YAKUSALIWUSYAGA ŴACHINYAMATA
Ana Mpaka Nachijiganye Chamtuli Chikumbumtima Changu?
Ana chikumbumtima chawo mpaka chilandane ni chichi pa yindu yakuyichisyayi?
kampasi
ligalasi
mjawo
jwakwelusya
Kwanga kwa chiwusyochi kuli yosopeyi. Ligongo chichi tukuŵecheta myoyo? Nganiji chijisale ligongo lyakwe.
Ana chikumbumtima ni chichi?
Chikumbumtima chili kupakombola kwetu kulekanganya chachili chambone ni chakusakala. Chikumbumtima chili mpela ‘malamusi gagalembedwe m’mitima mwetu.’ (Aloma 2:15) Chikumbumtima chambone chikusamkamuchisya mundu kuliwungunya kuti amanyilile naga yindu yakusaka kutenda kapena yatesile yili yambone kapena iyayi.
Chikumbumtima chawo chili mpela kampasi. Chikusichalongolela ku yindu yambone ni chakulinga chakuti akasimana ni yindu yakusawusya.
Chikumbumtima chawo chili mpela ligalasi. Chikusichakamuchisya kumanyilila naga akwete ndamo syambone kapena syakusakala. Chikusalosyasoni mwawuŵelele mtima wawo.
Chikumbumtima chawo chili mpela mjawo. Naga akuchipikanila, mpaka chape malangiso gambone gampaka gakamuchisye kuti yindu yajendeleje chenene.
Chikumbumtima chawo chili mpela jwakwelusya. Chikusichajimbaga magambo naga atesile chindu chakusakala.
Chikumbumtima chambone mpaka chakamuchisye kusagula yindu chenene
Mfundo jakusosekwa mnope: Chikumbumtima chawo chili chindu chakusosekwa mnope champaka chakamuchisye pa (1) kusagula chenene yindu soni (2) kulinganya yindu yalemwisye.
Ligongo chichi akusosekwa kuchijiganya chikumbumtima chawo?
Baibulo jikusati “mŵeje ni mtima wangali kandu kakusisyana nawo.” (1 Petulo 3:16) Yeleyi mpaka yiŵe yakusawusya naga nganachijiganya chikumbumtima chawo.
“Naga mbite ku malo gane gakwe nalambusyaga achinangolo ŵangu soni nganisakaga kuti jwalijose amanyilile. Kundanda chikumbumtima changu chalagasyaga, nambo mkupita kwa ndaŵi chalesile kulagasya.”—Jennifer.
Kumbesi kwakwe, chikumbumtima cha Jennifer chamlimbikasisye kuti ŵasalileje achinangolo ŵakwe muyaŵelele soni kuti aleche kwalambusya achinangolowo.
Yakusosekwa kuyiganichisya: Ana ni pandaŵi japi jele chikumbumtima cha Jennifer chamsalilaga yakutenda?
“Yikusaŵa yakusawusya soni yakulagasya nganisyo naga mundu akukola umi wapaŵili. Naga mundu chikumbumtima chakwe chikumkunda kutenda atamose chakusakala chimo, yikusaŵa yangasawusya kutenda chakusakala chine.”—Matthew.
Ŵandu ŵane ŵangachikosyaga yachikwasalila chikumbumtima chawo. Mwamti pakusala ya jemanjanji, Baibulo jikusati ‘sikusamalilaga soni.’ (Aefeso 4:19) Baibulo jine (Good News Translation) jagopolele maloŵega kuti, “Akusaleka kutenda soni.”
Yakusosekwa kuyiganichisya: Ana tujile kuti mundu jwele jwangalijimbaga magambo patesile yakulemwecheka, nikuti ali pambone? Ana ni yakusawusya yapi yampaka asimane nayo?
Mfundo jakusosekwa mnope: Kuti mundu akole chikumbumtima chambone, akusosekwa kamulichisya masengo lunda ‘lwakulekanganya yindu yambone ni yangalumbana.’—Ahebeli 5:14.
Ana mpaka achijiganye chamtuli chikumbumtima chawo?
