Nganituŵa Jika

1-2. (a) Ligongo chichi yili yakupikanika kuŵecheta kuti ngatukusaŵa jika patusimene ni yakusawusya? (b) Ana chitukambilane chichi munganiji?

PATUSIMENE ni yakusawusya yekulungwa, mpaka tutande kuyiwona mpela kuti tuli jikajikape m’kaboti kamwana pasikati pa nyasa pandaŵi jele kukutenda wula soni chimbungo chamachili. Nambope patusimene ni yakusawusya ngatukusaŵaga jika. Mwamti Atati ŵetu ŵachinonyelo Yehofa ŵangagamba kuyiwonape yakusawusya yetu, nambo akusaŵa ŵakusachilila kutukamuchisya. Yehofa jwayikene pakwasalila ŵakutumichila ŵakwe ŵakulupichika kuti, ‘Tinjimkamuchisya.’—Yes. 41:10.

² Munganiji, chitukambilane yakusatenda Yehofa pakutukamuchisya mumbali syakuyichisyasi, (1) pakutulongolela, (2) pakutupa yakusosechela ya paumi wetu, (3) pakutuchenjela, soni (4) pakutulimbikasya. Yehofa akusatusimichisya kuti mulimose mwampaka yiŵele, jwalakwe ngasatuliŵalila soni ngasatuleka. Mwamti nganituŵa jika.

YEHOFA AKUSATULONGOLELA

3-4. Ana Yehofa akusatulongolela chamti uli? (Salimo 48:14)

³ Aŵalanje Salimo 48:14. Yehofa jwangajembecheyaga kuti chitulilongoleleje jika. Ana masiku agano jwalakwe akusiŵalongolela chamti uli ŵakutumichila ŵakwe ŵakulupichika? Litala limo lyakusatendela yeleyi lili kupitila mu ngani syasikusasimanikwa m’Baibulo. (Sal. 119:105) Mwamti kupitila m’Maloŵe gakwe, Yehofa akusatukamuchisya kuti tusaguleje chenene yindu soni kuti tukusyeje ndamo syambone syasikusatutendekasya kuŵa ŵakusangalala apano soni kola chembecheyo cha umi wangamala.a Mwachisyasyo, jwalakwe akusatujiganya kuti tukasungaga chakulukosi, tuŵeje ŵakuwona mtima mu yindu yosope, soni kuti twanonyeleje ŵane ni mtima wosope. (Sal. 37:8; Aheb. 13:18; 1 Pet. 1:22) Patukulosya ndamo syambone mnopesi, tukusaŵaga achinangolo ŵambone, tukusakola maŵasa gambone, nambosoni tukusakamulana ni achimjetu.

⁴ Kupitila m’Maloŵe gakwe, Yehofa akusatusalilasoni yisyasyo yisyesyene ya ŵandu ŵaŵasimanaga ni yakusawusya mpela yatukusimana nayo m’weji. (1 Akoli. 10:13; Yak. 5:17) Patukuŵalanga yisyasyo yeleyi soni kuyikamulichisya masengo yatulijiganyisyeyo, yikusatukamuchisyaga m’matala gaŵili gakuyichisyaga. Litala lyandanda, tukusamanyilila kuti nganituŵa jika ŵatukusimana ni yakusawusya. Mwamti ŵandu ŵane ŵakombwele kupilila yakusawusya yakulandana ni yatukusimana nayo m’ŵeji. (1 Pet. 5:9) Soni litala lyaŵili, tukusalijiganya yampaka tutende kuti tumalane ni yakusawusya yetu.—Alo. 15:4.

5. Ana Yehofa akukamulichisya masengo ŵandu ŵapi pakutulongolela patukwenda pa msewu wakuja kupata umi wangamala?

⁵ Yehofa alinganyisyesoni dongosolo jakuti ŵakulupilila achimjetu atulongoleleje.b Mwachisyasyo, ŵakulolela madela akusajendela mipingo mwakutamilichika kuti atulimbikasyeje. Ngani syakusaŵechetaga sikusalimbisya chikulupi chetu soni kutukamuchisya kuti tupitilisye kuŵa ŵakamulana mnope. (Mase. 15:40–16:5) Nombenawo achakulungwa ŵa mumpingo akusatenda yakomboleka pakumkamuchisya jwakulalichila jwalijose kuti aŵe paunasi wambone ni Yehofa. (1 Pet. 5:​2, 3) Achinangolo akusiŵalongolelaga ŵanache ŵawo mwausimu, kŵakamuchisya kuti aganisyeje chenene soni kuti akole ndamo syambone. (Mis. 22:6) Nambosoni alongo ŵachikulile akusiŵakamuchisyaga alongo ŵachisikana mwakuŵa yisyasyo yambone, mwakwasalila yindu yakamuchisya, soni mwakwalimbikasya jemanjaji.—Tit. 2:​3-5.

