Ana Baibulo Jikusasala Yamti Uli Pangani ja Kulisalalisya?
Kwanga kwa m’Baibulo
Atamose kuti Baibulo jangalondesya yisyesyene ya nganiji, nambo ngaŵa kuti jikusalekasya kulipoda, kuwala yibangili soni ndolo, kapena kukamulichisya masengo matala gane gakulisalalichisya. Nambope, mmalo mwakulondesya yejinji ya kawoneche ka kusa, Baibulo jikusalimbikasya kulisalalisya ni “yakuwala yangajonasika, yayili kufasa soni kuwusimana mtima.”—1 Petulo 3:3, 4.
Kulisalalisya nganikuŵa kulemwa
Achakongwe ŵakulupichika ŵakusakolanjidwa m’Baibulo ŵalisalalisyaga. Labeka, juŵalombedwe ni mwanache jwa Abulahamu lina lyakwe Isaki, ŵawalaga ndolo jagolide ja pambula, yibangili yagolide nambosoni yindu yine ya mtengo wapenani. Yinduyi ŵapeleche Abulahamu mpela mbaso jwele yaliji yakuti chachiŵa akwegwe ŵakwe. (Genesesi 24:22, 30, 53) Nombe najo Esitele jwakundile kupachidwa “mawuta gakulisalalisya” pakosechela udindo wakwe wakuŵa jwamkongwe jwa mwenye mu Uchimwene wa Pelesiya. (Esitele 2:7, 9, 12) Yakulisalalichisyayi komboleka kuti yapwatikagapo “yakupakalapakala ya mitundu jakulekanganalekangana.”
Yakuwanichisya ya m’Baibulo yikusalandanya yibangili nambosoni ndolo ni yindu yambone. Mwachisyasyo, Baibulo jikusaŵecheta kuti mundu jwalunda jwakupeleka malangiso kwa “mundu jwalunda . . . Gakusaŵa mpela ndolo syagolide.” (Misyungu 25:12) Nambosoni, Mlungu jwalandanyisye yaŵawutendelaga mtundu wa Ayisalayeli ni jwamlume jwakusiŵasalalisya ŵamkwakwe ni yibangili, yuma ya mlukosi, nambosoni ndolo. Yeleyi yasalalisye mnope mtunduwo mwamti waliji “wakunonyelesya.”—Esekiyele 16:11-13.
Nganisyo syakulemwecheka pangani ja Kulisalalisya
Nganisyo syakulemwecheka: Pa lilemba lya 1 Petulo 3:3, Baibulo jikusalekasya “kutiŵa wumbo kapena kuwala yakulisalalisya yagolide.”
Yisyesyene yakwe: Nganiji jikulosya kuti Baibulo jikusalimbikasya mnope kusalala kwa mkati pakulandanya ni kawoneche kambone ka kusa. (1 Petulo 3:3-6) Panasoni malemba gane ga m’Baibulo gagakusalosya kuti chakusosekwa mnope chili kawoneche ka mkati ngaŵaga ka kusa.—1 Samuyele 16:7; Misyungu 11:22; 31:30; 1 Timoteyo 2:9, 10.
Nganisyo syakulemwecheka: Yajwatesile Mwenye jwamkongwe Yesebele jwaŵaliji jwakusakala “pakulipaka meso gakwe yakulisalalichisya yepiliwu,” uli umboni wakuti kulipoda kuli kulemwa.—2 Ayimwene 9:30.
Yisyesyene yakwe: Yehofa ŵamwuleje Yesebele ligongo lya yindu yakusakala yajwatesile ngaŵa ligongo lyakuti jwalisalalisye.—2 Ayimwene 9:7, 22, 36, 37.