Ŵasayansi Anandiye Ndaŵi Jawo Jakumala kwa Chilambo—Ana Baibulo Jikusasala Yamtuli Panganiji?

Pa 24 Januwale, 2023, ŵasayansi ŵanandiye ndaŵi ja wochia jawo kuti jiŵandichile 12 koloko ja chilo. Wochiji jikusalosyaga ndaŵi jakumala kwa chilambo. Ŵasayansi ŵaŵisile ndaŵi ja 12 koloko pawochi jawojo kuŵa ndaŵi jakumala kwa chilambo.

• Bungwe jakuwandisya ngani ja AFP International Text Wire, jasasile kuti “Wochi jakulosya kumala kwa chilambo, jikwimila yakogoya yakuyitenda ŵandu yampaka yajonanje. Lyaŵili ŵasayansi ŵanandiye ndaŵi ja wochiji kuti jiŵandichile mnope 12 koloko ja chilo, yanganiyitendekwejepo munyumamu. Jemanjaji anandiye ndaŵi ja wochiji ligongo lya ngondo ja ku Ukraine, woga wawupali wakuti yilambo mpaka yitande ngondo pakamulichisya masengo yida ya nyukiliya soni kogoya kwakupali ligongo lyakuchenga kwa nyengo.”

• Nyusipepala jine ja ABC, jasasile kuti “Lyaŵili ŵasayansi ŵasasile kuti Ndaŵi Jakumala kwa Chilambo jajili 12 koloko ja chilo, ajinandiye ni masekandi 90. Yayikulosya kuti chilambochi chisigele panandi kuti chimale.”

• Nyusipepala ja The Guardian jasasile kuti, “kagulu ka ŵasayansi ŵakutyochela m’yilambo yakulekanganalekangana kakalamwisye kuti yitendo ya ŵandu yikutendekasya kuti umi uŵe pangosi mnope kulekangana ni kalakose.

Nambo ana ŵandu soni chilambochi chiyimale pamkaŵapa? Ana tujogopeje yindu yachiyitendekwe kusogoloku? Ana Baibulo jikusasala yamtuli panganiji?

Ana kusogoloku kutendekwe yamtuli?

Baibulo jikusasalaga kuti, chilambo chapasi chili chakutamilichika “kwa yaka yosope” soni ŵandu “tachitama mwelemo kwa yaka yosope.” (Salimo 78:69; Salimo 37:29) Myoyo yakutenda ya ŵandu ngasiyijonanga chilambochi ni kwika pakuti yaumi ngawonekasoni pachilambopa.

Atamose yili myoyo, Baibulo jikusasalaga kuti chilambochi chana mbesi jakwe. Mwachisyasyo, jikusati “chilambo chikwawula.”—1 Yohane 2:17.

• Kuti amanyilile yajikusasalaga Baibulo pakwamba ya mbesi ja chilambo aŵalanje ngani ja Chichewa jakuti “Kodi Dzikoli Lidzatha? Kodi Baibulo Limanena Kuti Zinthu Zonse Zidzawonongedwa?”

• Kuti amanyilile yajikusasalaga Baibulo yakwamba ya yindu yayitendekwe kusogoloku, aŵalanje ngani ja Chichewa jakuti: “Kodi Mapeto a Dzikoli Adzafika Liti?”

Ayiwoneje yindu mwakuŵajilwa

Atamose kuti pachilambopa pakutendekwa yindu yakusawusya, nambope Baibulo mpaka jitukamuchisye kuti tuyiwoneje yindu mwakuŵajilwa. Mwamtuli?

• Baibulo jikusatusalila yindu yakamuchisya yampaka tutendeje mundaŵi jakusawusyaji. (2 Timoteyo 3:16, 17) Kuti amanyilile yejinji aŵalanje ngani ja Chichewa jakuti “Kodi Tingatani Kuti Tisamade Nkhawa Kwambiri?” kuti alole mwampaka Baibulo jakamuchisye kuyiwona yindu mwakuŵajilwa atamose kuti akusimana ni yakusawusya yejinji.

• Baibulo jikusatusalila kuti tukwembecheya yindu yambone kusogoloku. (Aloma 15:4) Jikusatusalila yindu yisyesyene yatukwembecheya pamkaŵapa soni kusogolo. Yeleyi yikusatukamuchisya kuti tukajasaga mtima ni yindu yayikutendekwa masiku agano pachilambopa.

Kuti ajimanyilile chenene Baibulo, tukwaŵenda kuti atande kulijiganya Baibulo mwalulele ni ŵa Mboni sya Yehofa.