6. Ana tukusosekwa kutenda chichi kuti yakusatenda Yehofa pakutulongolela yitukamuchisyeje?

⁶ Yehofa atesile yakomboleka mwakutupa malangiso gatukusasosechela. Ana m’weji mpaka tulosye chamti uli kuti tukusayamichila yatutendele Yehofayi? Pa Misyungu 3:​5, 6 pakusati, “Mumkulupilileje Yehofa ni mtima wenu wosope, Soni mkaliwonaga kuti mli ŵakupikanichisya yindu.” Patukutenda yeleyi, ‘jwalakwe chachijongola matala getu,’ mwakutukamuchisya kuti tuŵambale yakusawusya yejinji ni kuŵaga ŵakusangalala. Kusala yisyene, tukusamyamichila mnope Yehofa ligongo lyakuti akusatumanyilila chenene soni akusatupa malangiso mwachinonyelo.—Sal. 32:8.

YEHOFA AKUSATUPAGA YAKUSOSECHELA YA PAUMI WETU

7. Ana Yehofa akusatupa yakusosechela ya paumi wetu mmatala gane gapi? (Afilipi 4:19)

⁷ Aŵalanje Afilipi 4:19. Kupwatika pakutulongolela mwausimu, Yehofa akusatukamuchisyasoni kuti tupateje yakulya, yakuwala, soni malo gagona. (Mat. 6:33; 2 Ates. 3:12) Atamose kuti yili yachipago kudandawulaga ni mwampaka tupatile yakusosechela yakuchilu, nambope Yehofa akusatulimbikasya kuti tukadandawulaga mnope ni yindu yeleyi. (Mat. 6:25) Yehofa akusatenda yeleyi, ligongo lyakuti jwalakwe ngasiŵaleka ŵakutumichila ŵakwe ŵakulupichika pandaŵi jakusosechela chikamuchisyo. (Mat. 6:8; Aheb. 13:5) Mwamti ndaŵi syosope tukusosekwa kulupilila mnope yajwasasile jwalakwejo kuti chachitusamalila.

8. Ana Yehofa ŵamtendele yamti uli Daudi?

⁸ Aganichisye yaŵatite Yehofa pakumkamuchisya Daudi. Kwa yaka yosope yele Daudi jwatamaga umi wakutilatila, Yehofa jwampaga jwalakwejo pampepe ni achalume ŵaŵajendaga najo yindu yaŵasosechelaga. Mwamti Daudi pajwaganichisyaga yaŵatesile Yehofa pakumkamuchisya, jwalembile kuti, “Une naliji mwanache nambo apano ngusile, Nambo nganinamwoneje mundu jwakulungama ali amjasile, Kapena ŵanache ŵakwe ali mkuŵendaŵenda yakulya.” (Sal. 37:25) Mpela mwayaŵelele ni Daudi, kombolekasoni wawojo ayiweni yaŵele ali mkutenda Yehofa pakwakamuchisya wakutumichila ŵakwe ŵakulupichika.

9. Ana Yehofa akusiŵakamuchisya chamti uli ŵandu ŵakwe pasitendekwe ngosi sya chilengedwe? (Alolesoni yiwulili.)

⁹ Yehofa akusiŵasamalilasoni ŵakutumichila ŵakwe pasitendekwe ngosi sya chilengedwe. Mwachisyasyo, pajagwile sala m’yaka 100 yandanda, Aklistu ŵa mmadela gane ŵatumichisye yakulya abale ni alongo ŵawo ŵaŵalagaga ni salajo. (Mase. 11:​27-30; Alo. 15:​25, 26) Nombe masiku aganosoni, ŵandu ŵa Mlungu akusiŵakamuchisya Aklistu achimjawo ŵakusosechela chikamuchisyo. Pasitendekwe ngosi syachilengedwe, Yehofa akusiŵatendekasya ŵandu ŵakwe kuti ŵakamuchisye achimjawo ŵakwayidwe ni ngosisi mwakwapa yindu mpela yakulya, mesi, yakuwala, soni chikamuchisyo cha mtela. Nombenawo abale ŵakusatenda utumiki wa yakutaŵataŵa, akusalinganya nyumba sya abale soni Nyumba sya Uchimwene syasijonasiche. Konjechesya pelepa, ŵakutumichila ŵa Yehofa akusalinganya yakwalimbikasya mwachitema achimjawo ŵasimene ni yakusawusyayi.c

10-11. Ana alijiganyisye chichi pa yindu yaŵasimene nayo Borys?

