YAKAMUCHISYA LIŴASA |KULELA ŴANACHE

Yampaka Atende Naga Jwachinyamata Jwawo Ngakumkulupilila

Ŵachinyamata ŵane ŵangapikanilaga achinangolo wawo mwamti akusayika pa mlango ndaŵi jilijose jwakusaka. Ŵachinyamata ŵane ŵangasalilaga yisyesyene achinangolo ŵawo mwamti akusatyoka pa mlango ni kwawula kukukunguluka ni achimjawo. Ana mpaka atende uli naga jwachinyamata jwawo akumkayichila?

Ana jwachinyamataju ali jwakwimuchila?

Komboleka kuti nganaŵa jwakwimuchila. Yeleyi yili myoyo ligongo lyakuti Baibulo jikusati, “Mtima wa mwanache ukusiwuŵa wa umwanache.” Yitendo ya ŵachinyamata yikusalosya kuti maloŵega gali gakuwona. (Misyungu 22:15) Mundu jwine lina lyakwe (Dr Laurence Steinberg) jwalembile kuti, “Mundu payiche pa msingu wa chinyamata, ndaŵi sine akusasagula yindu mwachitema soni mwakuloŵela. Myoyo tujembecheyeje kuti mwanachejo chatendeje yindu mwakulemwecheka.”a

Ana mpaka atende uli naga jwachinyamata jwawo aŵele ali mkwalambusya?

Payitendekwe yeleyi akaganisyaga kuti jwachinyamatajo ali jwangapikanila. Ŵakuwungunya ŵapatile kuti mwanache payiche pa msingu wachinyamata, akusaganichisyape yakusaŵecheta achinangolo ŵakwe atamose yiwonecheje kuti ngakukamulichisya masengo malangisogo. Ndaŵi sine jwachinyamata jwawo nganaŵa alosisye kuti yikumkwaya, nambo akusadandaula ligongo lyakutenda yindu yakwakuŵasya achinangolo wakwe.b

Collage: 1. Chiwulili chakulosya liwupa lyeposokoche. 2. Lukongolo lwetaŵidwe ni bandichi. 3. Jwamlume jwaposokweche lukongolo akwenda. — Liwupa lyaliposokweche, paliposile likusakamulasoni masengo gakwe, myoyo naga ŵalesile kukulupililana mpaka yikombolechesoni kutanda kukulupililana

Ana ni ŵani ŵatendekasisye?

Ana ali mu ndamo jamtuli? Baibulo jikusasala kuti, “Kusyoŵekana ni ŵandu ŵayitendo yakusakala, kukusajonanga ndamo syambone.” (1 Akolinto 15:33) Kusala yisyene achimjawo ŵa ŵachinyamata ŵetu mpaka ŵatendekasye ŵachinyatama ŵetu kuŵa ŵambone kapena ŵakusakala. Konjechesya pelepa panasoni yindu yine. Yindu yakwe yili mpela malo gakunguluchila pa intaneti, soni yindu yamalonda. Kupwatika pelepa ŵachinyamataŵa ŵangamanyililaga yejinji. Ni ligongo lyakwe ndaŵi sine akusasagula yindu mwakuloŵela. Myoyo jemanjaji akusosekwa kwitichisya yakuyichisya yampaka yipagwe ligongo lya yitendo yawo. Kutenda yeleyi kuchikamuchisya kuti pachachikulapo chasaguleje yindu mwalunda soni chaŵe ŵakudalilichika.
Ana kapena une ni jundendekasisye? Ndaŵi sine mwanache jwawo pakutenda yindu yakulemwecheka mpaka aganisyeje kuti akutenda yeleyo ligongo lyakuti wawojo ŵaliji ŵakalalisya yindu. Kapena mpaka aganisyeje kuti ŵamlechelelaga mnope jwachinyamatajo, mwamti yeleyi yimtendekasisye kuti atendeje yindu yiliyose yakusaka. Myoyo mmalo mwakutamila kulijimba magambo, mpaka yiŵe chenene kuganichisya yampaka atende kuti amkamuchisye jwachinyamata jwawo.

Ana mpaka ndende yamtuli kuti ndandilesoni kumkulupilila jwachinyamataju?

