Chinonyelo cha Mlungu Chichitama Mpaka Kalakala

1-2. Ana Aklistu ŵajinji akwete chakusawusya chapi?

AGANICHISYE ya liboti lyalili pa nyasa kusa kuli mkutenda chimbungo soni ula ja machili. Mbepo jikuyuya libotili aku nakuku. Mwamti naga mundu ngakamulichisya masengo nangula, nikuti libotili chilijaje kulikose kwajikwawula mbungo. Nangulaju mpaka jukamuchisye kuti libotili likajendagajendaga soni likajigalika ni mbungo jamachilijo.

² Pakusimana ni chakusawusya chekulungwa, mpaka aliwoneje mpela liboti lila. Mwamti nganisyo syawo mpaka sichenjeje mwachitema. Lisiku line mpaka ayiwoneje kuti Yehofa akusiŵanonyela soni akusiŵakamuchisya. Nambo lisiku line mpaka akayichile naga Yehofa akusayiwona yakusawusya yawo. (Sal. 10:1; 13:1) Pandaŵiji, komboleka kuti mjawo mpaka ŵalimbikasye wawojo, mwamti kwakandaŵi mpaka atande kuyiwona yindu mwakuŵajilwa. (Mis. 17:17; 25:11) Nambo kaneko mpaka atandesoni kukayichila yakuti Yehofa akwakamuchisya. Kombolekasoni mpaka ayiche pakuyiwona kuti jwalakwe alesile kwanonyela. Ana mwakuwanichisya mpaka akamulichisye chamti uli nangula pandaŵi jakusimana ni yakusawusyaji? Kasale kane mpaka tujile kuti, ana mpaka asimichisye chamti uli kuti Yehofa akusiŵanonyela soni kwakamuchisya?

3. Mwakamulana ni Salimo 31:7 soni 136:​1, ana ‘chinonyelo chakulupichika’ chili chichi? Ligongo chichi mpaka tusale kuti Yehofa ni jwakusalosya chenene ndamoji? (Alolesoni chiwulili.)

³ Chindu chimo champaka chitulimbikasye pandaŵi jatukusimana ni yakusawusya chili kukumbuchila chinonyelo chakulupichika cha Yehofa. (Aŵalanje Salimo 31:7; 136:1.) Maloŵe gakuti ‘chinonyelo chakulupichika’ gakusasala ya chinonyelo chekulungwa soni changamala chakusalosyaga mundu pa mjakwe. Mwamti Yehofa ni jwakusalosya chenene chinonyelochi. Ni ligongo lyakwe Baibulo pakwamba ya jwalakwe jikusati ali “jwagumbala ni chinonyelo changamala.” (Eks. 34:​6, 7) Jikusasalasoni kuti jwalakwe “Akusalosya chinonyelo chakulupichika kwa wosope ŵakusaŵilanga pa [jwalakwe].” (Sal. 86:5) Aganichisye yagakusala malembaga. Yehofa jwangajasa ŵakutumichila ŵakwe ŵakulupichika. Mwamti kukumbuchila kuti Yehofa ali jwakulupichika kuchalimbikasya mnope pandaŵi jakusimana ni yakusawusya yekulungwa.—Sal. 23:4.

