Ana ŵa Mboni sya Yehofa Ŵachenjile Yindu Yine m’Baibulo Kuti Yikamulane ni Yakusakulupilila?
Iyayi nganituchenga. Mmalomwakwe naga tuyikopochele kuti yindu yine yatwakulupililaga ngayikukamulana ni yajikusala Baibulo, tukusachenga yatwakulupililaga pandanda.
Munyumamu mkanitutande kuwandisya Baibulo ja Chilambo Chasambano ja chisungu mchaka cha 1950, twawungunyaga kaje yajikusasala Baibulo. Twakamulichisyaga masengo mabaibulo gakulekanganalekangana pakusaka kulolechesya kuti yatukusakulupilila yikukamulana ni Baibulo. Kwende tukambilane yisyasyo yakuŵalanjika ya yindu yatuŵele tuli mkukulupilila kwa ndaŵi jelewu. Patukukambilana yisyasyoyi alole naga yikukamulana ni yajikusasala Baibulo.
Yatukusakulupilila: Mwa Mlungu jumo mwangali milungu jitatu. Sanja ja Mlonda ja Julayi 1882 jele pandaŵijo jamanyikaga kuti Zion’s Watch Tower jasasile kuti. “Ŵandu ŵakusaŵalanga magasini getu akusamanyilila kuti tukusakulupilila Yehofa, Yesu soni Msimu weswela. Akusamanyililasoni kuti ngatukusakulupilila yakuti mwa Mlungu jumo mwana milungu jitatu ligongo Baibulo jangasala yeleyi.”
Yajikusasala Baibulo: “Yehofa Mlungu jwetu ali Yehofa jumope basi.” (Detulonomo 6:4, Baibulo ja Chilambo Chasambano) “Uwe tukwete Mlungu jumpepe, jwele jwali atati. Jwalakwejo jwapanganyisye yindu yosope, soni uwe tukusakulupilila kuti pana Ambuje ŵampepe, Yesu Klistu, kupitila mwa jwalakwejo yindu yosope yapanganyidwe soni twapegwile umi.” (1 Akolinto 8:6, Buku Jeswela) Yesu msyene jwatite: “Atatiwo ali ŵakulungwa kumbunda unejo.”—Yohane 14:28, Baibulo ja Chilambo Chasambano.
Yatukusakulupilila: Kwangali malo gele ŵandu akusajochedwa ni moto kwangamala. Magasini ga Sanja ja Mlonda ja Juni 1882 jakwete mtwe wawatyochele pa lilemba lya Aloma 6:23 m’Baibulo ja King James Version. Magasiniji jakwete mtwe wakuti. “Malipilo ga Ulemwa Gali Chiwa” mwamti jasasile kuti: “Yeleyitu yili yangasawusya kupikanichisya. Nambo chakusimonjesya chili chakuti ŵandu ŵajinji ŵakusajitichisya kuti Baibulo gali Maloŵe ga Mlungu akusasisyana ni mfundo jakupikanika chenene jajili pa lilembali. Jemanjaji akusakulupililape kuti Baibulo jikusasala kuti malipilo ga ulemwa gali kupochela chilango cha moto ku Gehena.”
Yajikusasala Baibulo: “Mundu jwakulemwa ni juchachiwa.” (Esekiyele 18:4, 20, Buku Jeswela) Chilango chakumalisya chachachipochela ŵandu ŵangakusampikanila Mlungu chichiŵa “konanjidwa kwampaka kalakala” ngaŵaga kupochela chilango cha moto wa ku Gehena.”—2 Atesalonika 1:9, Buku Jeswela.
Yatukusakulupilila: Uchimwene wa Mlungu jili boma jisyesyene ngaŵa mwakupikanila mundu mumtima. Pakwamba ya Uchimwene wa Mlungu Sanja ja Mlonda ja Disemba 1881 jele pandaŵijo jamanyikaga kuti Zion’s Watch Tower jasasile kuti: “Uchimwenewu pachachiwutamilikasya, uchityosya mauchimwene gosope gagali pachilambopa.”
Yajikusasala Baibulo: “Mu ndaŵi ja ayimwene ŵelewo, Mlungu jwakwinani tachitamilisya uchimwene wele ngisiwujonasika. Tiwuchikasanya ni kugamasya ma uchimwene gane gosopego, nipo uchimwene welewo pewo tiwuchiŵa mpaka kalakala.”—Daniyele 2:44, Buku Jeswela.
Ana ŵa Mboni sya Yehofa akusadalila Baibulo ja Chilambo Chasambano pakusaka kusimichisya kuti yakusakulupilila yikusatyochela m’Baibulo?
Iyayi. Yili myoyo ligongo lyakuti tukupitilisyape kukamulichisya masengo mabaibulo gakulekanganalekangana pamasengo getu gakulalichila. Atamose kuti patukwajiganya ŵandu Baibulo tukusitwapa Baibuloji mwangasalila mtengo wakwe, tukusajiganyasoni ŵandu ŵakusasaka kuti tukamulichisye masengo ma Baibulo gane.