NGANI JAKULIJIGANYA 15
NYIMBO NA. 30 Atati Ŵangu, Mlungu Jwangu Soni Mjangu
“Kumŵandichila Mlungu Chili Chindu Chambone” Mnope
“Nambo pakwamba ya une, kumŵandichila Mlungu chili chindu chambone kwa une.”—SAL. 73:28.
CHAKULINGA CHA NGANIJI
Chitukambilane yampaka tutende kuti tumŵandichile Yehofa soni maumbone gatukusapata ligongo lyakutenda yeleyi.
1-2. (a) Ana tukusasosekwa kutenda chichi kuti tuŵe paujakwe wambone ni mundu jwine? (b) Ana chitukambilane chichi munganiji?
ANA wawojo akwete mjawo jwapamtima? Ana ŵatesile yamti uli kuti amanyigane najo? Mwangakayichila ŵapatile ndaŵi jakunguluka ni mjawojo, mwamti wamanyilile yakusawusya yaŵele ali mkusimana nayo, soni kuyimanyilila chenene yindu yakusayinonyela ni yangakusayinonyela. Mwamti ŵayikopochele kuti mjawojo akwete ndamo syambone syasyasangalesye wawojo. Yeleyi yatendekasisye wawojo kuti amnonyeleje mnope mjawojo.
2 Kuti tuŵe paunasi wambone ni mjetu tukusasosekwa ndaŵi soni kulimbichila. Mwakulandana ni yeleyi, kuŵa paunasi wambone ni Yehofa Mlungu kukusasaka ndaŵi soni kulimbichila. Mungani ajino chitukambilane yindu yampaka tutende kuti tumŵandichile Mlungu soni maumbone gatukusapata ligongo lyakutenda yeleyi. Chandanda, kwende tukambilane ligongo lyakwe kumŵandichila Yehofa jwali mjetu jwapamtima kuli kwambone mnope.
3. Ligongo chichi tukusasosekwa kuganichisya mnope ya maumbone gatukusapata ligongo lya kumŵandichila Yehofa? Alondesye.
3 Mwangakayichila wawojo akukamulana nayo yakuti kumŵandichila Yehofa kuli kwambone mnope. Mwamti kuganichisya mnope ya umbone welewu mpaka kutukamuchisye kupitilisya kumŵandichila mnope Yehofa. (Sal. 63:6-8) Mwachisyasyo, tukusamanyilila kuti kulya yakulya ya magulu, kutenda masewela gakulimbisya chilu, kugona mwakwanila, soni kumwa mesi gakwanila mpaka yitukamuchisye mnope kuti tukole chilu chambone. Nambope, ŵandu ŵajinji ngakusatenda yindu yakusosekwa mnopeyi, yayikusiyatendekasya kuti akakola yilu yambone. Myoyo, kuti tukombole kutenda yindu yakutukamuchisya kola yilu yambone, tukusasosekwa kuganichisyaga mnope ya maumbone gampaka tupate patukutenda yinduyo. Mwakulandana ni yeleyi, mundu mpaka amanyilileje kuti kumŵandichila Yehofa kuli kwambone. Nambope, kuganichisya mnope ya maumbone gagakusapagwa ligongo lyakutenda yeleyi kuchitulimbikasya kupitilisya kumŵandichila mnope jwalakwejo.—Sal. 119:27-30.
4. Mwakamulana ni yayili pa Salimo 73:28, ana ni chindu chapi chiŵachiwonaga jwamasalimoju kuŵa chakusosekwa mnope?
4 Aŵalanje Salimo 73:28. Juŵalembile Salimo 73 jwaliji Mlefi jujwasagulidwe kuti ajimbeje nyimbo pa nyumba ja Yehofa. Jwalakweju jwaŵele ali kumtumichila Yehofa mwakulupichika kwa yaka yejinji. Nambope, jwalakwe jwamanyililaga kusosekwa kwa kulikumbusya soni kwakumbusya ŵane kuti “kumŵandichila Mlungu,” kwaliji kwakusosekwa mnope kwa jwalakwe soni jemanjajo. Ligongo chichi kumŵandichila Yehofa kuli kwakusosekwa mnope?
