Apitilisye Kwenda Mwachikulupi

1. Ligongo chichi ndumetume Paulo pajwaganichisyaga yamunyuma jwayiwonaga kuti atesile yejinji paumi wakwe?

PANDAŴI jine, ndumetume Paulo jwamanyililaga kuti asigele panandi kuwulajidwa. Atamose yaliji myoyo, jwalakwe jwakwete magongo gejinji gakumtendekasya kuyiwona kuti atesile yejinji paumi wakwe. Pajwaganichisyaga yamunyuma jwalakwe jwatite, “Mbutwiche pa mpikisano mpaka kumbesi, soni nguyisye yindu yosope yatukusakulupilila.” (2 Tim. 4:​6-8) Paulo jwasagwile yindu mwalunda mwakukamulichisya masengo umi wakwe pakumtumichila Yehofa, mwamti jwakulupililaga kuti Yehofajo akusangalala najo. Mpela mwajwatendele Paulo, m’wejisoni tukusasaka kusagula yindu mwalunda kuti Mlungu atunonyeleje. Ana mpaka tutende chamti uli yeleyi?

2. Ana kwenda mwachikulupi kukusagopolela chichi?

² Pakwamba ya jwalakwe msyene soni Aklistu ŵane ŵakulupichika Paulo jwatite, “Tukwenda mwachikulupi, ngaŵaga mwa yindu yakuwoneka ni meso.” (2 Akoli. 5:7) Ana Paulo jwagopolelaga chichi pelepa? Ndaŵi sine m’Baibulo maloŵe gakuti “kwenda” gakusasalaga ya mwakusatendela yindu mundu paumi wakwe. Mwamti ŵandu ŵangakusamkulupililaga Yehofa akusasagula yindu pakujigalila yakuyiwona, kupikana soni mwakupikanila mumtima. Mwakulekangana ni yeleyi, mundu jwakwenda mwachikulupi akusasagula yindu yakulosya kuti akusamdalila Yehofa Mlungu. Mwamti yitendo yakwe yikusalosya kuti jwalakwejo akusakulupilila yakuti Mlungu chachimpa upile ligongo lyakupikanila yindu yayikusasimanikwa m’Baibulo.—Sal. 119:66; Aheb. 11:6.

3. Ana kulosya chikulupi patukusagula yakutenda kukwete umbone wamti uli? (2 Akolinto 4:18)

³ Ndaŵi sine, wosopewe mpaka tusagule yakutenda pakujigalila yindu yatukuyiwona, kupikana soni mwatukupikanila mumtima. Nambope, ndaŵi syosope mpaka tusimane ni yakusawusya naga tukusasagula yindu yakusosekwa mnope pakwamba kujigalila yindu yakuwoneka ni meso. Yili myoyo ligongo lyakuti, ndaŵi sine yindu yampaka tuyiwone kapena kupikana mpaka yiŵe yangakamuchisya. Atamose yili mkuti yinduyo yili yakamuchisya, nambope kusagula yakutenda pakujigalila yindu yeleyi mpaka kututendekasye kuti tukayikosyaga yakusasaka Mlungu kuti tutendeje. (Jwak. 11:9; Mat. 24:​37-39) Nambo patukusagula yakutenda ligongo lya chikulupi, ndaŵi syejinji tuchikombola kusagula yindu “yakwasangalasya Ambuje.” (Aef. 5:10) Kupikanila Maloŵe ga Mlungu kuchitukamuchisya kuŵa ŵakusangalala soni kola mtendele wa mumtima. (Sal. 16:​8, 9; Yes. 48:​17, 18) Mwamti naga tukupitilisya kwenda mwachikulupi, tuchipata umi wangamala.—Aŵalanje 2 Akolinto 4:18.

