1925​​—⁠Yaka 100 Yipiteyo

KULEPELECHEKWA KWA YINDU YAŴAJEMBECHEYAGA

Ŵakulijiganya Baibulo ŵajinji ŵajembecheyaga kuti pachilambopa Paladaiso chayiche mu 1925. Ligongo chichi jemanjaji ŵajembecheyaga yeleyi? M’bale Albert Schroeder, jwele kaneko jwatumichile mu Likuga Lyakulongolela jwatite, “Twakulupililaga kuti ŵasagulwe chachijawula kwinani mu 1925, soni ŵandu ŵakulupichika mpela Abulahamu soni Daudi chachijimuka ku chiwa ni kulongolelaga yindu pachilambopa mu Uchimwene wa Mlungu.” Myoyo, chakachi pachamalaga ni ngatendekwa yaŵajembecheyagayo, ŵane mwa ŵakulijiganya Baibulowo ŵatengwiche.—Mis. 13:12.

Atamose kuti jemanjaji ŵatengwiche, Ŵakulijiganya Baibulo ŵajinji ŵapitilisye kulipeleka mnope pamasengo gakulalichila. Mwamti jemanjaji ŵatandite kumanyilila kuti masengo gakulalichila galiji gakusosekwa mnope. Kwende tulole gane mwa masengo gaŵatesile kuti akomboleje kuŵandisya ngani sya Uchimwene pachilambo chosope.

KUTAŴA MALO GEJINJI GAGULUCHISYA NGANI

Panyuma pakutaŵa malo gaguluchisya ngani gakolanjidwa kuti WBBR, Ŵakulijiganya Baibulo ŵataŵile malo gane gagagulusyaga ngani kuti ŵayichileje ŵandu ŵakutali. Maloga ŵataŵile chiŵandika msinda wa Chicago, Illinois, soni gamanyikaga ni lina lyakuti WORD. M’bale Ralph Leffler juŵaliji injiniya pamaloga, jwatite, “Ŵandu ŵa mmadela gakutalichila ŵakombolaga kupikanila nawo ngani syaŵagulusyaga pamaloga.” Mwachisyasyo, liŵasa line lyalyatamaga mu msinda wa Pilot Station ku Alaska wawaliji pa lutando lwa makilomita 5,000 kutyochela papaliji maloga, lyapikanile nawo ngani jandanda jaŵagulwisye pa wayilesiji. Panyuma pakupikanila, liŵasali lyalembile chikalata chakwayamichila ŵandu ŵaŵakamulaga masengo pamalopa ligongo lyakwakamuchisya kupikanila ngani jakulimbikasya.

Sanja ja Mlonda ja Disemba 1, 1925 jasasile ligongo lyakwe ŵandu ŵajinji ŵakombolaga kupikanila wayilesiji. Sanjaji jatite, “Wayilesi ja WORD jaliji mu gulu ja mawayilesi gekulungwakulungwa ku United States gagapikanikaga m’madela gakutalichila. Mwamti ŵandu ŵaŵatamaga kungopokolyuŵa soni kungapililolyuŵa kwa United States ŵakombolaga kupikanila nawo wayilesiji kupwatikaposoni madela ga ku Cuba soni chakumpoto kwa chilambo cha Alaska. Mwamti ŵandu ŵajinji ŵele nganakola upile wakupikanila ngani syambone ŵasangalalaga papikanile ŵayilesiji.”

Pandaŵi jijiji, Ŵakulijiganya Baibulo ŵalinganyagasoni yakuti akole malo gane gekulungwa gaguluchisya ngani syambone ku Canada. Mu 1924 ŵaliji ali ataŵile malo gaguluchisya ngani gakolanjidwa kuti CHUC ku Saskatoon, mumsinda wa Saskatchewan. Jeleji jaliji jimo mwa mawayilesi gandanda gagulusya ya dini ku Canada. Nambo pachayikaga chaka cha 1925, malo gaguluchisya nganiga gasosekwaga kugasamisya. Myoyo, gulu jetu jasamisye yipangiso yawo yaguluchisya ngani ni kuyijawusya mnyumba jine jaŵasumile ku Saskatoon soni jaŵajilinganyisye kuti ajikamulichisyeje masengo pagulusya nganisi.

Yili yakusangalasya kuti maloga gakamuchisye ŵandu ŵaŵatamaga mmadela gakutalichila ga kumusi ku Saskatchewan kuti akole upile wakupikanila ngani syambone. Mwachisyasyo, Mayi Graham ŵaŵatamaga mu tawuni jine jakutali ŵalembile chikalata chakuŵenda mabuku. Mayi ŵeleŵa ŵalembile chikalatachi panyuma pakupikanila ngani jaŵagulwisye pa wayilesiji. Pakwamba ya chikalatachi M’bale George Naish jwasasile kuti, “Patwagambile kupochela chikalatachi, ndaŵi jijojo twatumichisye buku ja Chisungu jakuti Studies in the Scriptures.” Mkanipapite ndaŵi, mayi ŵala ŵatandite kulalichila ngani syambone sya Uchimwene atamose kumadela ga kutali.