AKUMBUCHILEJE KUTI CHINONYELO CHA YEHOFA CHILI CHIIJIGANYO CHANDANDA CHA M’BAIBULO

4. Asale yisyasyo ya yijiganyo yandanda ya m’Baibulo, soni alondesye ligongo lyakwe tukusayikulupililaga mnope.

⁴ Chindu chine champaka chitulimbikasye patukusimana ni yakusawusya chili kumbuchila kuti chinonyelo cha Yehofa chili chijiganyo chandanda cha m’Baibulo. Ana munganisyo mwawo mukusayika chichi papikene maloŵe gakuti “chijiganyo chandanda cha m’Baibulo”? Komboleka akusaganisya ya yikulupi yaŵalijiganyisye m’Maloŵe ga Mlungu. Mwachisyasyo, ŵalijiganyisye kuti lina lya Mlungu lili Yehofa, soni kuti Yesu ali mwanache jwa Mlungu jumopejo. Ŵalijiganyisyesoni kuti ŵawe ŵangamanyilila chilichose soni kuti kusogoloku chilambochi chichiŵa paladaiso, mwamti ŵandu chachitamaga mpaka kalakala. (Sal. 83:18; Jwak. 9:5; Yoh. 3:16; Chiw. 21:​3, 4) Panyuma pakulupilila kuti yijiganyo yeleyi yili yisyesyene, yaliji yakusawusya kuti mundu jwine ŵalekasye kuyikulupilila. Yaliji myoyo ligongo ŵayikopochele kuti pana maumboni gakusimichisya kuti yijiganyoyi yili yisyesyene. Kwende sambano tukambilane chiwusyo achi. Ana kukumbuchila mfundo jakuti chinonyelo chakusalosya Yehofa chili chijiganyo chandanda cha m’Baibulo mpaka kutukamuchisye chamti uli kutyosya nganisyo syakuti Yehofa jwangayikosya yakusawusya yetu?

5. Alondesye yampaka atende mundu pakuyikana yijiganyo yaunami.

⁵ Ana chichi chachakamuchisye kuyikana yijiganyo yaunami paŵagambile kutanda kulijiganya Baibulo? Komboleka ŵalandanyaga yindu yaŵalijiganyaga ku dini jawo ni yajikusajiganyaga Baibulo. Aganichisye chisyasyo chimo achi. Komboleka kuti pandanda ŵakulupililaga kuti Yesu ali Mlungu jwamachili gosope. Nambo paŵalijiganyaga Baibulo, komboleka ŵaliwusisye kuti, ‘Ana chijiganyo chelechi chili chisyesyene?’ Mwamti panyuma pakupata umboni wakutyochela m’Baibulo, ŵakombwele kumanyilila kuti Yesu nganaŵa Mlungu. Kaneko ŵalesile kukulupilila chijiganyo chaunamichi ni kutanda kukulupilila yisyesyene yakuti Yesu ali “jwandanda kupagwa jwa yakupanganyikwa yosope,” soni kuti ali “Mwanache jumopejo jwa Mlungu.” (Akolo. 1:15; Yoh. 3:18) Yijiganyo yaunami yili “yakulimba mpela mapupa” soni yakusawusya kuyigwisya. (2 Akoli. 10:​4, 5) Nambope wawojo paŵagambile kombola kuyigwisya, nganatandilasoni kukulupilila yijiganyo yaunami yila.—Afil. 3:13.

6. Ligongo chichi mpaka aŵe ŵakusimichisya kuti “Chinonyelo cha [Yehofa] chakulupichika chichitama mpaka kalakala”?

⁶ Mpaka atendesoni yakulandanayo ni yajikusajiganya Baibulo yakwamba chinonyelo cha Yehofa. Patandite kukayichila yakuti Yehofa akusiŵanonyela ligongo lya yakusawusya yakusimana nayo, mpaka aliwusyeje kuti, ‘Ana kaganisye kanguka kali kakuŵajilwa?’ Alandanyeje nganisyo syawo syakayichila yakuti Yehofa akusiŵanonyela ni maloŵe gagali pa Salimo 136:​1, lyalili lilemba lyakulongolela nganiji. Ligongo chichi Yehofa akusasala kuti chinonyelo chakwe chili “chakulupichika”? Ligongo chichi maloŵe gakuti “Chinonyelo chakwe chakulupichika chichitama mpaka kalakala” agakolasile kwa maulendo 26 mu salimo jijiji? Mpela mwatuyiwonele kala, chinonyelo cha Yehofa pa ŵandu chili chijiganyo chandanda cha m’Baibulo, soni chili chakulandana ni yijiganyo yine yila yele nganiyasawusya kuyikulupilila. Mwamti nganisyo syakuti Yehofa akusiŵawona wawojo kuŵa ŵangasosekwa soni kuti ŵanganonyelaga chili chijiganyo chaunami. Myoyo akusosekwa kukanaga chijiganyo chelechi mpela yakusati pakukana yijiganyo yaunami yine yila.

