Ana Mbiya Syakwendechesya Masengo ga ŵa Mboni sya Yehofa Sikusatyochela Kwapi?

Masengo ga pachilambo chosope, gakusajenda chenene ni yakupeleka yakusapeleka ŵa Mboni sya Yehofa mwakusaka kwawo.a Mabokosi ga yakupeleka gakusasimanikwa m’malo gakutendela misongano jetu soni matala gane gakupelechela mbiyasi mpaka agapate pa webusayiti jetu. Pa webusayitipa mpaka asagule litala lyakusaka kupelechela yakupeleka ya pachilambo chosope.

Ŵa Mboni sya Yehofa ŵangajembecheyaga kuti ŵandu apelecheje chalikumi kapena kwalamula ŵane kuti apelecheje mbiya mwamti. (2 Akolinto 9:7) Konjechesya pelepa ngatukusalipilikasya ŵandu kapena kulokotela mbiya pa misongano jetu, mundu pakubatisidwa, pamalilo, paukwati soni pa yakutendekwa yine. Ngatukusapatasoni mbiya kupitila mu kusumisya yakulya, kusumisya yindu kapena kuŵenda kwa ŵane. Ŵandu ŵakusapeleka yakupeleka yawo ngatukusitwasala mena gawo. (Mateyu 6:2-4) Mabuku getu soni pa webusayiti ngatukusaŵikagapo yindu yakusumisya ni chakulinga chakuti tupateje mbiya.

Pamisongano ja Mboni sya Yehofa, akusasala mwasijendele mbiya sya mwesi uliwose. Mpingo uliwose ukusalolechesya mbiya syasikupelechedwa ni chakulinga chakuti alole naga sikukamula masengo gakwe chenene.—2 Akolinto 8:20, 21.

Matala Gakupelechela Mbiya

• Kuponya mmabokosi: Mpaka apeleche mbiya kapena cheke mmabokosi gagakusasimanikwa pa Nyumba sya Uchimwene, mmalo ga misongano, kapena mmalo galigose gatukusatendela misongano.

• Kupitila pa webusayiti: M’yilambo yejinji akusakamulichisya masengo litala lya “Donate to Jehovah’s Witnesses” pakusaka kupeleka yakupeleka yawo. Jemanjaji akusapeleka yakupelekayi kupitila ku banki soni matala gane ga payipangiso yamakono.b Ŵa Mboni sya Yehofa ŵane akusasagula kuti “aŵicheje pajika kandu” kuti apelecheje yakupeleka yawo mwakutamilichika.—1 Akolinto 16:2.

  

• Kulinganya chile yachapeleche: Matala gane ga yakupeleka gakusasaka kosechela mkanipaŵe. Yeleyi mpaka yakamuchisye kuti asagule chenene pa yindu yakusaka kuti yikamuchisye chilambo chawo. Ŵandu ŵajinji ayiweni kuti kupeleka yakupeleka yawo kupitila pa litala lyeleli kuli kwakamuchisya mnope. Mpaka atende yele ali chiŵela umi ni kusagulila chile ŵachachipochela yinduyo pachachiwa. Naga akusaka kumanyilila yejinji, awusye ku nyambi ja mchilambo chawo ja Mboni sya Yehofa mwampaka apelechele yakupeleka yawo yayikupwatikapo:

  • maakauti ga kubanki

  • inshulansi soni peshoni

  • malo kapena nyumba

  • masheya

  • chipanje chamasije

Kuti amanyilile yejinji pa matala gakupelechela gagakusimanikwa mu dela jawo alole palembile kuti “Donate to Jehovah’s Witnesses.”