Ana Ŵani Ŵakusajawula Kwinani?
Kwanga kwakutyochela m’Baibulo
Mlungu akusasagula Aklistu ŵamnono ŵakulupichika, ŵele pawile, akusiŵajimusya kuti akatame ni umi kwinani. (1 Petulo.1:3, 4) Nambo Aklistuŵa pasagulidwe, akusasosekwa kupitilisyape kuŵa ŵakulupichika soni kola ndamo syambone kuti akajasa upile wawo wakuja kutama ni umi kwinani.—Aefeso 5:5; Afilipi 3:12-14.
Ana ŵandu ŵakwawula kwinani ŵeleŵa chachitendagako chichi?
Chachitumichilaga yimpepe ni Yesu mpela mayimwene soni ŵakutaga mbopesi kwa yaka 1,000. (Chiwunukuko 5:9, 10; 20:6) Jemanjaji chachipanganya “kwinani kwa sambano,” kapena kuti boma ja kwinani, jajichilamulilaga “chilambo chapasi chasambano,” kapena kuti ŵandu ŵachachitama pachilambo chapasi. Mayimwenega gachikamuchisya ŵandu kuti aŵe ŵakulungama, mpela mwaŵasachilaga Mlungu pandanda.—Yesaya 65:17; 2 Petulo 3:13.
Ana ŵandu ŵalingwa ŵachachijimuka kwawula kwinani?
Baibulo jikusalosya kuti ŵandu 144,000 ni ŵachachijimuka kuti akatame ni umi kwinani. (Chiwunukuko 7:4) Lilemba lya Chiwunukuko 14:1-3, likusasala kuti ndumetume Yohane ŵam’weni “Mwanache Jwangondolo ali ajimi Petumbi lya Siyoni. Pampepe ni jwalakwejo ŵapali ŵandu 144,000.” Yesu juŵajimwiche ku ŵawe akwimila, “Mwanache Jwangondolo”. (Yohane 1:29; 1 Petulo 1:19) ‘Litumbi lya Siyoni’ likwimila udindo wapenani wa Yesu ni ŵandu 144,000 ŵachachilamulila yimpepe ni jwalakwe kwinani.—Salimo 2:6; Ahebeli 12:22.
Ŵandu ‘ŵakuŵilanjidwa, soni ŵakusagulidwa’ kuti akalamulile yimpepe ni Klistu mu Uchimwene akusakolanjidwa kuti “kakuga ka ngondolo.” (Chiwunukuko 17:14; Luka 12:32 NWT) Yeleyi yikulosya kuti jemanjaji apali ŵamnono pakulandanya ni ŵangondolo sine.—Yohane 10:16.
Nganisyo syakulemwecheka pakwamba ŵandu ŵakusajawula kwinani
Nganisyo syakulemwecheka: Ŵandu wosope ŵambone akusajawula kwinani.
Yisyesyene yakwe: Mlungu ŵasasile kuti ŵandu ŵajinji ŵambone tachitama pachilambo chapasi kwangamala.—Salimo 37:11, 29, 34.
Yesu ŵatite: “Pangali mundu jumo juŵakwesile kwawula kwinani.” (Yohane 3:13) Pelepatu jwalosisye kuti ŵandu ŵambone ŵaŵawile jwalakwe mkanayiche, mpela Abulahamu, Mose, Yobu, soni Daudi, nganajawula kwinani. (Masengo 2:29, 34) Mmalo mwakwe, jemanjaji ŵakwete chikulupi chakuti pachachijimukapo chachitamaga pachilambo chapasi.—Yobu 14:13-15.
Kwimuka ni kuja kutama kwinani kukusakolanjidwa kuti ‘kwimuka kwandanda.’ (Chiwunukuko 20:6) Yeleyi yikulosya kuti pachiŵasoni kwimuka kwine. Kweleku kuchiŵa kwimuka kwa ŵandu ŵachachitama pachilambo chapasi.
Baibulo jikusajiganya kuti mu ulamusi wa Mlungu, “ngasipapagwa chiwa.” (Chiwunukuko 21:3, 4) Yeleyi yichitendekwa pachilambo chapasipe, ligongo lyakuti kwinani kwangali chiwa.
