Ana Lijiganyo lya Baibulo Lyakusatendesya Ŵa Mboni sya Yehofa Likusatendekwa Mwamtuli?
Ŵa Mboni sya Yehofa mpaka ŵakamuchisye kupikanichisya yajikusajiganyaga Baibulo. Kajiganye ketu mpaka kakamuchisye kuti:
Aŵeje ŵakusangalala
Aŵe mjakwe jwa Mlungu
Amanyilile yajikusasala Baibulo pakwamba ya msogolo
Mu mbali aji
Naga ngutanda kulijiganya, nikuti chachinganganichisya kuti mbe jwa Mboni sya Yehofa?
Naga munyumamu nalijiganyaga Baibulo ni ŵa Mboni sya Yehofa, ana yili yakomboleka kutandilasoni?
Ana lijiganyo lya Baibulo likusatendekwa mwamtuli?
Jwakwiganya chachakamuchisya kuti ajipikanichisye chenene Baibulo pakuya mitwe jakwe. Mwakamulichisya masengo buku ja Asangalaleje Mpaka Kalakala, mpaka yakamuchisye kumanyilila yajikusajiganya Baibulo soni mwampaka atendele kuti yakamuchisye. Kuti amanyilile yejinji alolele fidiyo aji.
Ana ngusosekwa kulipila kuti nalijiganye?
Iyayi. Tukusakuya yaŵaŵechete Yesu kwa ŵakulijiganya ŵakwe paŵatite, “Mwapochele mwalulele, myoyo kapelecheni soni mwalulele.” (Mateyu 10:8) Ŵakusajiganyawo ŵangalipidwaga. Nambosoni Baibulo sonibuku ja Asangalaleje Mpaka Kalakala, yangali mtengo.
Ana kulijiganyaku kukusatendekwa kwa ndaŵi jelewu wuli?
Bukuji jikwete majiganyo 60. Mpaka asagule mwakusachila kulijiganya. Nambo ŵane akusalijiganyaga lijiganyo limo kapena kupunda pa wiki jilijose.
Ana mpaka ndandile papi?
1. Alembe fomu ja pa intaneti. Tuchikamulichisya masengo yindu yalembileyo pakwamba kusaka kumanyilila kuti mpaka twapate wuli.
2. Mundu jwakwajiganyachachilumbikana ni wawojo. Jwalakwejo chachasalila mwampaka alijiganyile soni chachajanga yiwusyo yosope.
3. Chachipangana ndaŵi jakulijiganya. Katende kalijiganyoli mpaka kaŵe kwimbilana foni, fidiyoko, yikalata, imelo kapena mpaka akambilane malo gakuti asimaneje. Lijiganyoli mpaka lijigale awala jimo, nambo mpaka asagule ulewu wa ndaŵi jakusaka.
Ana yili yakomboleka kwamba kulola mwakusatendelaga?
Elo yili yakomboleka. Agambe kulemba fomu ja pa intaneti. Pachachilumbikana ni mundu jwatwapatile, chamsalile kuti akwamba kusaka kuti amanyilile mwayikusaŵelaga naga mpaka anonyele. Jwalakwe chachikamulichisya masengo kabuku kakuti Asangalaleje Mpaka Kalakala. Kabukuka kakwete majiganyo gatatu gampaka gakamuchisye kumanyilila naga wawojo chiyasangalasye kuti alijiganyeje.
Naga ngutanda kulijiganya, nikuti chachinganganichisya kuti mbe jwa Mboni sya Yehofa?
Iyayi. Ŵa Mboni sya Yehofawe tukusajiganya ŵandu Baibulo, nambo ngatukusamkanganichisyaga mundu kuti ajinjile mu dini jetu. Mmalo mwakwe tukusachimbichisya yajikusasala Baibulo kuti mundu jwalijose akusalisagula jika yakusaka kuyikulupilila.—1 Petulo 3:15.
Ana mpaka ngamulichisye masengo Baibulo jangu?
Elo. Mpaka akamulichisye masengo Baibulo jilijose jakusaka. Nambo ŵajinji akusasangalalaga kukamulichisya masengo Baibulo la Dziko Latsopano La Malemba Opatulika ligongo jili jakupikanika soni ŵajigopolele mwakulondola. Nambope ŵane akusakamulichisyaga ma Baibulo gane.
Ana yili yakomboleka kwaŵilanjila ŵane?
Elo yili yakomboleka. Mpaka ŵaŵilanjile ŵa mwiŵasa mwawo soni achimjawo.
Naga munyumamu nalijiganyaga Baibulo ni ŵa Mboni sya Yehofa, ana yili yakomboleka kutandilasoni?
Elo. Kusala yisyene chasangalaleje ni mwachilitendecheleje lijiganyo apano ligongo aliliganyisye kuti likamulaneje ni yakusimana nayo ŵandu paumi wawo. Apano likutendekwa mwakulekangana ni pandanda.
Ana yili yakomboleka kuti nalijiganyeje jika?
Elo yili yakomboleka. Atamose kuti ŵajinji akusayiwona kuŵa yakamuchisya kuti ŵane ŵajiganyeje, nambope ŵane akusasagula kuti alijiganyeje jika. Mu mbali jakuti Yakwakamuchisya Pakulijiganya Baibulo, pakusimanikwa yindu yampaka atende dawonilodi mwalulele. Yinduyi mpaka yakamuchisye pakulijiganya Baibulo. Yine mwa yindu yampaka yakamuchisye ni ayi:
Majiganyo ga pa Intaneti. Majiganyo gakusangalasyaga, gakwanga yiwusyo yakusosekwa mnope yakusaliwusyaga ŵandu mpela yakuti: Ana Mlungu ali ŵani? Ligongo chichi pachilambopa pana yakusakala soni yipwetesi? Ana Mlungu chachimasya yakusakalayi?
Tumafidiyo. Tumafidiyo tweletu tukulondesya yijiganyo yakusosekwa mnope ya m’Baibulo.
Kwanga kwa Yiwusyo ya m’Baibulo. Ngani syelesi sikusajanga yiwusyo ya m’Baibulo yakusawusyaga ŵandu pa chilambo chosope.
Kugalondesya Chenene Malemba ga M’Baibulo. Alole ngopolelo ja mavesi gakusagasala m’Baibulo.