Ana Yili Yakusosekwa Kuti Mundu Aŵeje mu Dini Jakutenda Yindu Mwakamulana?
Kwanga kwakutyochela m’Baibulo
Elo, ligongo lyakuti Mlungu akusasaka kuti ŵandu asonganeje pampepe ni chakulinga chakuti amlambileje jwalakwe. Baibulo jikusasala kuti, “Kwende tukumbuchilaneje jwine ni mjakwe, ni kamuchisyana jwine ni mjakwe pakulosya kunonyelana ni kutenda yambone. Kwende tukaleka ndamo syetu syakusongana pampepe.”—Ahebeli 10:24, 25.
Maloŵe gaŵaŵechete Yesu, galosisye kuti ŵakulijiganya ŵakwe chachiŵa gulu jakutenda yindu mwakamulana. Jwalakwe jwatite, “Naga mkunonyelana jwine ni mjakwe, pelepo ŵandu wosope tachimanyilila kuti jemanja mli ŵakulijiganya ŵangu.” (Yohane 13:35) Litala limo lyakusosekwa mnope lyakulosya kuti akusanonyelana, lili lyakuti ŵakumkuya ŵa Yesuŵa ŵaliji ŵakuti chachisonganaga pampepe ni ŵakulupilila achimjawo. Yaliji yakuti jemanjaji tachipanganya mipingo jele ŵandu ŵakwe chachisonganaga mwakutamilichika pakumlambila Mlungu. (1 Akolinto 16:19) Ŵandu ŵa mipingo jeleji tachiŵa ŵakunonyelana mnope pachilambo chosope chapasi.—1 Petulo 2:17.
Kwamba kuŵa mu dinipe nganikuŵa kwakwanila
Baibulo jikusasala kuti ŵandu akusosekwa kusongana pampepe ni chakulinga chakuti amlambileje Mlungu. Nambope kwamba kuŵa mu dinipe nganikuŵa kwakwanila kuti mundujo amsangalasye Mlungu. Kuti dini jiŵe jakwitichika pameso pa Mlungu, jikusosekwa kwakamuchisyaga ŵandu kuti atendeje yakumsangalasya Mlungu lisiku lililyose. Mwachisyasyo, Baibulo jikusasala kuti, “Dini jisyesyene jajili jangali ulemwa pameso pa Mlungu Atati, ni aji: kwakamuchisya ŵanache ŵa masije ni achakongwe ŵawililwe myisawusyo yawo, nambosoni kuligosa jika ku yangalumbana yosope ya mchilambo chapasi.”—Yakobo 1:27.