Ana Yinyama Yikusajawula Kwinani?

Kwanga Kwakutyochela M’Baibulo

Baibulo jikusajiganya kuti payindu yosope yaŵayipanganyisye Mlungu pachilambo chapasi, ŵandu ŵamnonope ni ŵachachijawula kwinani. (Chiwunukuko 14:1, 3) Jemanjaji chachijawula kuti akalamulileje yimpepe ni Yesu mpela mamwenye soni ŵakutaga mbopesi. (Luka 22:28-30; Chiwunukuko 5:9, 10) Nambo ŵandu ŵajinji chachijimuka ku chiwa kuti atame ni umi mpaladayiso pachilambo chapasi mpaka kalakala.—Salimo 37:11, 29.

Baibulo jangasalaga kuti yilango kapena mbwa yichijawula kwinani. Tukusala myoyo ligongo lyakuti yinyama nganiyiŵa yikwanisye kukuya mfundo sya m’Baibulo syampaka siyitendekasye kuŵajilwa ‘kuŵilanjidwa kwawula kwinani.’ (Ahebeli 3:1) Mfundosi sikupwatikapo kulijiganya, kukola chikulupi, nambosoni kupikanila malamusi ga Mlungu. (Mateyu 19:17; Yohane 3:16; 17:3) Myoyo ŵandupe ni ŵaŵapanganyidwe ni chembecheyo chakutama ni umi mpaka kalakala.—Genesesi 2:16, 17; 3:22, 23.

Yakupanganyikwa ya pachilambo chapasi kuti yijawule kwinani, yikusasosekwa kwimuka kaje ku chiwa. (1 Akolinto 15:42) Baibulo jikusasala ŵandu ŵamnono ŵaŵajimwiche ku chiwa. (1 Ayimwene 17:17-24; 2 Ayimwene 4:32-37; 13:20, 21; Luka 7:11-15; 8:41, 42, 49-56; Yohane 11:38-44; Masengo 9:36-42; 20:7-12) Nambope, wosopeŵa ŵaliji ŵandu, ngaŵa yinyama.

Ana yinyama yikwete msimu?

Iyayi. Baibulo jikusasala kuti yinyama soni ŵandu yili yaumi. (Numeli 31:28) Mundu jwandanda Adamu paŵampanganyisye, nganapedwa msimu nambo “jwaŵele jwaumi.” (Genesesi 2:7) Umi wapanganyidwe ni yindu yiŵili, “luwundu lwa pachilambo chapasi” ni “mpweya wa umi.”

Ana umi mpaka uwe?

Elo.Baibulo jikusajiganya kuti umi ukusawaga. (Lefitiko 21:11, ; Esekiele 18:20) Ŵandu soni yinyama payiwile, yikusawujila ku luwundu lwa pachilambo chapasi. (Jwakulalichila 3:19, 20) Kasale kane, mpaka tujile kuti yangasimanikwagasoni.a

Ana yinyama yikusalemwaga?

Iyayi. Mundu kuti alemwe akusasosekwa kuganisya, kukwayidwa, kapena kutenda yineyakwe yakutindana ni mfundo sya Mlungu. Akusasosekwasoni kumanyilila yakusosekwa kutenda pangani ja ndamo syambone, Nambo yinyama nganiyiŵa yikombwele kutenda yeleyi. Pandaŵi josope jele yinyama yikusatama ni umi, yisagamba kutenda yindu mwachipago basi. (2 Petulo 2:12) Kaneko yikusawaga, atamose kuti yangalemwaga.

Ana yili yakuŵajilwa kuyitendela ngasa yinyama?

Iyayi. Mlungu ŵapeleche machili kwa ŵandu gakuti ayiloleleje yinyama nambo nganapeleka ufulu wakuti ayitendeleje yangasa . (Genesesi 1:28; Salimo 8:6-8) Sonitu Mlungu akusasamalila chinyama chilichose kupwatikapo yijuni yamwanamwana. (Yona 4:11; Mateyu 10:29) Jwalakwe jwalamwile ŵakutumichila ŵakwe kuti akayitendelaga yangasa yinyama.—Ekisodo 23:12; Detulonomo 25:4; Misyungu 12:10.

Malemba ga m’Baibulo gagakusasala ya yinyama

Genesisi 1:28: “Mlungu ŵasalile jemanjajo kuti, “Mŵelekane soni mtupe. Mgumbalane pachilambo chosope soni mchigomeche. Mloleleje somba sya m’nyasa, mlolelejesoni yaguluka mwinani nambosoni chaumi chilichose chakwenda pachilambo chapasi.’”

Ngopolelo jakwe: Mlungu jwapele ŵandu machili gakuti ayiloleleje yinyama.

Numeli 31:28: “Pa yindu yachajigale asilikali ŵaŵapite ku ngondowo, mjigale mundu jumo pa ŵandu 500 ŵaliwose, ng’ombe jimo pa ng’ombe 500 silisyose, bulu jumo pa abulu 500 ŵaliwose nambosoni ngondolo jimo pa ngondolo 500 silisyose. Mjigale yindu yeleyi ni kuyipeleka . . . , kuti yiŵe mpela msongo.”

Ngopolelo jakwe: Ŵandu soni yinyama yili yaumi.

Misyungu 12:10: “Mundu jwakulungama akusasamalila umi wa yilangwa yakwe.”

Ngopolelo jakwe: Ŵandu ŵambone akusasamalila chenene yinyama, kupwatikapo yinyama yakusalangaga.

Mateyu 10:29: “Ana paja tujuni tuŵili ngaŵa akusatusumisya ni kalikobili kakutuluka mnope? Nambotu pangali atamose kamo kampaka kagwile pasi Atati ŵenu ni ngamanyilila.”

Ngopolelo jakwe: Mlungu akusasamalilaga yinyama, atamosesoni yijuni yamwanamwana.

a Naga akusaka kumanyilila yejinji, aŵalanje mtwe 6 m’kabuku kakuti Ana Baibulo Jikusajiganya Yatuli?