7. Asale malemba gane gagakusatusimichisya kuti Yehofa akusatunonyela.

⁷ Baibulo jikwetesoni maumboni gejinji gakulosya kuti Yehofa akusatunonyela. Mwachisyasyo, Yesu jwasalile ŵakumkuya ŵakwe kuti, “Jemanja mli ŵakusosekwa mnope kupunda tujuni twejinji.” (Mat. 10:31) Yehofa jwasasilesoni kwa ŵandu ŵakwe kuti, “Tinjimpa machili, soni kumkamuchisya, tinjimchinjilichisya ni mkono wangu wamlyo wakupunda pa ngondo.” (Yes. 41:10) Maloŵegatu akugaŵecheta mwakusimichisya. Yesu nganasala kuti ‘Komboleka kuti ali ŵakusosekwa,’ soni Yehofa nganasala kuti ‘Mwine chinjimkamuchisya.’ Mmalomwakwe ŵatite, “Jemanja mli ŵakusosekwa mnope” soni ‘Tinjimkamuchisya.’ Naga akusakayichila yakuti Yehofa akusiŵanonyela pandaŵi jakusimana ni yakusawusya, malemba mpela gelega mpaka gakamuchisye mnope kuti akagambaga kuyiwona kuti Yehofa akusiŵanonyela nambo kuti asimichisyejesoni yeleyi. Malembaga gakwete maumboni gasyesyene. Mwamti kupopela kwa Yehofa soni kuganichisya mnope ya malembaga mpaka kwatendekasye kwika pakuŵecheta maloŵe gagali pa 1 Yohane 4:16 gagakusati, “Tukuchimanyilila chinonyelo chakwete Mlungu pa m’weji soni tukuchikulupilila.”a

8. Ana mpaka atende chichi naga ndaŵi sine akusakayichila yakuti Yehofa akusiŵanonyela?

⁸ Nambi uli naga ndaŵi sine akusakayichila yakuti Yehofa akusiŵanonyela? Alandanyeje mwakupikanila mumtima ni yakumanyilila yakwamba jwalakwejo. Mpaka tuchenje mwatukupikanila mumtima, nambo nganituŵa tuchenjile yajikusajiganya Baibulo yakuti Yehofa akusatunonyela ligongo yikwete maumboni gasyesyene. Myoyo, naga tukusakayichila yakuti Yehofa akusatunonyela, mpaka tuwe kuti tukukana ndamo jakwe jekulungwa jajili chinonyelo.—1 Yoh. 4:8

AGANICHISYEJE YA CHINONYELO CHAKWETE YEHOFA PA WAWOJO

9-10. Mwakamulana ni yayili pa Yohane 16:​26, 27, ana Yesu jwasakaga kutusalila chichi pajwatite, “Atati akusamnonyela jemanja”? (Alolesoni chiwulili.)

⁹ Kuganichisya yajwasasile Yesu kwa ŵakumkuya ŵakwe mpaka kutukamuchisye kulijiganya jejinji pakwamba yakusati Yehofa pakutunonyela. Jwalakwe jwatite, “Atati akusamnonyela jemanja.” (Aŵalanje Yohane 16:​26, 27.) Yesu nganasala maloŵega pakusaka kwasangalasya ŵakulijiganya ŵakweŵa. Mwamti ndime syelesi sikulosya kuti jwalakwe nganasalaga mwaŵapikanilaga mumtima jemanjaji. Mmalomwakwe, jwasalaga ya chindu chine chachili lipopelo.

