11 Alimbichileje Masengo

ANA YELEYI YIKUGOPOLELA CHICHI?

Ŵandu ŵakulimbichila masengo ŵangatenda ulesi. Akusasangalala kamula masengo mwakulipeleka pakusaka kupata yakusosechela yawo ya paumi soni kwakamuchisya ŵane. Akusatenda yeleyi atamose kuti mtundu wa masengogo ŵane ngaŵa mkuwunonyela.

LIGONGO LYAKWE KULI KWAKUSOSEKWA

Mundu jwangalimbichila masengo akusalajilila kupata yakusosechela ya paumi wakwe. Atamose kuti ŵajinji m’chilambochi ngakusalimbichila masengo, kulipeleka pamasengo kukusatukamuchisya.—Jwakulalichila 3:13.

Reyon jwaŵechete kuti, “Nalijiganyisye kuti naga mundu akulimbichila masengo akusaŵa jwakusangalala soni jwakwikutila. Kuŵa jwakwikutila kungamuchisye kuti nonyeleje kamula masengo. Kulimbichila masengo kuchimkamuchisya kuti mkole mbili jambone.”

MFUNDO JA M’BAIBULO: “Masengo gali gose gana malipilo gakwe.”—Misyungu 14:23.

YAKUSOSEKWA KUTENDA

Kuti akole nganisyo syambone pangani ja masengo akusosekwa kuya yindu yakuyichisyayi.

Asangalaleje Pakukombola Kutenda Yindu Chenene. Chinga akutenda yindu yakusukulu kapena masengo gane, alolechesyeje kuti amalisisye masengogo. Alipelecheje pakamula masengo. Pakulinga kamula masengo chenene, alinjejesoni kulola yakusosekwa kongolela. Mwambone, mpaka alinjeje kamula masengo mwachitema. Pakukola lunda lwejinji pamasengo, akusaŵa jwakusangalala mnope.

MFUNDO JA M’BAIBULO: “Ana mkumwona mundu jwakutenda masengo gakwe mwa ufundi? Jwalakwe tachatumichila achayimwene, ngasatumichila ŵandu wamba.”—Misyungu 22:29.

Ŵane Mpaka Yakamuchisyesoni. Ndaŵi syejinji, pamkutenda masengo genu chenene, yikusiyakamuchisya ŵane. Mwambone, naga akusalimbichila pakukamula masengo gawo, ŵandu wosope m’liŵasa akusajigalila chisyasyo chawo.

MFUNDO JA M’BAIBULO: “Kupeleka kukusamtendekasya mundu kuŵa jwakusangalala mnope kulekangana ni kupochela.”—Masengo 20:35.

Akoleje Lung’wanu ni Masengo. M’malo mwakwamba kamula masengo gamtumile pego, mlinjelinjeje kutenda masengo gane ganganamtuma gampaka mkombole kutenda. Yeleyi yichimkamuchisya paumi wenu ngaŵa ligongo lyakuti amtumile nambo msagwile mwasyene kuti mkamule masengogo.—Mateyu 5:41.

MFUNDO JA M’BAIBULO: “Yambone yampaka mtende, yikaŵa yakumkanganichisya, nambo myitende mwakusaka kwenu.”—Filimoni 14.

Atendeje yindu mwangapundanganya. Kamula masengo mwakulimbichila ngakukugopolela kuti gambaga kamula masengo chitetete. Tukusosekwa kutenda yindu mwachikatikati, kamula masengo kaneko ni kupata ndaŵi jakupumulila.

MFUNDO JA M’BAIBULO: “Kupumula panandi kuli kwambone, kulekangana ni kamula masengo mwakulimbichila mnope ni kwamba kulisawusya.”—Jwakulalichila 4:6, NWT.