Yachiwawa Yagombelana ni Wuti Yikutendekwa Pachilambo Chosope—Ana Baibulo Jikusasala Yamtuli Panganiji?

M’mwesi wa Julayi 2022, manyusipepala gasasile malipoti gakuyichisyaga gakwamba yachiwawa yagombelana ni wuti yele yikutendekwa pachilambo chosope:

• “Kuwulajidwa kwa jwandale jwine jwakumanyikwa mnope [jujwaliji Nduna Jekulungwa a Shinzo Abe] kwasokonasisye chilambocho soni kutendesya woga pachilambo chosope, mnopemnope ligongo lyakunandipa kwa malamusi gamachili gakwaya wuti.”—Julayi 10, 2022, Nyusipepala ja ku Japan

• “Ŵandu ŵajinji m’chilambo cha Denmark akwete woga, mundu jwine jwakola wuti ali awuleje ŵandu ŵatatu pamalo gane pagali mashopu gamakulungwakulungwa ku Copenhagen.”—Julayi 4, 2022, Reuters.

• “Ku South Africa: Ŵandu ŵakwana 15 awulajidwe, ni ŵandu ŵakola wuti ali ŵagombele ku bala jine ku Soweto.”—Julayi 10, 2022, The Guardian.

• “Ŵandu ŵakupunda 220 awulajidwe ali agombeledwe ni wuti paholide ja pa Julayi 4.”—Julayi 5, 2022, Nyusipepala ja CBS.

Ana tujembecheye kuti yachiwawayi yichimala? Ana Baibulo jikusasala yamtuli panganiji?

Yachiwawa yichimala

Baibulo jikusasala kuti ndaŵi jatukutamaji gali “masiku gakumalisya,” soni jili ndaŵi jele ŵandu ali ŵakogoya, soni ŵanganonyela yindu yambone. (2 Timoteyo 3:1, 3) Yachiwawayi yikusiyatendekasya ŵandu kuti atameje mwawoga. (Luka 21:11) Nambope, Baibulo jikusasala yandaŵi jele yachiwawayi yichimala mwamti “ŵandu tachitama mwamtendele m’nyumba syakulupichika, soni malo gakupumulila ga bata.” (Yesaya 32:18) Nambo, ana yachiwawa yichimala chamtuli?

Mlungu chachatyosya ŵandu ŵakusakala nambosoni chachijonanga yida yangondo.

• “Nambo ŵandu ŵangalumbana, Mlungu tachasinga kwatyosya pachilambo chino.”—Misyungu 2:22.

• “[Mlungu] akulekasya ngondo mpaka kumbesi kwa chilambo chapasi. Akutemanya ukunje, kuposokolanya lipanga; akusajocha mageleta ga ngondo ni moto.”—Salimo 46:9.

Mlungu chachimasya yayikusatandikasya yachiwawa mwa kwajiganya ŵandu kuŵa ŵamtendele.

• “Tipachiŵa pangali soni chine chilichose chakupweteka kapena chakonanga pa litumbi lyeswela, nipo ŵandu pa chilambo chosope chapasi tachiŵa ŵegumbale ni lunda lwakwamanyilila AMBUJE mpela mwajikusagumbalila nyasa ni mesi.”—Yesaya 11:9.

• Atamose masiku getu gano, Mlungu akwajiganya ŵandu pachilambo chosope kuti aŵambaleje kutenda yachiwawa nambosoni kukamulichisya masengo yida yangondo. Jwalakwe akutenda yeleyi pakwajiganya ‘kusyana mawupanga gawo kuti gaŵe majela, soni mipamba jawo kuti jiŵe yipula yakutengulila nyambi.’—Mika 4:3.

Kuti amanyilile yejinji pakwamba ya chilambo chele ŵandu chachitamaga mwangali woga mwakamulana ni yajikusasala Baibulo, aŵalanje ngani ja Chichewa ja mtwe wakuti, “Kodi N’zotheka Kukhala Mopanda Mantha?”

Kuti amanyilile mwele yachiwawa yichimalila mpaka kalakala, aŵalanje ngani ja Chichewa ja mtwe wakuti, “Mtendele Udzabweradi Padziko Lapansi”