Kuti achijiganye chikumbumtima chawo, akusosekwa kola mfundo syampaka syakamuchisye kumanyilila ndamo syambone. Ŵandu ŵane akusakuya mfundo sya:
liŵasa kapena ndamo jawo
achimjawo
ŵandu ŵakumanyikwa ŵakusatenda yakusangalasya
Nambope mfundo syasikusasimanikwa m’Baibulo sili syakamuchisya mnope. Yeleyi nganiyiŵa yakusimonjesya ligongo Baibulo ‘jalembedwe ni Mlungu,’ juŵatupanganyisye soni jwakusamanyilila yatukusosechela.—2 Timoteo 3:16.
Kwende tulole yisyasyo yakuyichisyayi.
MFUNDO JA M’BAIBULO: “Tusimichisye kutenda yosope mwachilungamo.”—Ahebeli 13:18.
Ana mfundoji mpaka jakamuchisye chamtuli kuti chikumbumtima chawo chakalamusyeje naga akusaka kwiŵila mayeso, kwalambusya achinangolo ŵawo kapena kwiŵa yindu yine?
Naga chikumbumtima chawo chikusichalimbikasyaga kuti atendeje yosope mwachilungamo, ana yeleyi mpaka yakamuchisye chamtuli apano soni msogolo?
MFUNDO JA M’BAIBULO: “Msitile ndamo sya chikululu.”—1 Akolinto 6:18.
Ana mfundoji mpaka jakamuchisye chamtuli kuti chikumbumtima chawo chakalamusyeje pakusaka kuti alolele yakuŵagula kapena kutenda yachikululu?
Naga chikumbumtima chawo chikwasalila kuti akatenda ndamo sya chikululu, ana yeleyo mpaka yakamuchisye chamtuli apano soni msogolo?
MFUNDO JA M’BAIBULO: “Mnonyelaneje ni kutendelana chanasa nipo ni kululuchilanaga jwine ni mjakwe.”—Aefeso 4:32.
Ana mfundo jeleji mpaka jakamuchisye chamtuli naga atindene nganisyo ni mlongo mjawo?
Naga chikumbumtima chawo chikwasalila kuti akululuche soni kulosya chanasa, ana yeleyi mpaka yakamuchisye chamtuli apano soni msogolo?
MFUNDO JA M’BAIBULO: “AMBUJE. . . akusaŵengana ni ŵandu ŵakusakala ŵakunonyela ya njojo.”—Salimo 11:5.
Ana mfundo jeleji mpaka jakamuchisye chamtuli pakusagula kulolela mafidiyo, mapologalamu ga pa TV soni maseŵela ga pa kompyuta?
Naga chikumbumtima chawo chikwasalila kuti akalolela yindu yachiwawa, ana kutenda yeleyo mpaka kwakamuchisye chamtuli apano soni msogolo?
YAYATENDEKWE: Jeremy jwaŵechete kuti, “Ngwete achimjangu ŵaŵanonyelaga kulolela mafidiyo soni maseŵela gakulosya yachiwawa, mwamti unesoni nanonyelaga yeleyi. Kaneko baba ŵangu ŵasalile kuti ngangusosekwasoni kulolela soni kutenda maseŵela gelego. Ligongo lyakuti ŵalekasisye, nalolega mafidiyoga panjawile kwa achimjangu. Nambo pambiche kunyumba nganisalaga chilichose cha maseŵela soni mafidiyogo. Baba ŵangu pambusisye kuti chisawisye chichi, najangaga kuti pangali chachisawisye. Nambo lisiku line naŵalasile lilemba lya Salimo 11:5. Ndili mbalasile nalitendele chanasa ligongo lya yindu yinatendagayo. Kaneko nasagwile yakuti ngapitilisyasoni kulolela soni kutenda maseŵelega. Pandaŵiji nalesile kulolela soni kutenda maseŵelaga. Mjangu jwine ali ambweni kuti ndesile kutenda yeleyi, nombe najo jwalesilesoni.”
Yakusosekwa kuyiganichisya: Ana ni pandaŵi japi jele chikumbumtima cha Jeremy chatandite kukamula masengo soni ni pandaŵi japi jiŵatandite kuchipikanila? Ana akulijiganya yamtuli kwa Jeremy?
Mfundo jakusosekwa mnope: Chikumbumtima chawo chikusalosya kuti wawojo ali mundu jwamtuli soni kuti ni yindu yapi yakusayiwona kuŵa yakusosekwa mnope. Sambano ana chikumbumtima chawo chikusalosya yamtuli pakwamba ya wawojo?