“KUMŴANDICHILA MLUNGU” KUKUSAYIKASYA CHISANGALALO
5. (a) Ligongo chichi kumŵandichila Yehofa kukusatutendekasya kuŵa ŵakusangalala? (b) Mwakamulana ni yayili pa Misyungu 2:6-16, apeleche yisyasyo yakulosya kuti lunda lwa Yehofa mpaka lumkamuchisye soni kumchenjela mundu jwalijose pajikapajika.
5 Patukumŵandichila mnope Yehofa, ni patukusaŵagasoni ŵakusangalala. (Sal. 65:4) Mwamti pana magongo gejinji gampaka gatutendekasye kuŵa ŵakusangalala. Mwachisyasyo, tukusapindula mnope patukukamulichisya masengo lunda lyakusimanikwa m’Baibulo. Lunda lwelelu lukusatuteteya ku yindu yampaka yituwulasye soni kuti tuŵambale kutenda maulemwa gekulungwa. (Aŵalanje Misyungu 2:6-16.) Mwamti Baibulo jikusasala kuti, “Jwana upile mundu jwapatile lunda Soni mundu jwalijiganyisye kupikanichisya yindu.”—Mis. 3:13.
6. Ana chichi chachamtendekasisye jwamasalimoju kuti nganasangalalaga?
6 Yili yisyene kuti atamose ŵandu ŵali paunasi wambone ni Yehofa nombenawo akusasimanasoni ni yakusawusya. Mwachisyasyo, juŵalembile Salimo 73 jwalesile kusangalala pajwatandite kuganisya mwakulemwecheka. Jwalakwe jwayikene pakwatumbilila soni kwatendela jelasi ŵandu ŵakusakala ŵele yindu yajendelaga chenene atamose kuti nginasamalaga yakwamba Mlungu soni kuya malamusi Gakwe. Jwamasalimoju jwayiwonaga kuti ŵandu ŵa chiwawa soni ŵakulikwesyaŵa, ŵapataga chilichose chaŵasakaga, ŵakwete yilu yambone, soni nganalagaga. (Sal. 73:3-7, 12) Ligongo lyakuti jwayiwonaga myoyo, jwamasalimoju jwayikene pakuyiwona kuti pangali umbone uliwose wakupata patukumtumichila Yehofa. Mwamti mwakudandawula, jwalakwe jwatite, “Kusala yisyene, une swejesye mtima wangu pachabe Soni naŵile mmyala mwangu pachabe pakulosya kuti ndili jwangalemwa.”—Sal. 73:13.
7. Ana mpaka tutende chichi kuti tuleche kudandawula kwakukusatutendekasya kuti tukasangalalaga? (Alolesoni chiwulili chapachikuto.)
7 Jwamasalimoju nganakunda kuti kudandawulaku kumsokonasye. Jwalakwe jwatesilepo kandu, mwamti ‘jwajinjile m’malo geswela gakuchimbichika ga Mlungu,’ kwele Yehofa jwamkamuchisye kuti ayiwonejesoni yindu mwakuŵajilwa. (Sal. 73:17-19) Yehofa jwali mjetu jusyesyene akusamanyililaga patukudandawula. Mwamti patukudandawula, tukusasosekwa kupopelaga kwa jwalakwe ni kumŵenda kuti atukamuchisye kumanyilila yatukusosekwa kutenda. Jwalakwe akusatupa malangiso kupitila m’Baibulo soni mwa abale ni alongo, gampaka gatukamuchisye kuti tupitilisye kumtumichila jwalakwe atamose patusimene ni yakusawusya. Myoyo, atamose patukulagasika mnope nganisyo, Yehofa chachitulimbikasya soni kututamika mtima pasi.—Sal. 94:19.a
Mlefi juŵalembile Salimo 73, ajimi “m’malo geswela gakuchimbichika ga Mlungu” (Alole ndime 7)
“KUMŴANDICHILA MLUNGU” KUKUSATUPA CHEMBECHEYO SONI UMI WAMBONE
8. Ana tukusapata maumbone gane gapi ligongo lyakumŵandichila Mlungu?
8 Panasoni maumbone gane gaŵili gatukusapata ligongo lya kumŵandichila Mlungu. Umbone wandanda uli wakuti, tukusakola umi wambone. Umbone wine uli wakuti, tukusakola chembecheyo chambone pa yindu ya msogolo. (Yel. 29:11) Kwende sambano tukambilane yejinji yakwamba maumbone gelega.