4. Ana mundu mpaka amanyilile chamti uli naga akwenda mwachikulupi kapena akwenda mwa yindu yakuwoneka ni meso?

⁴ Ana mpaka tumanyilile chamti uli naga tukwenda mwachikulupi kapena mwa yindu yakuwoneka ni meso? Mpaka tumanyilile yeleyi mwakupata kwanga kwa chiwusyo achi, Ana chichi chachikusatulongolela pa yindu yatukusasagula kutenda? Ana yili yindu yatukusayiwona? Kapena gali malangiso gakutyochela kwa Yehofa? Kwende tukambilane yindu yampaka tutende kuti tupitilisye kwenda mwachikulupi mumbali sitatu syakusosekwa mnope. Mbali jandanda, patukusagula masengo. Mbali jaŵili, patukusagula mundu jwakulombana najo, soni mbali jatatu, patupochele malangiso kutyochela ku gulu ja Yehofa. Pambali jilijose, chitukambilane yindu yatukusasosekwa kuyiganichisya kuti tusagule yindu mwalunda.

PATUKUSAGULA MASENGO

5. Ana tukusosekwa kuganichisyaga chichi patukusagula masengo?

⁵ Wosopewe tukusasaka kuti tulisamalileje soni tumasamalileje maŵasa getu. (Jwak. 7:12; 1 Tim. 5:8) Mwamti pana masengo gane gele ŵandu akusapochela mbiya syejinji kulekangana ni masengo gane. Yeleyi mpaka yitendekasye kuti jwakulembedwa masengojo akomboleje kusuma yindu yakusosekwa lisiku lililyose soni kusunga mbiya sine. Pele masengo gane, mundu mpaka apocheleje mbiya syangakwanila mwine syakwamba kwanila kusumilape yindu yakusosekwa paumi wakwe soni pa liŵasa lyakwe. Yili yisyene kuti patukusagula masengo tukusaganichisyaga ya winji wa mbiya syatuchipochelaga. Nambope, mundu mpaka alosye kuti akwenda mwa yindu yakuwoneka ni meso naga akundile kukamula masengo ligongo lya kutupa kwa mbiya basi.

6. Ana mpaka tuŵe ŵakulupichika mwamtuli patukusagula masengo? (Ahebeli 13:5)

⁶ Naga tukwenda mwachikulupi, yichitukamuchisyasoni kuti tusaguleje masengo ganganigaŵa gasokonasisye unasi wetu ni Yehofa. Mpaka tuliwusye kuti, ‘Ana masengoga mpaka gandendekasye kuti ndende nawo yindu yakusayiŵenga Yehofa?’ (Mis. 6:​16-19) ‘Ana ngagasokonasya yindu yakwayana ni kumtumichila kwangu Yehofa soni ngagandendekasya kuti ndalikangane ni liŵasa lyangu kwa ndaŵi jelewu?’ (Afil. 1:10) Naga kwanga kwa yiwusyo yeleyi kuli kwakuti elo, nikuti mpaka atende chenene ngatanda masengogo atamose yili mkuti masengo gakusawusya kugapata. Ligongo lyakuti tukusajenda mwakulupichika, tukusatenda yakusagula yakulosya kuti tukwete chikulupi chakuti mulimosemo Yehofa chatupe yakusosechela yetu.—Mat. 6:33; aŵalanje Ahebeli 13:5.

7-8. Ana m’bale jwine jwa ku South America jwatesile yamti uli yakulosya kuti jwajendaga mwachikulupi? (Alolesoni chiwulili.)

⁷ Alole yajwatesile M’bale Javiera jwa ku South America. M’baleju jwakuweni kusosekwa kwakwenda mwachikulupi. Jwalakwe jwatite, “Naliji ndili mbuchisye masengo gapenani gele ngapochelaga mbiya syejinji soni kungamuchisya kupata yindu yanasakaga.” Nambope, m’baleju jwasachililaga mnope kuti atende upayiniya. Jwalakwe jwasasilesoni kuti, “Jwamkulungwa jwa pakampani jwambilasile kuti ngalembe nawo mayeso gakuwuchisya masengo. Myoyo, mkanimbe kwawula kukulemba nawo mayesoga, napopesile kwa Yehofa kuti angamuchisye. Mwamti naliji jwakusimichisya kuti jwalakwejo ni jwakumanyilila yindu yangusosechela. Atamose kuti nasakaga masengo gapenani, nambo nganisakaga kuti masengo gachimbatego galepelekasye kuyikwanilisya yakulinga yausimu yanakwete.”