¹⁰ Yehofa akusiŵakamuchisyasoni ŵandu ŵangakusamtumichila. Pakusaka kumsyasya jwalakwe, m’wejisoni tukusalingalinga kwakamuchisya ŵandu ŵangakusamtumichilaga Yehofa. (Agal. 6:10) Patukutenda yeleyi, yikusiyakamuchisyaga jemanjaji kuti alijiganye yakwamba Yehofa. Aganichisye yayamtendechele jwamlume jwine lina lyakwe Borys. Jwalakweju akusatama ku Ukraine soni akusakamula masengo gakulolela sukulu jinejakwe. Atamose kuti jwalakweju nganaŵa jwa Mboni sya Yehofa, nambope ndaŵi syosope jwatendelaga yambone soni kuchimbichisya yakusakulupilila ŵanache ŵa mboni ŵakusalijiganya pa sukulu jakwe. Jwamlumeju pajwasagwile kutila ngondo mudela jaŵatamaga ni kwawula ku dela jine, abale ni alongo ŵetu ŵamkamuchisyaga. Kaneko, jwalakwe jwasimanikwe nawo pa Chikumbuchilo cha chiwa cha Klistu. Pajwaganichisyaga yayamtendecheleyi, jwalakwe jwatite, “Ŵa Mboni sya Yehofaŵa ŵalosyaga chinonyelo soni kusamalila. Mwamti ngwayamichila mnope jemanjaji.”

¹¹ M’wejisoni mpaka twasyasye Atati ŵetu ŵakwinani mwakwalosya chinonyelo ŵandu ŵakusosechela chikamuchisyo. Mwamti tukusosekwa kutenda yeleyi mwangajigalila kuti jemanjajo ali ŵakulupilila achimjetu kapena iyayi. (Luk. 6:​31, 36) Tukusakulupilila kuti yatukusalingalinga kutenda pakwalosya ŵane chinonyelo, yichakamuchisya jemanjajo kuti chaŵe ŵakulijiganya ŵa Klistu. (1 Pet. 2:12) Mwamti chinga jemanjaji chachisagula kumtumichila Yehofa kapena iyayi, m’weji tuchiŵape ŵakusangalala ligongo lya kupeleka.—Mase. 20:35.

YEHOFA AKUSATUCHENJELA

12. Ana Yehofa jwasasile kuti chachachenjela chamti uli ŵandu ŵakwe? (Salimo 91:​1, 2, 14)

¹² Aŵalanje Salimo 91:​1, 2, 14. Yehofa jwasasile kuti chatuchenjeleje mwausimu masiku agano. Mwamti jwalakwe ngasakunda kuti Satana asokonasye kulambila kweswela. (Yoh. 17:15) Sonitu apano tukwete chikulupi chakuti payichitanda “yakusawusya yekulungwa” Yehofa chachikwanilisya yajwaŵechete kuti chachituchenjela mwausimu soni mwakuchilu.—Chiw. 7:​9, 14.

13. Ana Yehofa akusamchenjela chamti uli mundu jwalijose pajika?

¹³ Ana Yehofa akusamchenjela chamti uli mundu jwalijose pajika? Kupitila m’Maloŵe gakwe, Yehofa akusatukamuchisyaga kuti tulekanganyeje chambone ni chakusakala. (Aheb. 5:14) Mwamti patukukamulichisya masengo mfundo sya m’Baibulo, tukusalichenjelaga ku yindu yampaka yituwulasye mwausimu soni mwakuchilu. (Sal. 91:4) Kupwatika pelepa, Yehofa akusatuchenjelasoni kupitila mumpingo. (Yes. 32:​1, 2) Mwamti patukusyoŵekana mnope ni ŵandu ŵakusamnonyela Yehofa soni kukuya mfundo syakwe tukusapata machili gakutukamuchisya kuŵambala yakusakala.—Mis. 13:20.