¹⁰ Yesu jwaliji ali ŵasalile kala ŵakulijiganya ŵakwe kuti apopeleje kupitila mwa jwalakwe ngaŵaga kwa jwalakwejo. (Yoh. 16:​23, 24) Mwamti yaliji yakusosekwa kwa jemanjaji kumanyilila yeleyi. Ali ajimwiche ku chiwa, komboleka ŵakulijiganya ŵakweŵa akasakaga kuti apopeleje kwa Yesu. Nambosonitu paja Yesu jwaliji mjawo. Mwamti jemanjaji akayiwonaga kuti pakuŵa Yesu jwanonyelaga mnope, nikuti jwalakwejo akasachililagasoni kupikanila mapopelo gawo ni kumŵendaga Yehofa kuti ŵakamuchisyeje. Nambope, Yesu jwasalile jemanjaji kuti akaganisyaga myoyo. Yaliji myoyo ligongo lyakuti jwalakwe jwasalile jemanjaji kuti, “Atati akusamnonyela jemanja.” Yisyesyene yeleyi yili mbali ja yijiganyo yandanda ya m’Baibulo yakwamba lipopelo. Ana yeleyi yikwakwaya chamti uli wawojo? Ligongo lya kulijiganya Baibulo, wawojo ayiche pakummanyilila Yesu soni kutanda kumnonyela. (Yoh. 14:21) Nambo mpela muŵatendele ŵakulijiganya ŵa Yesu ŵa m’yaka 100 yandanda, mpaka apopele kwa Mlungu ali akwete chikulupi soni ali mkumanyilila kuti jwalakwe ‘akusiŵanonyela wawojo.’ Mwamti ndaŵi jilijose pakupopela kwa Yehofa akusaŵa ali mkulosya kuti akusakulupilila maloŵega.—1 Yoh. 5:14.

AMANYILILEJE CHACHIKUSICHATENDEKASYA KUKAYICHILA

11. Ligongo chichi Satana mpaka asangalale patukukayichila yakuti Yehofa akusatunonyela?

¹¹ Ana chichi chachikusatutendekasya kukayichila yakuti Yehofa akusatunonyela? Komboleka ajanjile kuti ali Satana. Naga ajanjile myoyo nganajasika mnope. Tukuŵecheta yeleyi ligongo lyakuti Satanaju akupita “mchisosasosa jwakuti amlye.” Mwamti mpaka asangalale mnope patutandite kukayichila yakuti Yehofa akusatunonyela. (1 Pet. 5:8) Nambosonitu paja chinonyelo chamtendekasisye Yehofa kupeleka mbopesi jakutuwombola. Myoyo, Satana akusasaka kuti m’weji tuyiwoneje kuti tuli ŵakulemwa mnope mwamti mbopesiji nganijiŵa jitukamuchisye. (Aheb. 2:9) Nambo ana ŵani ŵakusasangalala patukukayichila yakuti Yehofa akusatunonyela? Satana ni jwakusasangalala. Nambosoni ana ŵani ŵakusasangalala patutengwiche ni kwika pakuleka kumtumichila Yehofa? Ali Satana pejo. Satana akusasaka kuti tuganisyeje kuti Yehofa jwangatunonyelaga. Nambo yisyesyene yakwe yili yakuti jwalakwejo ni jwele Yehofa ŵalesile kumnonyela. Nambope, chimo mwa “yitega” yakusakamulichisya masengo jwalakwe, chili kututendekasya kuganisyaga kuti m’weji ni ŵangatukusanonyeledwa ni Yehofa soni kuti jwatulesile. (Aef. 6:11) Mwamti kumanyilila yakulingalinga kutenda Satanayi, mpaka kutulimbikasye ‘kumkana’ jwalakwe.—Yak. 4:7.

12-13. Ana ungali umlama wetu ukusatutendekasya chamti uli kukayichila yakuti Yehofa akusatunonyela?

¹² Panasoni chindu chine champaka chitutendekasyeje kukayichila yakuti Yehofa akusatunonyela. Chindu chakwe chili ungali umlama wetu. (Sal. 51:5; Alo. 5:12) Ulemwa wajonasile unasi wetu ni Yehofa. Mwamti wajonasilesoni nganisyo syetu, mtima wetu, soni chilu chetu.

