Ligongo Chichi ŵa Mboni sya Yehofa Akusaŵambala Mwaulemu Kujigala Nawo Mbali pa Misyungu Jakuchimbichisya Chilambo?

Ŵa Mboni sya Yehofa akusachimbichisya maboma soni yimanyilo yakwimila chilambo. Tukusamanyilila kuti ŵane mpaka asagule kutenda malumbilo gakulosya kuchinonyela chilambo chawo, kutindiŵalila mbendela, soni kwimba nawo nyimbo ja fuko.

Nambope, ŵa Mboni sya Yehofa akusasagula ngatenda nawo misyungu jeleji ligongo akusakulupilila kuti jikusatindana ni yajikusajiganya Baibulo. Tukusayamichila ŵandu ŵane pakuchimbichisya yikulupi yetu, mpelasoni yatukusatenda uweji pakuchimbichisya yikulupi yawo.

Nganiji chijijanje yiwusyo ayi:

• Ana Baibulo jikusasala yamtuli panganiji?

• Nambi uli naga lilamusi likukukanganichisya kujigala nawo mbali?

• Ana ŵa Mboni sya Yehofa akusajigala nawo mbali mu yakutendekwa ya ndale soni ya m’chilambo?

Ana Baibulo jikusasala yamtuli panganiji?

Mfundo siŵili sya m’Baibulo syakuyichisyasi sikusatulongolela pa yakusagula yetu:

• Mlungu jikape ni jwakusosekwa kumlambila. Baibulo jikusati: “Yehofa Mlungu jwenu ni jwamkusosekwa kumtindiŵalila, soni jwalakwe jika ni jwamkusosekwa kumtumichila.” (Luka 4:8) Malumbilo nambosoni nyimbo sya fuko yikusakola maloŵe gakulosya kuti mundujo tachilipeleka mnope ku chilambo chakwe kupunda chine chilichose. Myoyo ŵa Mboni sya Yehofa ŵangajigala nawo mbali mu yakutendekwa mpela yeleyi mwakamulana ni chikumbumtima chawo.

  Myoyo Mboni sya Yehofa sikusayiwona kuti kutindiŵalila mbendela jili mbali jimo ja kulambila mafano, yayili yakutindana ni yajikusajiganya Baibulo. (1 Akolinto 10:14) Mabuku gane ku chilambochi gakusajitichisya kuti mbendela sili yimanyilo ya dini. Jwakulemba mbili jwine lina lyakwe Carlton J. H. Hayes jwatite,a “Mbendela jili chimanyilo chekulungwa chele ŵandu m’chilambo akusachikulupilila soni kuchilambila.” Pakwamba ya Aklistu ŵa m’yaka yandanda, jwakulemba mabuku jwine lina lakwe Daniel P. Mannix jwatite: “Aklistu ŵakanaga . . . kupeleka mbopesi kwa mwenye jwa [Chiloma] jujwaliji jwalunda mnope—yeleyi yikulandana ni yakutenda Aklistu ŵa masiku agano pakukana kutindiŵalila mbendela.”b

  Atamose kuti ŵa Mboni sya Yehofa ngakusajitindiŵalila mbendela, nambope jemanjaji ŵangajijonanga, kujijocha, soni pajiweni ŵangatenda yiliyosye yakulosya kujinyosya kapena kunyosya chimanyilo chakwimila chilambo.

• Ŵandu wosope ali ŵakulandana pameso pa Mlungu. (Masengo 10:34, 35) Baibulo jikusasala kuti Mlungu “kupitila mwa mundu jumo ŵapanganyisye mitundu josope ja ŵandu.” (Masengo 17:26) Pa ligongo lyeleli, ŵa Mboni sya Yehofa akusakulupililaga kuti kuli kulemwa kuwuchimbichisya mtundu winewakwe wa ŵandu kupunda ujakwe. Tukusajichimbichisya mitundu josope ja ŵandu mwangajigalila kwakutyochela kapena kwakutama.—1 Petulo 2:17.

Nambi uli naga lilamusi likukukanganichisya kujigala nawo mbali?

Ŵa Mboni sya Yehofa ŵangatenda yindu yakusisyana ni boma. Tukusakulupilila kuti mabomaga ‘gakundidwe ni Mlungu’ kuti gasimanikwe. (Aloma 13:1-7) Tukusakulupililasoni kuti Aklistu akusosekwa kwapikanilaga ŵakulamulila ŵa boma.—Luka 20:25.

Nambi, uli naga malamusi ga chilambo gakutindana ni malamusi ga Mlungu? Mu yakutendekwa yine, mpaka yiŵe yakomboleka kuŵenda boma kuti jichenje malamusi.c Naga ŵa boma akukana kuchenga malamusi, ŵa Mboni sya Yehofa akusasagula mwaulemu “kumpikanila Mlungu mpela jwakulamulila ngaŵaga ŵandu.”—Masengo 5:29.

Ana ŵa Mboni sya Yehofa akusajigala nawo mbali mu yakutendekwa ya ndale soni ya m’chilambo?

Iyayi. Ŵa Mboni sya Yehofa ŵangajinjilila nawo ngani sya ndale soni yakutendekwa ya m’chilambo yayikusatindana ni malamusi ga Mlungu. Patukukana kutenda malumbilo gakutindana ni malamusi ga Mlungu, kutindiŵalila mbendela, soni kukana kwimba nyimbo ja fuko ngatukusatenda yeleyi pakulosya kuti tukwimuchila boma. M’malo mwakwe, tukusaŵaga tuli mkukuya yajikusasala Baibulo pangani syelesi.