14. (a) Ligongo chichi Yehofa jwangatuchenjelaga mu yakusawusya yetu yosope? (b) Ana lilemba lya Salimo 9:10 likusatusimichisya ya chichi? (Alolesoni maloŵe gamwiŵanda.)

¹⁴ Ndaŵi sine munyumamu, Yehofa jwaŵele ali mkwakulupusya ŵakutumichila ŵakwe ku yindu yakwawulasya. Nambope, jwalakwe nganatendaga yeleyi ndaŵi syosope. Mwamti Baibulo jikusasala kuti yindu yangayijembecheya mpaka yimtendechele jwalijose. (Jwak. 9:11) Kutandila kalakala, Yehofa aŵelesoni ali mkukunda kuti ŵakutumichila ŵakwe asimane ni yakusawusya kapena kwikana pakuwa kwene ni chakulinga chakuti Satana awonechele kuti ali jwaunami. (Yob. 2:​4-6; Mat. 23:34) Yeleyi ni yayikutendekwasoni masiku agano. Myoyo, atamose kuti Yehofa nganaŵa atyosisye yakusawusya yetu, nambo tuli ŵakusimichisya kuti jwalakwe nganaŵa ŵalesile ŵandu ŵakusamnonyela.d—Sal. 9:10.

YEHOFA AKUSATULIMBIKASYA

15. Ana tukusalimbikasidwa chamti uli ni lipopelo, Maloŵe ga Mlungu, soni Aklistu achimjetu? (2 Akolinto 1:​3, 4)

¹⁵ Aŵalanje 2 Akolinto 1:​3, 4. Ndaŵi sine, mpaka tusimane ni yindu yampaka yitutendekasye kulila soni kulagasika nganisyo. Komboleka kuti wawojo akusimana ni yakusawusya yayikwalagasya nganisyo soni kwatendekasya kuti atendeje lipowo. Ana pana jwalijose jwakupikanichisya mwakupikanila wawojo? Elo, Yehofa akwapikanichisya wawojo. Mwamti jwalakwe ngakusagamba kupikanichisyape mwatukupikanila, nambo “akusatulimbisya mu yakusawusya yetu yosope.” Ana jwalakwe akusatenda chamti uli yeleyi? Patukupopela kwa Yehofa, jwalakwe akusatupa “mtendele wa Mlungu wele ukusapunda kupikanichisya yindu kulikose.” (Afil. 4:​6, 7) Yehofa akusatulimbikasyasoni patuŵalasile maloŵe gakwe m’Baibulo. Kupitila m’Maloŵe gakwega, jwalakwe akusatusalila yakusati pakutunonyela, akusatujiganya kuti tuŵe ŵalunda, soni akusatupaga chembecheyo. Konjechesya pelepa, misongano ja Chiklistu jikusatukamuchisya kupata abale ni alongo ŵakusatunonyela soni jikusatukamuchisya kupata mfundo sya m’Baibulo syakulimbikasya.

16. Ana alijiganyisye chichi payindu yayamtendechele Nathan ni Priscilla?

¹⁶ Kuti tupikanichisye yakusatenda Yehofa pakutulimbikasya kupitila m’Maloŵe gakwe, kwende tuganichisye yayamtendechele Nathan ni Priscilla ŵakusatama ku United States. Yaka ya munyumamu, liŵasali lyaganichisye ya kusamila kudela jine kukwasosekwaga ŵakulalichila ŵajinji. Nathan jwatite, “Twakulupililaga kuti Yehofa chatupe upile ligongo lya kulipeleka kwetu.” Nambope, jemanjaji ali akopochele kudelaji ŵatandite kulwala soni nganapataga mbiya. Mwamti ŵawujile kumangwawo kwelesoni ŵapitilisye kulaga ligongo lya kusoŵa kwa mbiya. Nathan jwasasilesoni kuti, “Naliwusyaga kuti ligongo chichi Mlungu nganatukamuchisya mpela mwatwaganichisyaga? Mwamti natandite ganisya kuti mwine pana chanalemwisye.” Nambo pali papitile ndaŵi, liŵasali lyatandite kuyiwona kuti Mlungu nganiŵaleka jika pandaŵi jiŵasosekwaga chikamuchisyo. Nathan jwasasilesoni kuti, “Pandaŵi jakusawusyaji, Baibulo jaliji mpela mjetu jwalunda juŵatupaga malangiso soni kutulimbikasya. Mwamti kuganichisya mnope yaŵatiga Yehofa pakutukamuchisya kupilila yakusawusya, kwatukamuchisye kulupilila kuti chachitukamuchisyasoni patuchisimana ni yakusawusya msogolo.”