9. Ana kumŵandichila Yehofa kukusatukamuchisya chamti uli kuti tukole umi wambone?
9 Kumŵandichila Yehofa kusatukamuchisya kola umi wambone. Ŵandu ŵajinji ŵakusati kwangali Mlungu akusayiwona kuti umi nganiwukola chakulinga, nambosoni akusaganisya kuti ŵandu ngasasimanikwasoni pachilambopa kusogoloku. Nambope, ligongo lyakuti m’weji tukusalijiganyaga Maloŵe ga Mlungu, ngatukusakayichila yakuti Mlungu “apali nditu.” Tukusakulupililasoni “kuti jwalakwejo akusapeleka yindu yambone kwa ŵandu ŵakusamsosasosa ni mtima wosope.” (Aheb. 11:6) Konjechesya pelepa, Yehofa jwatupanganyisye m’litala lyakuti tumtumichileje. Myoyo, patukumtumichila jwalakwe ni patukusaŵa ŵakusangalala mnope.—Det. 10:12, 13.
10. Ana pa Salimo 37:29 pakusasala yamti uli pakwamba ya sogolo ja ŵandu ŵakusamjembecheyaga Yehofa?
10 Ŵandu ŵajinji nganakola chembecheyo chisyesyene cha msogolo. Mwamti jemanjaji akusagamba kukamula masengo, kulombela, kola ŵanache soni kusunga mbiya kuti chasikamulichisye masengo pachachikalambalapo. Nambosoni jemanjaji ŵangamanyililaga yajwasasile Mlungu kuti chachitenda kusogoloku. Mwakulekangana ni yeleyi, ŵakutumichila ŵa Yehofa akusaŵika chembecheyo chawo mwa jwalakwe. (Sal. 25:3-5; 1 Tim. 6:17) Tukusamkulupililaga Mlungu jwali mjetu soni tukusakulupilila kuti jwalakwe chachitenda yosope yajwasasile. Mwamti kusogoloku, tukwembecheya yindu yambone kupwatikwapo upile wa kumtumichila Mlungu mpaka kalakala mu Paladaiso.—Aŵalanje Salimo 37:29.
11. Ana kumŵandichila Mlungu kukusatukwayaga chamti uli soni kukusamkwaya chamti uli jwalakwe?
11 Kumŵandichila Mlungu kukwete maumbone gane gejinji kwa m’weji. Mwachisyasyo, Yehofa akusakululuchila yakulemwa ya ŵandu ŵali najo paunasi pagalawiche mtima. (Yes. 1:18) Mwamti yeleyi yikusatutendekasya kuti tukalijimbaga magambo ligongo lya yakulemwa yatwatesile munyuma. (Sal. 32:1-5) Soni tukusaŵa ŵakusangalala patutesile yindu yakumsangalasya Yehofa. (Mis. 23:15) Mwamti pana maumbone gane gejinji gatukusapata ligongo lyakuŵa paunasi wambone ni Mlungu. Nambo ana mpaka atende chichi kuti apitilisye kumŵandichila Mlungu?
YAKUSOSEKWA KUTENDA KUTI APITILISYE “KUMŴANDICHILA MLUNGU”
12. Ana wawojo atesile yamti uli kuti amŵandichile Mlungu?
12 Naga wawojo ali Mklistu jwam’batisidwe, nikuti atesile kala yejinji kuti amŵandichile Yehofa. Mwambone, alijiganyisye yisyesyene yakwamba Yehofa soni Yesu Klistu, achenjile ndamo syawo syakusakala, akwete chikulupi chakulimba mwa Mlungu, soni akusalingalinga kutenda yindu mwakamulana ni yakusasaka jwalakwe. Nambope, kuti tumŵandichile mnope Mlungu, tukusasosekwa kupitilisya kutenda yeleyi.—Akolo. 2:6.
