Apate Achimjawo Ŵambone Kuti Akatendaga Lipowo—Ana Baibulo Mpaka Jakamuchisye Chamti Uli?

M’chaka cha 2023, achinamatetule ŵakulola ya maumi ga ŵandu ŵapatile kuti lipowo lili chindu chakusawusya chekulungwa chachikonanga yilu ya ŵandu chachikusosekwa kuchimasya. Nambo, ana yili yakomboleka kumasya chakusawusyachi?

• Dr  Vivek Murthy, jwakusatenda maopaleshoni ku United States jwatite: “Lipowo nambosoni kutenda yindu pajika, mpaka kujonanje chilu soni umi wetu.” Jwalakwe jwasasilesoni kuti: “Mpaka tutendepo kandu.” Mwamti uli? “Patukulingalinga kutenda yindu yamwanamwana lisiku lililyose kuti tukungulucheje nambosoni kulimbisya unasi wetu ni ŵandu ŵane.”a

Lipowo ngaligopolela kuti mundu akusanonyela kutama jikajikape. Ŵandu ŵane akusatenda lipowo atamose pali pagulu ja achimjawo. Chinga tukusatenda lipowo pamagongo gapi, Baibulo mpaka jitukamuchisye kulimbana ni chakusawusyachi. Baibulo jikwete malangiso gakutukamuchisya kumalana ni lipowo. Jikusatukamuchisya kulimbisya unasi wetu ni achimjetu.

Mfundo sya m’Baibulo syampaka situkamuchisye

Amanyilileje kuŵechetana chenene ni ŵane. Akagambaga kulondesya mwakupikanilape wawojo mumtima nambo akusosekwasoni kupikanilaga yakwalondechesya achimjawo. Pakulosya kuti akwete chidwi ni achimjawo, akusatanda kukamulana nawo mnope.

• Mfundo ja m’Baibulo: “Mkagambaga kuganichisya yakusaka yenupe basi, nambo mganichisyejesoni yakusaka ya ŵane”—Afilipi 2:4.

Akungulucheje ni ŵandu ŵakulekanganalekangana. Alinjejelinjeje kunguluka ni ŵandu ŵamisingu jakulekanganalekangana kapenasoni ŵakusalekangana nawo yindu yine mpela kwakutyochela, ndamo kapena yilambo.

• Mfundo ja m’Baibulo: “Mwugule chenene mitima jenu.”—2 Akolinto 6:13.

Kuti amanyilile yejinji yampaka atende kuti akamulaneje mnope ni ŵane, aŵalanje ngani ja Chichewa ja mtwe wakuti “Kupeza Anzathu Omwe Timalakalaka.”