Akatumbilaga mwachitema. Jwachinyamata jwawo mpaka atende yindu yakwatumbilikasya. Mmalo mwakutenda yindu mwakupya mtima, uli ngalinga kukambilana ni jwachinyamatajo mwakusimana mtima kuti amanyilile chichamtendekasisye. Mpaka aliwusye kuti, ‘Ana jwatesile yeleyo pakusaka kumanyilila mwayikusaŵelaga yine yakwe, lyamkamwile lipowo kapena yamnyaleye yine yakwe?’ Chinga mwanachejo jwatesile yeleyo pamagongo gamtuli, nambope jwalakwejo jwalemwisye. Kukambilana yeleyi mpaka kwakamuchisye wawojo ni jwachinyamatajo kupikanichisya chenene chachatendekasisye yakulemwechekayo.

Mfundo ja m’Baibulo: “Jwalijose akwenela kuŵa jwachitema kupikana, jwakokoŵa kuŵecheta, soni jwangatumbila chitema.”—Yakobo 1:19.
Amkamuchisyeje jwachinyamata jwawo kuganichisya yatesile. Mpaka amwusye yiwusyo ayi, Ana mlijiganyisye yamtuli pa yamtesileyi? Ana patimchisimana ni yakulandanayi timchitenda yamtuli? Yiwusyo yeleyi mpaka yimkamuchisye jwachinyamata jwawo kuti aganichisyeje kaje mkanatende chilichose kuti asaguleje yindu chenene.

Mfundo ja m’Baibulo: “Mwasalileje yakulemwa yawo, mwajamucheje, ni kwalimbikasya mtima, ni kwajiganya mwakuŵeŵa mtima.”—2 Timoteo 4:2.
Amjamucheje. Chamuko chikusakamula masengo mnope naga chikamulana ni yakulemwa yatesileyo. Mwachisyasyo, Naga jwachinyamata jwawo apaswile njinga ligongo lyakuti ŵajigele mwangaŵenda, mpaka amlekasye kuti ngasakwelasoni njingajo kwa ndaŵi.

Mfundo ja m’Baibulo: “Yakusapanda mundu, tachigowola iyoyo.”—Agalatiya 6:7.
Aganichisyeje yampaka atende kuti ŵakulupilileje. Kusala yisyene pakusajigala ndaŵi kuti yeleyi yikomboleche. Atamose yili myoyo atende yakuti amkamuchisye jwachinyamatajo kumanyilila kuti mundu jwatwamkayichilaga yili yakombolekasoni kutanda kumkulupilila. Myoyo amkamuchisyeje jwachinyamata jwawo kumanyilila kuti naga akuchenga yitendo yakwe, nikuti mpaka atandilesoni kumdalila. Naga jwachinyamata jwawo akuyiwona kuti wawojo nganaŵa amkulupilile, mpaka ajase mtima.

Mfundo ja m’Baibulo: “Mkasimwatumbilisyaga ŵanache ŵenu, ligongo tachijasa mtima.”—Akolose 3:21.

Yaŵechete achinangolo ŵane

Liŵasa line (Joseph ni Lisa) lyaŵechete kuti, “Achinangolo akusosekwa ndaŵi syosope aŵeje ŵakudalilichika ligongo naga akutenda yindu mwangadalilichika, ŵanache ŵawo nganaŵa alijiganyisye ndamo ja kudalilichikaji. Naga ŵanache akulola chisyasyo chambone chakulosya achinangolo ŵawo pa ngani ja kudalilichika, yichakamuchisya kuti nombenawo atende yakomboleka kuti aŵeje ŵakulupichika, soni chachitendaga yeleyi mwakusanglalala.”

Liŵasa line (Daniel ni Karyn) lyaŵechete kuti, “Kuŵa pa unasi wambone ni ŵanache pali ŵachinandipile, kuchakamuchisya mundaŵi jakusawusya ja pa unyamata. Achinangolo akusosekwa kwapaga ŵachinyamata ŵawo ufulu wakutenda yindu yine soni kwasalilaga yangakusosekwa kutenda. Naga achinangolo akwapikanichisya chenene ŵachinyamata ŵawo soni akwapa ufulu pa yindu yine, yeleyi yichikamuchisya kuti ŵanachewo akasatenda yindu yampaka yatendekasyeje achinangolo kwakayichilaga.”

a Kutyochela m’buku jakuti You and Your Adolescent.

b Nganiji jikukwaya ŵachinayamata wosope ŵachilume ni ŵachikongwe ŵakwe.