13. Ana ni yindu yitatu yapi yampaka yitukamuchisye kuti tupitilisye kumŵandichila Yehofa?
13 Ana ni chichi champaka chitukamuchisye kuti tupitilisye kumŵandichila mnope Yehofa? (1) Tukusosekwa kuti tukaleka kuŵalanga soni kulijiganya Baibulo. Patukutenda yeleyi, chakulinga chetu chikaŵa kwamba kusaka kumanyilila yakwamba Mlungu. Mmalomwakwe, tukusosekwa kuganichisyaga ya chakulinga cha Mlungu kwa m’weji soni tukundeje kuti Maloŵe gakwe gatulongoleleje. (Aef. 5:15-17) (2) Tukusosekwa kuti tulimbisyeje chikulupi chetu mwakuganichisya ya chinonyelo chakusatulosyaga Mlungu. (3) Tukusosekwasoni kuŵambala ndamo syasikusamsakalisya Yehofa soni kuŵambala kunguluka ni ŵandu ŵakusatenda ndamo syelesyo.—Sal. 1:1; 101:3.
14. Mwakamulana ni yayili pa 1 Akolinto 10:31, ana ni yindu yapi yatukusosekwa kutenda lisiku lililyose kuti tumsangalasyeje Yehofa? (Alolesoni yiwulili.)
14 Aŵalanje 1 Akolinto 10:31. Kutenda yindu yakumsangalasya Yehofa kuli kwakusosekwa mnope. Mwamti tukusasosekwa kutenda yejinji kupunda kwamba kwawula kulalichila soni kusimanikwa pa misongano ja mpingo. Lisiku lililyose tukusasosekwa kutendaga yindu yakumsangalasya Yehofa. Mwachisyasyo, tukusamsangalasya Yehofa naga tukusaŵa ŵakuwona mtima mu yindu yosope soni naga tukusitwagayila ŵane yindu yatukwete. (2 Akoli. 8:21; 9:7) Jwalakwe akusasakasoni kuti tuwuwoneje mtuka wa umi kuŵa wakusosekwa mnope. Tukusamŵandichila mnope Mlungu juŵatupele umi mwakuŵambala kulya soni kumwa mnope. Nambosoni mwakutenda yindu yakutukamuchisya kola yilu yambone. Patukutenda yakomboleka kuti tumsangalasye Yehofa atamose pa yindu yamwanamwana, jwalakwejo ni pakusatunonyelasoni mnope.—Luk. 16:10.
Kwendesya mwakusamala galimoto jetu, kutenda masewela gakulimbisya chilu, kulya yakulya yakamuchisya mchilu, soni kwagayila ŵane yindu yatukwete yili yine mwa yindu yampaka tutende pakusaka kumsangalasya Yehofa (Alole ndime 14)
15. Ana Yehofa akusasaka kuti twatendeleje chichi ŵandu ŵane?
15 Yehofa akusiŵanonyela ŵandu ŵakulungama ni ŵangalungama ŵakwe. (Mat. 5:45) Mwamti jwalakwe akusasaka kuti m’wejisoni tutendeje yakulandanayo. Mwachisyasyo, ‘ngatukusaŵecheta yakumnyosya mundu jwalijose, soni kuŵa ŵaukali, . . . nambo tukusaŵa ŵakufasa kwa ŵandu wosope.’ (Tit. 3:2) Myoyo, ngatukusitwawona ŵane kuŵa ŵangasosekwa ligongo lyakuti ŵangakulupililaga yatukusakulupilila m’weji. (2 Tim. 2:23-25) Nambo tukusamŵandichila mnope Yehofa patukulingalinga ndaŵi syosope kwatendela yambone ŵandu wosope.