17. Ana Mlongo Helga ŵalimbikasidwe chamti uli? (Alolesoni chiwulili.)

¹⁷ Nombenawo abale ni alongo ŵetu mpaka atulimbikasye. Ana jemanjaji mpaka atulimbikasye chamti uli? Aganichisye yayamtendechele Mlongo Helga jwakusatama ku Hungary. Kwa yaka yejinji, mlongoju jwaŵele ali mkulaga ni yakusawusya yejinji yayamtendekasyaga kuti alajeje mnope nganisyo. Nambope pakuganichisya yayamtendechele munyumamu, jwalakwe akusayiwona kuti Yehofa jwamlimbikasyaga kupitila mwa Aklistu achimjakwe. Jwalakwe jwatite, “Ndaŵi syosope, Yehofa aŵele ali mkungamuchisya payiweni kuti ngulagasika mnope ligongo lya masengo, kumsamalila mwanache jwangu jujwalwalaga, soni yakusawusya yine. Mwamti kwa yaka 30 yipiteyi, pangali atamose lisiku limpepe liŵalepele jwalakwe kulimbikasya. Ndaŵi syejinji, Yehofa jwalimbikasyaga mwakunosya chinonyelo, mwakungamuchisya kuŵa jwalunda, soni kupitila m’maloŵe gakulimbikasya ga abale ni alongo. Mwamti ndaŵi syejinji napochelaga mautenga gakulimbikasya pandaŵi jinasosechelaga mnope kupikana maloŵe gakulimbikasyago.”

18. Ana mpaka twalimbikasye ŵane chamti uli?

¹⁸ M’wejisoni tukwete upile wakumsyasya Mlungu jwetu mwakwalimbikasya ŵane. Ana mpaka tutende chamti uli yeleyi? Mpaka twapikanileje jemanjaji mwakuwusimana mtima, kuŵecheta mwakwalimbakasya, soni kwakamuchisya pa yindu yakusosechela. (Mis. 3:27) Mwamti tukusasosekwa kulingalinga kwalimbikasya ŵandu wosope ŵakulagasika nganisyo kupwatikapo ŵangakusamtumichila Mlungu. Naga achimjetu asimene ni yindu yakutesya chanasa, akulaga ni nganisyo kapena ulwele, tukusitwajendela, soni kwasalila maloŵe gakulimbikasya gagakusasimanikwa m’Baibulo. Mwamti patukumsyasya Mlungu “jwakusatulimbisya mu yosope” mwakwakamuchisya ŵandu wosope, tukusaŵasoni kuti tukwakamuchisya ŵandu ŵangakulupilila kuti alijiganye yisyesyene.—Mat. 5:16.

YEHOFA CHACHITUKAMUCHISYA NDAŴI SYOSOPE

19. Ana Yehofa akusatutendela chichi, soni mpaka tumsyasye chamti uli jwalakwe?

¹⁹ Yehofa akusasamala mnope ya ŵandu ŵakusamnonyela jwalakwe. Jwalakwe jwangatuleka jika patusimene ni yakusawusya. Mpela mwayikusaŵela kuti nangolo jwachinonyelo akusamsamalila mwanache jwakwe, nombenajo Yehofa akusiŵasamalila ŵakutumichila ŵakwe ŵakulupichika. Jwalakwe akusatulongolela, kutupa yakusosechela yetu ya kuchilu, kutuchenjela, soni kutulimbikasya. Patukwakamuchisya soni kwalimbikasya ŵandu ŵane ŵakusimana ni yakusawusya tukusawa tuli mkwasyasya Atati ŵetu ŵa chinonyelo. Atamose kuti chitusimaneje ni yakupweteka soni yakusawusya, nambope tukwete chikulupi chakuti Yehofa ali ni m’weji. Konjechesya pelepa, jwalakwe jwatusalile kuti, “Mkatenda woga pakuti Une ndili ni m’mwejo.” (Yes. 41:10) Maloŵegatu gali gakulimbikasya mnope. Mwamti tuli ŵakusimichisya kuti nganituŵa jika.