KUPIKANICHISYA YISYESYENE YAKUSOSEKWA MNOPE

Sanja ja Mlonda, ja Malichi 1, 1925, jakwete ngani jakusosekwa mnope ja mtwe wakuti, “Kupagwa kwa Mtundu.” Ligongo chichi nganiji jaliji jakusosekwa mnope? Yaliji myoyo ligongo lyakuti kwakandaŵi nditu Ŵakulijiganya Baibulo ŵamanyililaga kuti Satana akwete gulu jajikwete mbali jangawoneka ni meso ja misimu jakusakala kwinani soni mbali jine pachilambopa jajikusapanganyidwa ni ŵadini, ŵamalonda soni ŵandale. Nambope, kupitila munganiji, “kapolo jwakulupichika ni jwalunda” jwakamuchisye abale ni alongo kumanyilila kuti nombenajo Yehofa akwete gulu jakwe jajili jakulekangana mnope ni gulu ja Satana mwamti magulu gaŵiliga gangamwelanaga mesi. (Mat. 24:45) Konjechesya pelepa, kapoloju jwalondesisye kuti Uchimwene wa Mlungu wapagwile mu 1914. Mwamti ‘ngondo jajatendekwe kwinani’ m’chakachi jatendekasisye kuti Satana ni yiwanda yakwe ŵatopole kwinani ni kwaponya pachilambopa.—Chiw. 12:​7-9.

Ŵane mwa Ŵakulijiganya Baibuloŵa yasawisye kupikanichisya mfundo jeleji. Pakumanyilila kuti ŵane yichasawusya kupikanichisya mfundoji, nganiji jatite, “Naga ŵane mwa ŵandu ŵachaŵalanje Sanja ja Mlonda jeleji ngakamulana najo mfundoji, akusosekwa kuŵa ŵakuwusimana mtima soni kutenda yindu mwakusamala mnope pakwajembecheya Ambuje, ni chakulinga chakuti apitilisye kukola mtima wambone.”

M’bale Tom Eyre jwelesoni jwaliji mkopotala (apano tukusati mpayiniya) jwakutyochela ku Britain, jwasasile mwajakwayile nganiji Ŵakulijiganya Baibulo ŵajinji. Jwalakwe jwatite, “Abale ŵasangalele mnope ni yaŵatite pakulilondesya lilemba lya Chiwunukuko chaputala 12. Patwagambile kumanyilila kuti Uchimwene awutamilikasisye kwinani, twasangalele mnope mwamti twasachililaga kwasalila ŵane ngani jamboneji. Yeleyi yatulimbikasisye kuti tulipelecheje mnope pamasengo gakulalichila yayatupele upile wakulola mwaŵatendelaga Yehofa pakwalongolela ŵandu ŵakwe ku yindu yakusosekwa mnope.”

KUMTENDELA UMBONI YEHOFA

Masiku agano, ŵa Mboni sya Yehofa akusanonyela kuŵecheta maloŵe ga pa Yesaya 43:​10, gagakusati, “Yehofa akuŵecheta kuti, ‘Jemanja mli mboni syangu. Elo, ŵakutumichila ŵangu ŵanamsagwile.’” Nambope, mkanichiyiche chaka cha 1925 lilembali nganalikamulichisyaga mnope masengo m’mabuku getu. Nambo kaneko yachenjile. Mwamti mu 1925, Sanja ja Mlonda jalondesisye mnope yayikusasimanikwa pa Yesaya 43:10 ni 12 m’magasini gakwana 11.

Chakumbesi kwa mwesi wa Ogasiti 1925, Ŵakulijiganya Baibulo ŵatesile msongano wachigawo ku Indianapolis, ku Indiana. Mu utenga wakwapochela ŵandu wawaliji pa pologalamu ja msonganowu, M’bale Joseph F. Rutherford jwalembile kuti, “Tuyiche pamsongano awuno . . . kuti tupatesoni machili kutyochela kwa Ambuje gakutukamuchisya kukamulasoni masengo gakulalichila mwakulipeleka mnope mpela mboni syakwe.” Kwa masiku gosope 8 gamsonganowu, ŵandu ŵaŵasimanikwe pamsonganowu ŵalimbikasisye kuti akamulichisyeje masengo mpata uliwose wawupatikene pakwasalila ŵane yakwamba Yehofa.