⁸ M’bale Javier jwatite, “Panalembaga mayesoga, jwamkulungwa jwa pa kampanijo jwasalile kuti chisosekweje kamula masengogo kwa maawala gane gakonjechesya. Nambo mwaulemu namjanjile kuti nganimba ngombwele ligongo lya utumiki wanasakaga kutenda.” M’baleju jwakanile upile wa masengowu. Gali gamasile mawiki gaŵili, jwalakwe jwatandite upayiniya. Kaneko mu chaka chichocho, jwalakwe jwapatile ganyu. M’baleju jwatite, “Yehofa jwajanjile mapopelo gangu soni kumba masengo gakamulana ni ndandanda jangu jakutendela upayiniya. Kusala yisyene, ndili jwakusangalala mnope kuti napatile masengo gagakusamba ndaŵi jejinji jakumtumichila Yehofa soni kwakamuchisya abale ni alongo.”

9. Ana alijiganyisye chichi kutyochela pa yaŵatesile M’bale Trésor?

⁹ Nambi uli naga tuyikopochele kuti masengo gatukukamula gakututendekasya kuti tukaŵa ŵakulupichika? Aganichisye yayamtendechele m’bale Trésor, jwa ku Congo. Jwalakwe jwatite, “Masengo ganapatile galiji gapenani. Napataga mbiya syejinji kulekangana ni syanapataga pandanda mwamti ŵandu ŵanjimbichisyaga.” Nambope ndaŵi syejinji, m’baleju nganasimanikwaga pamisongano ligongo lyakuti jwakamulaga masengogo kwa maawala gane gakonjechesya. Masengogo gamtendekasyagasoni kuti atendeje yindu yine yangakulupichika. M’baleju jwasakaga kuleka masengogo nambo jwajogopaga kuti nganaŵa apatile masengo gane. Ana chichi chachamkamuchisye m’baleju? Jwalakwe jwatite, “Lilemba lya Habakuku 3:​17-19 lyangamuchisye kupikanichisya kuti atamose ngapataga mbiya Yehofa chapitilisye kusamalila. Myoyo nalesile masengogo.” Jwalakwe jwaŵechetesoni kuti, “Ŵandu ŵajinji ŵakusiŵalembaga masengo achimjawo akusaganisya kuti naga akumlipila mundu mbiya syejinji nikuti mpaka aleche kutenda yindu yakusosekwa mnope mpela kuleka kutenda yindu yimpepe ni liŵasa lyakwe soni kutenda yindu yausimu. Ndili jwakusangalala kuti nakombwele kuwuchenjela unasi wangu ni Yehofa soni ni ŵachinasi ŵangu. Chili chimasile chaka, Yehofa jwangamuchisye kupata masengo gane gambone gagakusangamuchisya kutama umi wangasaka yejinji soni kola ndaŵi jejinji jakutendela yindu yausimu. Patukulongosya kumtumichila Yehofa, ndaŵi sine mpaka tulajeje kupata mbiya, nambope jwalakwe chachitusamalila.” Kusala yisyene, naga tukupikanila malangiso ga Yehofa soni kulupilila yindu yaŵasasile kuti chachitutendela, tuchikombola kwendaga mwachikulupi soni jwalakwejo chachitupa upile.