MPAKA “TUMŴANDICHILE MLUNGU” ATAMOSE PATUTENGWICHE
16. Ana juŵalembile Salimo 73, jwatandite kulipikana uli pali papitile ndaŵi?
16 Ndaŵi sine mpaka atande kuyiwona kuti Yehofa ngakwanonyelasoni ligongo lya yindu yakulemwecheka yaŵatesile. Mpela mwatuyiwonele kala, yeleyi ni yayamtendechele juŵalembile Salimo 73. Jwalakwe jwatite, “ Sajo syangu syasigele panandi kusepuka pa litala lyakuŵajilwa, [soni] sajo syangu syasigele panandi kutelesya.” (Sal. 73:2) Mwamti jwayikene pakuŵecheta kuti jwapikanaga “kupweteka” soni ‘nganaganisyaga chenene’ “mpela chinyama chachikusaŵa changali lunda” pameso pa Yehofa. (Sal. 73:21, 22) Nambo ana yakulemwa yakweyi yamtendekasisye ganisya kuti Yehofa nganaŵa amkululuchile ni kutanda kumnonyelasoni?
17. (a) Ana jwamasalimoju jwatesile chichi atamose pandaŵi jiŵatengwiche mnope? (b) Ana tukulijiganya chichi pa yindu yayamtendecheleyi? (Alolesoni yiwulili.)
17 Naga jwamasalimoju jwaganisyaga kuti Yehofa amlesile, nikuti kaganisye keleka kagambile kuŵa kwa kandaŵi. Atamose kuti pandaŵiji jwamasalimoju jwadandawulaga mnope, jwalakwe jwamanyilile kuti akusosekwa kumŵandichila Mlungu. Mwamti jwaŵechete kuti, “Nambo sambano ngwadalila wawojo ndaŵi syosope. Wawojo angamwile mkono wangu wamlyo. Wawojo akusalongolela une ni malangiso gawo, soni panyuma pakwe wawojo chachindendekasya kuti mbe jwakuchimbichika.” (Sal. 73:23, 24) M’wejisoni tukusosekwa kumŵendaga Yehofa kuti atulimbikasye patutengwiche soni panganitukola machili. (Sal. 73:26; 94:18) Atamose kuti ndaŵi sine sajo syetu mpaka sisepuche, yili yakomboleka kuwujilasoni kwa Yehofa tuli tukwete chikulupi chakuti jwalakwe ali ‘jwakoseka kutukululuchila.’ (Sal. 86:5) Myoyo, tukusasosekwa kuti tumŵandichileje Mlungu jwetu mnopemnope patutengwiche.—Sal. 103:13, 14.
Patuwujile munyuma mwausimu tukusasosekwa kumŵandichila Yehofa mwakupopela soni kusimanikwa pamisongano mwakutamilichika (Alole ndime 17)
“TUMŴANDICHILE MLUNGU” MPAKA KALAKALA
18. Ligongo chichi kumŵandichila Yehofa kwangali malile gakwe?
18 Kumŵandichila Yehofa soni kulijiganya yakwamba jwalakwe nganikukola malile. Ni ligongo lyakwe Baibulo jikusati matala ga Yehofa, lunda lwakwe, soni kumanyilila kwakwe yindu “ngaŵa mkuyipikanichisya.”—Alo. 11:33.
19. Ana lilemba lya Masalimo likusatusimichisya ya chichi?
19 Lilemba lya Salimo 79:13 likusati, “M’weji ŵatuli ŵandu ŵawo soni ngondolo syapalulila pawo, Tuchayamichilaga wawojo mpaka kalakala. Soni tuchilalichila yakwamba uchimbichimbi wawo ku mibado josope jakwika msogolo.” Pakupitilisya kumŵandichila Mlungu, wawojosoni mpaka aŵe ŵakusimichisya kuti Yehofa chachapa upile. Mwamti nombenawo mpaka aŵechete mwakusimichisya kuti, “Mlungu ni jwakusangamuchisya kuti mtima wangu utamilichiche. Jwalakwe ali lwala lwangu soni ali jwangu mpaka kalakala.”—Sal. 73:26.
NYIMBO NA. 32 Aŵe ku Mbali ja Yehofa
a Ŵandu ŵakulagasika nganisyo kapena kudandawula kwa ndaŵi jelewu akusosekwa kuja kuwonegana ni dokotala. Naga akusaka kumanyilila yejinji alole Sanja ja Mlonda ja Na.1 2023.