Ligongo Chichi Ndale Sikusagaŵikanganya Mnope Ŵandu?—Ana Baibulo Jikusasala Yamtuli Panganiji?

Ndale sikusagaŵikanganya ŵandu pachilambo chosope chapasi. Mwakamulana ni kuwungunya kukwatendekwe m’chaka cha 2022, bungwe ja Pew Research Center jatite, “Achakulungwakulungwa 65 pa 100 ŵaliwose ŵa myilambo yakwana 19 paŵawusisye ya nganiji, ŵasasile kuti pana kukangana kwekulungwa myilambo mwawo pasikati pa ŵandu ŵakusakuya yipani yakulekangana.”

Ana ku dela jakusatamaga wawojo akusayiwona yindu ya ndale yili mkwagaŵikanganya ŵandu? Ligongo chichi yeleyo yikusatendekwa? Ana pana litala lililyose lyakumachisya yeleyi? Aganichisye yajikusasala Baibulo.

Ndamo syasikusagaŵikanganya ŵandu

Baibulo jasasile mkanipaŵe kuti ndaŵi jatuliji gali “masiku gakumalisya,” gele ŵandu ŵajinji chachikola ndamo syakwalepelekasya kuŵa ŵakamulana.

• “Masiku gakumalisya jichiŵa ndaŵi jakusawusya soni jakogoya.Pakuŵa ŵandu chachiŵa ŵakulinonyela, . . . ŵangasaka kukamulana ni ŵane.”—2 Timoteyo 3:1-3.

Atamose kuti ŵandu ŵajinji akulingalinga kutenda yakuti maboma gatendeje chenene yindu, nambope ngayikukomboleka. Yili myoyo ligongo lyakuti ngaŵa mkomboleka ŵandu ŵakulekangana nganisyo kuti akamulileje masengo yimpepe pakusaka kumasya yakusawusya. Yakuyichisya yakwe yikukwanilisya yajasasile Baibulo kalakala.

• “Mundu ampweteche mundu mjakwe pakumlamulila.”—Jwakulalichila 8:9. NWT

Nambope, mfundo sya m’Baibulo sikusalosya kuti boma jakulongoleledwa ni mundu jwinejwakwe jichimasya yakusawusya yayikwalagasya ŵandu masiku agano.

Mlongola jwakuŵajilwa kwasamalila ŵandu

Baibulo jikusamkolanga Yesu Klistu kuti ali mlongola jwakuŵajilwa kumasya yakusawusya. Yesu akwete machili, ulamusi, soni mtima wakusaka kuyikasya mkamulano ni mtendele kwa ŵandu wosope.

• “M’masiku gakwe ŵakulungama chachisipuka, soni pachiŵa mtendele wejinji.”—Salimo 72:7. NWT

• “Mitundu josope ja ŵandu tijichimtumichila jwalakwe.”—Salimo 72:11.

Yesu ali mlongola jwambone ligongo lyakuti akusiŵaganichisya soni akusasaka kwakamuchisya ŵandu, mnopemnope ŵiŵatendeledwe yindu yangali chilungamo.

• “Tachimkulupusya jwakusoŵa jutachigumilajo, ni jwakulaga jwangali ŵakumkamuchisya. Jwalakwe tachatendela chanasa ŵangali machili ni ŵakulaga, tachiwukulupusya umi wa ŵandu ŵakusingalilwa. Tachikulupusya umi wawo ku ŵandu ŵawukali ni ŵakwasawusya.”—Salimo 72:12-14.

Alijiganye yejinji yakwamba Uchimwene wa Mlungu, wawuli boma jakwinani jakulongoleledwa ni Yesu. Amanyilile mwampaka apatile yindu yambone soni kuwukamuchisya ulamusi wakwe.

• Alolele fidiyo ja mtwe wakuti Ana Uchimwene wa Mlungu Uli Chichi?

• Aŵalanje ngani ja mtwe wakuti “Uchimwene wa Mlungu—Boma Jangali Katangale.”