YAKUSALIWUSYAGA ŴACHINYAMATA
Ligongo Chichi Ngusosekwa Kupopela?
Ŵakuwungunya ŵane ŵapatile kuti ku America pa ŵachinyamata 100 ŵaliwose, ŵachinyamata 80 akusapopela. Pa ŵachinyamata 80 ŵeleŵa, 40 ni ŵakusapopela lisiku lililyose. Mwamti ŵane akusaliwusya kuti, ‘Ana lipopelo mpaka ligambe kungamuchisyape kuŵa jwakusangalala kapena panasoni umbone wine?’
Ana lipopelo ni chichi?
Lipopelo lili kuŵechetana ni Mlungu juŵapanganyisye yindu yosope. Agambe kuganisya, Yehofa ali jwapenani mnope kumpunda jwalijose. Nambope atamose yili myoyo, “Mlungu nganaŵa kose pakutalika ni jwalijose mwa jwetuwe.” (Masengo 17:27) Mlungu kupitila m’Baibulo akutusalila kuti, “Mwaŵandichile Mlungu, nipo Ŵalakwe tachimŵandichila jemanja.”—Yakobo 4:8.
Ana mpaka amŵandichile chamtuli Mlungu?
Litala limo lili kupopela. Lyeleli lili litala lyatukusaŵechetana ni Mlungu.
Litala lyaŵili lili kulijiganya Baibulo. Lyeleli lilisoni litala line lyele Mlungu “akusaŵechetana” ni m’weji.
Pakuŵechetana ni Mlungu mwakupopela soni kulijiganya Baibulo, yichakamuchisya kuti aŵe paunasi wambone ni jwalakwe.
“Kuŵechetana ni Yehofa jwali Jwapenani mnope pa yakupanganyidwa yosope, uli upile wekulungwa watukwete.”—Jeremy.
“Kumsalila Yehofa ya mumtima kupitila mwipopelo, yikusangamuchisya kuliwona kuti ndili paujakwe ni jwalakwe.”—Miranda.
Ana Mlungu akusatupikana patukupopela?
Atamose kuti tukusakulupilila Mlungu soni tukusapopela kwa jwalakwe, nambope yikusaŵa yakusawusya kukulupilila kuti Mlungu akusapikana mapopelo getu. Mwakulekangana ni yeleyi, Baibulo jikusasala kuti Yehofa ali ‘Jwakupikana lipopelo.’ (Salimo 65:2) Jikusatusalilasoni kuti ‘tutuleje pa jwakwejo yidandawulo yetu yosope.’ Tutendeje yeleyi ligongo lyakuti jwalakwejo “akusatusamalila.”—1 Petulo 5:7.
Yakusosekwa kuyiganichisya: Ana akusapata ndaŵi jakuŵechetana ni mjawo jwapamtima? Mpaka atendesoni yakulandanayo ni Mlungu. Apopeleje ndaŵi syosope soni akamulichisyeje masengo lina lyakwe pakupopela. (Salimo 86:5-7; 88:9) Kusala yisyene Baibulo jikusatulimbikasya kuti ‘tupopeleje mwangalechesya.’—1 Atesalonika 5:17.
“Pangupolela ngusaŵaga ndili mkuŵechetana ni Atati ŵangu ŵakwinani ŵangusinasalilaga chilichose cha mu mtima mwangu.”—Moises.
“Ngusinamsalila Yehofa ya mumtima mwangu mpela mwangusatendela pakuŵechetana ni mama kapena mjangu jwapamtima.”—Karen.
Ana yindu yapi yangusosekwa kusala pangupopela?
Baibulo jikusasala kuti, “Pa ndaŵi jimkupopela mumŵendeje Mlungu yindu yayikumsoŵa, nipo ndaŵi syosope myiŵendeje yindu yeleyi ni mitima jakutogolela.”—Afilipi 4:6.
Ana yeleyi yikugopolela kuti mpaka tumsalile Mlungu yakusawusya yetu? Elo. Baibulo jikusatusalila kuti, ‘Mwatulile Ambuje . . . yakudandawula yenu ni Jwalakwe tachimchenjela.’—Salimo 55:22.
Pakupopela kwa Mlungu mpaka amsalile yejinji ngaŵaga yakusawusya yawope. Jwamkongwe jwine lina lyakwe Chantelle jwasasile kuti, “Kwambaga kumŵenda Yehofa kuti angamuchisye nganiyiŵa yilosisye kuti ndili paunasi wambone ni jwalakwe. Ngusayiwona kuti kuyamichila kuŵeje pamalo gandanda soni uyisaleje yindu yawukuyamichilayo atamose yili yejinji.”
Yakusosekwa kuyiganichisya: Ana yindu yapi yaŵatendele Mlungu yakusosekwa kuyamichila? Ana mpaka aganichisye yindu yitatu yakusosekwa kumyamichila Yehofa lelo?
“Mpaka tumyamichile Yehofa atamose patuliweni liluŵa lyakusalala.”—Anita.
“Mpaka amyamichile Yehofa pakuganichisya yindu yayikusiyasangalasya m’chilengedwe kapena lilemba line lyakwe lyakusalinonyela mnope.”—Brian.