Lyakuŵeluka pa 29 Ogasiti, M’bale Rutherford jwaŵechete ngani ja mtwe wakuti, “Kwaŵenda Kuti Akamuchisye Nawo.” Munganiji, m’baleju jwalondesisye mnope kusosekwa kwa kulalichila. Yine mwa yindu yajwalondesisye munganiji yaliji yakuti, “Yehofa akwasalila ŵandu ŵakwe kuti . . . : ‘Jemanja mli mboni syangu . . . kuti une ndili Mlungu.’ Kaneko Yehofa ŵalamwile jemanjajo kuti, ‘Mjinyakule mbendela penani kuti mitundu ja ŵandu jiloleje.’ Mwamti pachilambopa ŵandu ŵele pewo ŵampaka atendele umboni ya Yehofa ali ŵandu ŵakusalongoleledwa ni msimu wakwe weswela soni ŵali mboni syakwe.”—Yes. 43:12; 62:10.

Ali amalisisye kuŵecheta nganiji, M’bale Rutherford jwaŵalasile chikalata chachakwete mtwe wakuti, “Utenga Wakupeleka Chembecheyo.” Chikalatachi chalondesyaga yakuti Uchimwene wa Mlungupe ni wampaka uyikasye yindu yambone mpela, “mtendele, kwenda chenene kwa yindu, kumasya yilwele, umi wambone, soni kusangalala kwangamala.” Kaneko chikalatachi ŵachigopolele m’yiŵecheto yejinji mwamti kaneko ŵachitesile kuŵa chipepala chagaŵila mu utumiki. Mwamti abale ni alongo ŵagaŵile yipepalayi yakwana 40 miliyoni.

Kwa yaka yakuyichisya, Ŵakulijiganya Baibulo ŵaliji mkanaŵe kutanda kamulichisya masengo lina lyakuti Mboni sya Yehofa. Nambope jemanjaji ŵaliji ali atandite kupikanichisya kusosekwa kwakutendela umboni lina lya Yehofa.

KUWUJILA KWA ŴANDU ŴAŴASAKAGA KUMANYILILA YEJINJI

Chiŵalanjilo cha Ŵakulijiganya Baibulo pachakwelaga, ŵalinganyisye yakuti tuwujilesoni kwa ŵandu ŵaŵasakaga kumanyilila yejinji yakwamba ngani syambone. Myoyo, panyuma pakugaŵila kapepala kakuti Utenga Wakupeleka Chembecheyo, buku ja Bulletina jasasile kuti, “Alinganye yakutenda maulendo gakuwilisya kumalo kwele ŵakulalichila ŵagaŵile kapepala kakuti Utenga Wakupeleka Chembecheyo.”

Kabuku ka Bulletin ka Januwale 1925 kakwete lipoti lyakuyichisyali kutyochela kwa Jwakulijiganya Baibulo jwine jwa ku Plano ku Texas. Lipotili lyatite, “Tuli ŵakusangalala kuti madela gatwatesile maulendo gakuwilisya ŵandu ŵakwe akupikanila mnope ngani syambone kulekangana ni madela gane. Mwamti ka tawuni ka mudela jetu tuŵele tuli mkwawulako kwa maulendo msano m’yaka 10 yipiteyo. . . . Pachangakaŵapa, Mlongo Hendrix ni mama ŵangu ŵapite kukutenda maulendo gakuwilisya. Mwamti ŵagaŵile mabuku gejinji kulekangana ni kalakose.”

Nambosoni mkopotala jwine jwakusatama m’chilambo cha Panama jwatite, “Ŵandu ŵajinji ŵaŵakanile kupikanila patwayiche panyumba jawo kandanda ŵachenjile ndamo jawo ndili mbujileko kaŵili soni katatu. Mwamti masengo gejinji gandesile chaka chelechi gali kuwujilasoni kwa ŵandu ŵatwaŵechetene nawo munyumamu. Mwamti nasangalele mnope ni yindu yaŵatesile ŵajinji mwa jemanjaji.”

KUGANICHISYA YA MSOGOLO

Mu chikalata chakwe cha pachaka chakwawula kwa akopotala wosope, M’bale Rutherford jwalondesisye mwagajendele masengo gakulalichila m’chaka chelecho, soni mwagachijendela m’chaka chakuyichisya. Jwalakwe jwatite, “M’chaka chimasilechi twakwete upile wekulungwa wakwalimbikasya ŵandu ŵajinji ŵaŵatengwiche. Mwamti masengoga gatendekasisye kuti jemanja aŵe ŵakusangalala mnope . . . Mu chaka chakuyichisyachi chachikola upile wakwalalichila ŵandu yakwamba Mlungu soni uchimwene wakwe soni kwalosya jemanjaji ŵali ŵakulambila ŵasyesyene. . . . Myoyo kwende wosope tupitilisye kuŵecheta maloŵe gakumchimbichisya Mlungu jwetu soni Mwenye jwetu.”

Chakumbesi kwa chaka cha 1925, abale ŵalinganyaga mapulani gakonjechesya malo ga ku Brooklyn. Mwamti chaka cha 1926, gatandite masengo gekulungwa gakutaŵa maloga gele gulu jetu kaliji kandanda kugakamula.