo yangasa ali mwanache. Jasasilesoni kuti pa achakongwe ŵatatu ŵaliwose, jumo jwatendeledwe yangasa mwakumputa kapena kumkanganichisya kuti amgone.
Kuwilwa.
Lipoti line lya mu 2018 lya bungwe ja kulola ya umi wa ŵandu (WHO) lyatite “Pachilambo chosope, chiŵandika ŵandu 477,000 ŵawulajidwe m’chaka cha 2016.” Kupwatika pelepa ŵandu chiŵandika 180,000 ŵawulajidwe pangondo m’chakachi.
Yilwele.
Jwakulemba magasini jwine (Fran Smith) jwatite: “Ŵandu ŵakupunda 1 biliyoni akusakwembaga sona. Sona jili chimo mwa yindu msano yayikusatandikasya yilwele yakogoya mnope mpela ulwele wamtima, ulwele wakuwulaga yiŵalo, yilwele ya m’mapapo nambosoni kansa ja m’mapapo.”—National Geographic.
Lusagu.
Dokotala jwine jwatite, “Yindu mpela usawuchi, kwatendela ngasa ŵane ligongo lyakulekangana mtundu, kwawona achakongwe kapena achalume ŵane kuŵa ŵakutuluka soni kutopoledwa m’dela jine, yikusatendekasya kuti ŵandu alajeje mnope nganisyo.”—Jay Watts.
KUTI AMANYILILE YEJINJI
Alolele fidiyo jakuti Ligongo Chichi Mlungu Ŵapanganyisye Chilambo Chapasi? pa jw.org/yao.
Yajikusasala Baibulo
Yakusawusya yejinji pachilambopa yikutendekwa ligongo lya ŵandu.
Yejinji mwa yakusawusyayi yikusatanda ligongo lya maboma ga ngasa. Mabomaga gakutendekasya kuti ŵandu asimaneje ni yakusawusya yejinji.
“Pana ŵandu ŵakusiŵalamulilaga achimjawo mwa ngalwe kapena kuti mwa ngasa.”—JWAKULALICHILA 8:9.
Yakusawusya mpaka yikomboleche kuyinandiya.
Yiwundo ya m’Baibulo yikusakamuchisya kola umi wambone soni kuŵa pamtendele ni achimjetu.
“Mtima wambone ukusapeleka umi wambone ku chilu cha mundu, nambo wiwu ukusawosya mawupa.”—MISYUNGU 14:30.
“Mkutyosye pasikati penu kuŵengana, kukalipa, nipo soni kupya mtima, mkasimtenda njojo kapena kuti yachiwawa kapena kuŵecheta maloŵe gachipongwe, soni paŵeje pangali kusakala kwine kulikose.”—AEFESO 4:31.