Ana Ngondo ja pa Chilambo Chosope Chijitendekwe Pamkaŵapa?—Ana Baibulo Jikusasala Yamti Uli Panganiji?

Mu yaka 30 yipiteyi, ŵandu ŵajinji ayiweni kuti yilambo yakulekanganalekangana yikamulana mnope mwamti yikwawula pasogolo. Nambope, yeleyi nganiyiŵa yisyene ligongo lya yindu yayitendekwe pamkaŵapa.

•  Pa 6 Januwale, 2024 nyusipepala ja Reuters jatite, “Ŵandu akudandawula kuti ngondo ja ku Gaza chijikwaye yilambo yine ligongo lyakuti chilambo cha Israel chitandite kuputana ngondo ni gulu ja Hezbollah ku malile ga chilambo cha Lebanon.”

•  Pa 7 Januwale, 2024 nyusipepala jine (The New York Times) jatite, “Magulu gagakulamulilidwa ni chilambo cha Iran gakwimuchila madela gakulekanganalekangana, mwamti sambano chilambochi chitandite kupanganya yida ya nyukiliya. Konjechesya pelepa, sambano chilambo cha Russia soni cha China yikamulene ni chilambo cha Iran. Yeleyi yikwajogoya ŵandu ŵakutama m’yilambo yayili kungapilolyuŵa.”

•  Pa 11 Januwale 2024 nyusipepala jine (UN News) jatite, “Chilambo cha Russia chikupitilisya konanga mnope yindu m’chilambo cha Ukraine.”

•  Pa 9 Januwale 2024, nyusipepala jine (The Japan Times) jatite, “Kusichila soni kwawula pasogolo pakupanganya yida yangondo mchilambo cha China, kupikanika kwa chilambo cha Taiwan, soni ungapikanganana wa chilambo cha USA ni China ukwatendekasya ŵandu kola woga wakuti mpaka papagwe ngondo.”

Ana Baibulo jikusasala chilichose chakwayana ni kungapikanganana kwakukutendekwa pachilambopa masiku agano? Ana yeleyi chiyitendekasye kuti pachilambo chosope patendekwe ngondo?

Baibulo jasasile mkanipaŵe ya yindu yayikutendekwa masiku agano

Baibulo nganijisala ya ngondo jilijose pajikapajika jajikutendekwa masiku agano. Nambo jasasile mkanipaŵe kuti kuchipagwa ngondo syakulekanganalekangana syasikumanyikasya ndaŵi jatuliji soni syasikutyosya “mtendele pachilambo chapasi.”—Chiwunukuko 6:4.

Buku ja Daniele jasasile mkanipaŵe kuti “pa ndaŵi jakumalisya” yilambo yakulimbanila ulamusi ‘yichijitanda ngondo’ kapena kulimbanilana kulamulalila. Kulimbanaku kuchipwatika kulinganya yida yamachili yangondo soni kukamulichisya masengo “chipanje” chejinji kapena mbiya syejinji pakulinganya yidayi.—Daniele 11:40, 42, 43.

Ngondo jatukwembecheya

Baibulo jikusalosya kuti pachilambo chosope, yindu mkaniyitande kwenda chenene, yichitanda kusakala mnope. Yesu ŵasasile mkanipaŵe kuti “kuchiŵa yakusawusya yekulungwa yanganiyitendekweje chipanganyichisye chilambo mpaka apano.” (Mateyu 24:21) “Yakusawusya yekulungwa” yeleyi yichitandisya ngondo ja Alamagedo, jakusajilondesya kuti jili “ngondo ja lisiku lyekulungwa lya Mlungu Jwamachiligosope.”—Chiwunukuko 16:14, 16.

Nambope, ngondo ja Alamagedo ngasijijonanga ŵandu ŵambone, nambo jichakulupusya. Mlungu chachikamulichisya masengo ngondoji pakumasya maulamusi gosope ga ŵandu, ŵayikasisye ngondo syakogoya pachilambopa. Kuti amanyilile yejinji yajichitenda ngondo ja Alamagedo pakuyikasya mtendele wangamala, aŵalanje ngani syakuyichisyasi:

•  “Ana Ngondo ja Alimagedo ni Chichi?”

•  “Tukatendaga Woga ni Alamagedo”