Nganisyo syakulemwecheka: Mundu jwalijose akusasagula jika kuti chakatame kwinani kapena pachilambo chapasi.
Yisyesyene yakwe: Mlungu ni jwakusasagula Aklistu ŵakulupichika ŵachakapochele mbote jakuja kutama kwinani. (Afilipi 3:14) Mundu nganaŵa asagwile jika kuti akatame kwinani kapena pachilambo chapasi pakujigalila yakumbila yakwe.—Mateyu 20:20-23.
Nganisyo syakulemwecheka: Ŵandu ŵachachitama pachilambo chapasi ali ŵakutuluka, ŵakuti ngakuŵajilwa kwawula kwinani.
Yisyesyene yakwe: Ŵandu ŵachachitama ni umi wangamala pachilambo chapasi akusiŵakolanga kuti “ŵandu ŵangu,” soni “ŵandu ŵangu ŵakusagulidwa.” (Yesaya 65:21-23) Jemanjanji chachikola upile wakukwanilisya chakulinga cha Mlungu chaŵakwete pa ŵandu kundanda. Chakulinga chelechi chaliji chakuti ŵandu atame ni umi wamlama m’paladaiso pachilambo chapasi.—Genesesi 1:28; Salimo 115:16; Yesaya 45:18.
Nganisyo syakulemwecheka: Nambala ja 144,000 ja ŵandu ŵakwasala pa Chiwunukuko nganijiŵa jisyesyene, jili jakuwanichisya.
Yisyesyene yakwe: Atamose kuti buku ja Chiwunukuko jikusasala manambala gakuwanichisya, nambo gane mwa manambalaga gali gasyesyene. Mwachisyasyo, jikusasala ya “mena ga ŵandumetume likumi ni ŵaŵili ŵa Mwanache Jwangondolo.” (Chiwunukuko 21:14) Kwende tulole umboni wakulosya kuti nambala ja 144,000 jili jisyene.
Chiwunukuko 7:4 chikusasala kuti “chiŵalanjilo cha ŵakulembedwa chimanyisyo pawusyo syawo [kapena kuti chakwasimichisya kuti chakatame kwinani] chakwanile 144,000.” Kaneko mu ndime syakusogolo kwa lilembali akusasala ya gulu jine kuti “likuga lya ŵandu ŵangaŵalanjika.” Ŵandu ŵa mu likuga lyangaŵalanjikali nombenawo Mlungu chachakulupusya. (Chiwunukuko 7:9, 10) Yikaŵe kuti nambala ja 144,000 jili jakuwanichisya, yikaliji yakusawusya kulekanganya magulu gaŵiliga.a
Kupwatika pelepa, Baibulo jikusasala kuti ŵandu ŵa 144,000 “ni ŵiŵawombolegwe sikati ja ŵandu ŵane wosope, kuti aŵe ŵandanda.” (Chiwunukuko 14:4) Maloŵe gakuti “ŵandanda” gakulosya kuti kali kagulu ka ŵandu ŵamnono ŵakusagulidwa. Yeleyi yikulosya kuti jemanjaji chachiŵa mayimwene kwinani pampepe ni Klistu. Chachilamuliga ŵandu ŵachachitama pachilambo chapasi ŵele chiŵalanjilo chawo ngachikumanyika.—Chiwunukuko 5:10.
a Pulofesa jwine lina lyakwe Robert L. Thomas jwalembile yakwamba nambala ja 144,000 jakujikusala pa Chiwunukuko 7:4. Jwalakwe jwatite, “Nambala jeleji jili jisyesyene pakuwanichisya ni chiŵalanjilo chakuchisala pa Chiwunukuko 7:9 chele ngachikumanyika winji wakwe. Yikaŵe kuti nambala ja 144,000 nganijiŵa jisyesyene, ni kuti manambala gosope gakusagasala m’bukuji gakalijisoni gakuwanichisya.”—Chiwunukuko 1-7: Buku jakuti An Exegetical Commentary, peji 474.