Ana Chiwa cha Yesu Chikusatukamuchisya Chamtuli?
Kamo pa chaka chilichose, ŵa Mboni sya Yehofa akusatendaga mwambo wakumbuchila chiwa cha Yesu mpela muŵalamulile jwalakwejo. (Luka 22:19) Jemanjaji akusatendaga mwambowu yalumo ni achalendo ŵajinji ŵakusiŵaŵilanjila ku chakutendekwachi. Mwambowu ukusatukamuchisya kuti tuyamichileje yaŵatesile Yesu paŵawilile ŵandu. Ukusalosyasoni kuti mbopesi jakwe jikusatukamuchisya apanopano soni msogolo.—Yohane 3:16.
Chinga chaka achino ŵasimanikwe pamwambo wakumbuchila chiwa cha Yesu kapena iyayi, ana chiwa cha Yesu mpaka chakamuchisye chamtuli? Yesu ŵasasile kuti tukusosekwa kutendaga yindu yiŵili yakusosekwa mnope ayi:
1. Alijiganye yakwamba Mlungu soni Yesu. Paŵapopelaga kwa Atati ŵakwe ŵakwinani, Yesu ŵatite: “Umi wangamala chachiwupata naga akulijiganya ya wawojo, Mlungu jikape jwakuwona, soni ya Yesu Klistu jwele wawojo ŵamtumile.”—Yohane 17:3.
2. Atendeje yakulijiganya. Yesu jwagombelechesye kuti tukusosekwa kuyikamulichisyaga masengo yakusatujiganya jwalakwejo. Mwachisyasyo, pakulalichila kwa petumbi, jwalakwe jwamalisisye mwa kumyamichila jwalijose ‘jwakusapikanila maloŵe [gakwe] soni kugatenda’ (Luka 6:46-48) Mwakulandana ni yeleyi, pandaŵi jine jwalakwesoni jwatite: “Sambano pakuŵa mmanyilile yeleyi, chimchiŵa ŵakusangalala naga mkuyitenda.”—Yohane 13:17.
Ana akusaka ali alijiganyisye yejinji yakwamba Mlungu soni Yesu? Ana akusaka kumanyilila yampaka atendeje kuti akamulichisyeje masengo yakulijiganya? Yindu yakuyichisyayi mpaka yakamuchisye.
Alijiganye Baibulo
Kulijiganya Baibulo mwalulele kwakamuchisye ŵandu ŵajinji kujipikanichisya Baibulo soni kujikamulichisya masengo paumi wawo.
Kuti alijiganye yejinji yakwamba Baibulo ajawule pa peji jakuti Kulijiganya Baibulo Mwakulongoleledwa ni Mundu Jwine.
Kuti amanyilile mwalikusatendechela Lijiganyo lya Baibulo ni ŵa Mboni sya Yehofa, alolele fidiyo jakuti Twapochele ku Lijiganyo lya Baibulo.
Misongano ja ŵa Mboni sya Yehofa
Kaŵili pa wiki, ŵa Mboni sya Yehofa akusasongana pamalo gawo gakupopelela gagakusamanyika kuti pa Nyumba ja Uchimwene. Pamisonganoji, tukusalijiganya Baibulo soni mwampaka tukamulichisye masengo yatukusalijiganyayo paumi wetu.
Jwalijose mpaka ayiche pamisonganoji. Ngakusosekwa kuŵa jwa Mboni sya Yehofa kuti asimanikwepo. Mwakamulana ni mwayiŵelele yindu paumi wawo, mpaka asagule kwawula ku Nyumba ja Uchimwene kapena kutenda misonganoji pa yipangiso yamakono.
Kuti amanyilile yayikusatendekwa kumisonganoji, alolele fidiyo jakuti Ana ku Nyumba ja Uchimwene Kukusatendekwa Yatuli?
Kuti amanyilile malo gakutendela misonganoji gagali chiŵandika ni kumangwawoko, awungunye pa webusayiti jetu pa peji ja Misongano ja Mpingo ja Mboni sya Yehofa.
Ngani soni mafidiyo ga pa webusayiti jetu
Ngani soni mafidiyo ga pa webusayitiji mpaka gakamuchisye kumanyilila yejinji yaŵajiganyisye Yesu soni kusosekwa kwa mbopesi jiŵapeleche mwakutuwila.
Mwachisyasyo, kuti apikanichisye kuti yili yakomboleka ŵandu ŵajinji kupindula ni chiwa cha mundu jumo, aŵalanje ngani jakuti, “Ana Yesu Akusatukulupusya Chamtuli?” soni jakuti “Ligongo Chichi Yesu Ŵalasile Soni Kuwa?” kapena alolele fidiyo jakuti Ligongo Chichi Yesu Ŵawile?