¹³ Ulemwa ukusatutendekasya kuti tuyiwoneje yindu mwangaŵajilwa. Yeleyi yikusatendekasya kuti tulijimbeje magambo, tulagasicheje nganisyo, tulipikaneje kuŵa ŵangateteyeka soni kutenda sooni. Komboleka kuti nganisyo syelesi mpaka situyichile patutesile ulemwa. Nambosoni ligongo lyakuti Mlungu nganatupanganya kuti tuŵe ŵakulemwa, kumbuchila yeleyi mpaka kututendekasyeje kulagasika nganisyo. (Alo. 8:​20, 21) Mpela mwayikusaŵela kuti galimoto jajikwete litayala lyepwe nganijiŵa jikamwile chenene masengo, myoyosoni ŵandu ŵangali umlamawe nganituŵa tutesile yindu chenenepe mpela mwatukatendele yikaŵe kuti tuli ŵamlama. Mwamti yili yangasimonjesya kuti ndaŵi sine tukusakayichilaga yakuti Yehofa akusatunonyela. Myoyo nganisyo syelesi pasituyichile, tukusosekwa kukumbuchilaga kuti Yehofa ali ‘Mlungu jwamkulungwa soni jwakusatenda yakusimonjesya . . . [nambosoni] jwakusiŵalosya chinonyelo chakulupichika ŵandu ŵakusamnonyela soni kupikanila malamusi gakwe.’—Neh. 1:5.

14. Ana kuganichisya mnope ya mbopesi jakutuwombola mpaka kutukamuchisye chamti uli kutyosya nganisyo syakuti Yehofa jwangatunonyelaga? (Aloma 5:8) (Alolesoni libokosi lyakuti “Alichenjeleje ku ‘Ulemwa Wele Ukwete Machili Gakulambusya.’”)

¹⁴ Yili yisyene kuti ndaŵi sine mpaka tuyiwoneje kuti nganituŵa ŵakuŵajilwa kunonyeledwa ni Yehofa. Mwamti yisyesyene yakwe yili yakuti ngatukusaŵajilwa kunonyeledwa ni Yehofaju. Ni ligongo lyakwe chinonyelo chakwechi chili chapadela mnope. Mwamti pangali chilichose champaka tutende kuti tuŵajilwe kunonyeledwa ni Mlungu. Nambope, mbopesi jakutuwombola jikusasiŵa yakulemwa yetu. Yehofa jwatesiletu yeleyi ligongo lyakuti akusatunonyela. (1 Yoh. 4:10) Akumbuchilejesoni kuti paja Yesu jwayiche kukwakulupusya ŵandu ŵakulemwa ngaŵaga ŵakulungama. (Aŵalanje Aloma 5:8.) Pangali jwalijose jwetuwe jwampaka atende yindu mwangalemwesya chilichose, mwamti Yehofa jwangajembecheyagasoni yeleyi. Myoyo, kumanyilila kuti ungali umlama wetu mpaka ututendekasye kukayichila yakuti Yehofa akusatunonyela, mpaka kutukamuchisye kulimbana ni nganisyo syelesi.—Alo. 7:​24, 25.

ASAGULEJE KUŴAPE ŴAKULUPICHIKA

15-16. Ana mpaka tuŵe ŵakusimichisya chichi naga tukupitilisya kuŵa ŵakulupichika soni ligongo chichi? (2 Samuyele 22:26)

¹⁵ Yehofa akusaka kuti tusagule chenene mwa “kumnyambatila jwalakwejo.” (Det. 30:​19, 20) Naga tukutenda yeleyi, tuchiŵa ŵakusimichisya kuti jwalakwe ngasaleka kuŵa jwakulupichika kwa m’weji. (Aŵalanje 2 Samuyele 22:26.) Mwamti naga tukupitilisya kuŵa ŵakulupichika kwa Yehofa, mpaka tuŵe ŵakusimichisya kuti jwalakwe chachitukamuchisya kupilila yakusawusya yiliyose yampaka tusimane nayo apano.

¹⁶ Mpela mwatuyiwonele kala, tukwete magongo gejinji gakututendekasya kuŵa ŵangatenganyika patukusimana ni yakusawusya. Tukumanyilila kuti Yehofa akusatunonyela soni chachitukamuchisya. Mwamti yeleyi ni yajikusajiganya Baibulo. Patutandite kukayichila yakuti jwalakwe akusatunonyela, tuganichisyeje mnope yatukumanyilila kuti yili yisyesyene mmalo mwaganichisya mwatukupikanila mumtima. Myoyo, kwende ndaŵi syosope tukulupilileje chijiganyo chandanda cha m’Baibulo chakuti chinonyelo cha Yehofa chakulupichika chichitama mpaka kalakala.