Ana Mlungu Apali?

Kwanga kwakutyochela m’Baibulo

Elo. Baibulo jikusapeleka magongo gakupikanika chenene gakulosya kuti Mlungu apali. Soni jikusatulimbikasya kuti tumkulupilileje mnope Mlungujo, ngaŵaga kwamba kulupilila yiliyose yakutusalila achimlongola ŵa dini. Baibulo jikusati tukamulichisyeje masengo “lunda lwakuganisya” soni “umanyilisi.” (Aloma 12:1; 1 Yohane 5:​20, NWT) Kwende tukamulichisye masengo lunda lwakuganisya patukambilana mfundo syakuyichisyasi kutyochela m’Baibulo:

• Yindu muchilengedwemu, chilichose chili pamangwakwe. Konjechesya pelepa, muchilengedwemu mwanasoni yindu yaumi. Yeleyi yikulosya kuti pana jwine juŵayipanganyisye. Baibulo jikusasala kuti, “Nyumba jilijose jikusataŵidwa ni mundu jwamtijwamti nambo ŵiŵapanganyisye yosope ni Mlungu.” (Ahebeli 3:4) Atamose kuti maloŵega gali gangasawusya kugapikanichisya, nambo ŵandu ŵajinji ŵalijiganye akusawona kuti maloŵega gali gamachili.a

• Mwachipago, ŵanduwe tukusasachilila kumanyilila chakulinga cha umi. Kusachililaku kukusapundaga kusachilila kwakusakola mundu pa yakulya. Baibulo jikusasala kuti kusachilila kweleku kuli mbali jimo ja yakusosechela ya usimu. Yeleyi yikusapwatikaposoni kusachilila kummanyilila soni kumtumichila Mlungu. (Mateyu 5:3; Chiwunukuko 4:​11) Kumanyilila yakusosechela yetu ya usimu kukusatukamuchisya kumanyilila kuti Mlungu apali, nambosoni kuti jwalakwe ali mkupanganya jwachinonyelo jwakusasaka kuti tuŵe najo pa unasi.​—Mateyu 4:4.

• Yakulochesya yayikusasimanikwa m’Baibulo yalembedwe kalakala mnope. Nambo yikukwanilichikwa nditu mpela muyalembedwele. Kwanilichikwa kwa yakulochesyayi kukusapeleka umboni wakuti pana jwine jwakwe jwali jwamachili kupunda jwalijose.​—2 Petulo 1:​21.

• 

  Ŵandu ŵaŵalembile Baibulo ŵakwete umanyilisi wa yindu yakwayana ni sayansi kwapunda ŵandu ŵane ŵa mundaŵijo. Mwachisyasyo kalakala ŵandu ŵajinji ŵakulupililaga kuti chilambo chapasichi chili pa mgongo wa yinyama yine mpela ndembo, liguluŵe kapena ng’ombe. Mwakulekangana ni yeleyi, Baibulo jikusasala kuti Mlungu “ŵaŵisile kwiwunde [“chilambo chapasi,” NWT], pa malo pipaliji pangali chilichose.” (Yobu 26:7) Myoyo Baibulo jikusasala mwakupikanika chenene kuti chilambochi chili “chakusyungulila.” Kapena chakuwoneka mpela “mpila.” (Yesaya 40:22, maloŵe gamwiŵanda, Douay Version) Ŵandu ŵajinji ayikene pakupikanichisya kuti kasale kakupikanika chenene ka m’Baibuloka, kakusalosya kuti ŵakulemba Baibuloŵa ŵalembaga utenga wakutyochela kwa Mlungu.

• Baibulo jikusatukamuchisya kupata kwanga kwa yiwusyo yejinji yakusawusya. Yiwusyo yakwe yikusaŵa yakuti naga ngapata kwanga kwakwe, mundujo mpaka aleche kumkulupilila Mlungu. Mwachisyasyo, naga Mlungu akusatunonyela soni ali jwamachiligosope, ligongo chichi pachilambopa pakutendekwa yindu yakusakala soni ŵandu akulaga? Ligongo chichi dini ndaŵi syejinji sikusalimbikasya yindu yakusakala mmalo mwa yindu yambone?​—Tito 1:​16.