Ligongo Chichi Mbopesi ja Yesu Jili ‘Jakwawombola Ŵandu Ŵajinji’?
Kwanga kwakutyochela m’Baibulo
Kupitila mu mbopesi ja Yesu, Mlungu akusiŵakulupusya ŵandu ku ulemwa ni chiwa. Baibulo jikusasala kuti miyasi ja Yesu jaliji mpela mtengo wakuwombola. (Aefeso 1:7; 1 Petulo 1:18, 19) Ni ligongo lyakwe Yesu jwasasile kuti jwayiche “ni kupeleka umi wakwe kuti ŵawombole ŵandu ŵajinji.”—Mateyu 20:28, Buku Jeswela.
Ligongo chichi pasosekwaga ‘kuwombola ŵandu ŵajinji’?
Mlungu ŵampanganyisye mundu jwandanda, Adamu, ali jwamlama. Jwakwete upile wakutama ni umi mpaka kalakala.Nambo jwalakwe jwasagwile kuti akampikanila Mlungu. (Genesesi 3:17-19) Paŵatandite kola ŵanache, jwalakwe jwajambuchisye ŵanachewo ulemwa. (Aloma 5:12) Pa ligongo lyeleli, Baibulo jikusasala kuti Adamu ‘jwalisumisye’ jika ni ŵanache ŵakwe kuti aŵe achikapolo wa ulemwa ni chiwa. (Aloma 7:14) Ligongo lyakuti wosope ali ŵangali umlama, pangali jwakakombwele kusuma chaŵajasile Adamu.—Salimo 49:7, 8.
Mlungu chamkamwile chanasa ligongo lyakuti ŵanache ŵa Adamu ŵaliji ŵangali sogolo jambone. (Yohane 3:16) Nambope ligongo lyakuti malamusi ga Mlungu gali gachilungamo, jwalakwe nganagamba kulola kapena kulechelela ulemwawo pamagongo gangapikanika. (Salimo 89:14; Aloma 3:23-26) Mlungu akusiŵanonyela ŵandu. Myoyo jwapanganyisye litala lyambone ni chakulinga chakuti ngaŵa kuti agambe kwakululuchila ŵanachewo ulemwawo nambosoni kuti umale. (Aloma 5:6-8 Kweleku kwaliji kwawombola.
Ana kuwombola kukusakamula masengo chamtuli?
M’Baibulo, maloŵe gakuti “kuwombola” gakusapwatikapo mbali sitatu.
Kuli kulipila.—Numeli 3:46, 47.
Kuli kugopola.—Ekisodo 21:30.
Kuli kupeleka mtengo wakulandana ndendende ni chindu chakusaka kuwombolacho.a
Kwende tulole kuti ana yeleyi yikukamulana chamtuli ni mbopesi ja Yesu Klistu.
Kulipila. Baibulo jikusasala kuti Aklistu ‘ŵasumidwe ni mtengo wapenani.’ (1 Akolinto 6:20; 7:23) Mtengo wapenaniwu uli miyasi ja Yesu jele jwalakwe “ŵamwombolele [ŵamsumile] Mlungu ŵandu ŵa ngosyo syosope, ŵa chiŵecheto chilichose, ni mtundu uliwose.”—Chiwunukuko 5:8, 9.
Kugopola. Mbopesi ja Yesu ‘jatugopwele’ ku ulemwa.—1 Akolinto 1:30; Akolose 1:14; Ahebeli 9:15.
Mtengo wakulandana ndendende. Mbopesi ja Yesu jaliji jakulandana ndendende ni umi wamlama waŵajasile Adamu. (1 Akolinto 15:21, 22, 45, 46) Baibulo jikusasala kuti, “Pakuti mpela muyaŵelele kuti ŵandu ŵajinji ŵaliji ŵakulemwa, ligongo lya ungapikanila wa mundu jumo jula [Adamu], myoyo soni ŵandu akusasimanikwa kuti ali ŵakulungama, ligongo lyakupikanila kwa mundu jwine soni jumpepe [Yesu Klistu].” (Aloma 5:19) Yeleyi yikulosya chenene kuti chiwa cha mundu jumo mpaka chiwombole yakulemwa ya ŵandu ŵajinji. Nambope, mbopesi ja Yesu ‘jikusijawombola’ wosope ŵakusatenda yakomboleka kuti apindule ni mbopesiji.—1 Timoteo 2:5, 6.
a M’baibulo, maloŵe gaŵagagopolele kuti ‘kuwombola’ gakusasala ya malipilo kapena chine chakwe chakusapeleka pakusaka kusuma chindu. Mwachisyasyo, maloŵe ga Chihebeli gakuti ka·phar gakusagopolela ”kuwunichila” Ndaŵi syejinji yikusagopolela kuwunichila ulemwa. (Salimo 65:3) Maloŵe gane gakulandana ni gelega gali gakuti koʹpher. Maloŵega gakusagopolela kulipila kuti uwombole chine chakwe. (Ekisodo 21:30) Mwakulandana ni yeleyi, maloŵe ga Chigiliki gakuti lyʹtron, gakusagopolelasoni ‘kuwombola.’ (Mateyu 20:28, The New Testament in Modern Speech jakulembedwa ni R. F. Weymouth) Ŵakulemba ŵa Chigiliki ŵakamulichisye masengo liloŵeli pakusala ya malipilo gakusapeleka kuti mundu jwaŵakamulidwe kungondo kapena kapolo, agopoledwe.