PATUKUSAGULA MUNDU JWAKULOMBANA NAJO

10. Ana chichi champaka chitutendekasye kusagula yindu yakuwoneka ni meso patukusaka kupata mundu jwakulombana najo?

¹⁰ Ulombela uli mtuka wakutyochela kwa Yehofa, soni yili yachipago kusaka kuti mundu alombele. Mlongo pakuganichisya ya m’bale jwampaka alombane najo, mpaka aganichisye ya ndamo sya m’balejo, kawoneche kakwe, mbili jakwe, kapate kakwe ka mbiya, maudindo gakwete kumangwakwe, nambosoni mwakusatendelaga yindu ni jwalakwejo.b Yindu yeleyi yili yakusosekwa. Nambope, naga mlongo akwamba kuganichisya mnope yindu yeleyi basi nikuti mpaka asagule yindu pakujigalila yakuwoneka ni meso.

11. Ana mpaka tulosye chamti uli kuti tukwenda mwachikulupi patukusagula mundu jwakulombana najo? (1 Akolinto 7:39)

¹¹ Kusala yisyene, Yehofa akusasangalala mnope abale ni alongo pakupikanila malangiso gakwe pandaŵi jakusagula mundu jwakulombana najo. Mwachisyasyo, jemanjaji akusakuyaga malangiso gakuti mkanaŵe kutanda chitomelo akusosekwa kwambecheya kaje mpaka ali ‘apundile pa unyamata.’ (1 Akoli. 7:36) Jemanjaji pakuganichisya ya mundu jwakuti alombane najo, akusaganichisya mnope ya mundu jwakwete ndamo syele Yehofa akusasala kuti ni syampaka simkamuchisye mundu kuŵa jwamlume kapena jwamkongwe jwambone. (Mis. 31:​10-13, 26-28; Aef. 5:33; 1 Tim. 5:8) Mwamti naga mundu jwanganaŵa jwa Mboni sya Yehofa alosisye kuti akwasaka, jemanjaji akusapikanila malangiso gakuti akusosekwa kulombela “mwa Ambuje” mpela mwakusaŵechetela pa 1 Akolinto 7:39. (Aŵalanje.) Jemanjaji akusapitilisya kwenda mwachikulupi, kwineku ali mkukulupilila kuti Yehofa ni jwampaka ŵape yindu yakusosechela.—Sal. 55:22.

12. Ana alijiganyisye chichi pa yindu yajwasimene nayo Mlongo Rosa?

¹² Aganichisye yayamtendechele Mlongo Rosa, jwakusatenda upayiniya ku Colombia. Masengo gajwakamulaga mlongoju gatendekasisye kuti aŵechetaneje ndaŵi ni katema ni jwamlume jwine jwanganaŵa jwa Mboni sya Yehofa jwele panyuma pakwe jwatandite kumsaka mlongoju. Nombe mlongoju jwamnonyele jwamlumeju. Jwalakwe jwatite, “Jwamlumeju jwawonekaga kuti ali jwambone. Jwakamuchisyaga ŵandu ŵa mudela jakwe, soni jwawonekaga kuti jwangatenda yakusakala. Nasangalalaga ni yajwandendelaga jwamlumeju. Jwakwete ndamo syanasisakaga mwa jwamlume jwampaka lombane najo, chakusawusya chaliji chakuti nganaŵa jwa Mboni sya Yehofa.” Mlongoju jwasasilesoni kuti, “Yaliji yakusawusya kumkana jwamlumeju ligongo namnonyelaga mnope. Pandaŵi jelejo natendaga mnope lipowo mwamti nasakaga kulombela, nambo m’bale naganapatikanaga.” Atamose yaliji myoyo, Mlongo Rosa nganaganichisyaga mnope yindu yakuwoneka ni meso. Mmalomwakwe, jwaganichisyaga mnope mwampaka yijile pakukwaya unasi wakwe ni Yehofa naga akusagula yakulombana ni jwamlumejo. Mwamti kaneko jwalesile kulumbikana ni jwamlume jula, soni jwatandite kulipeleka mnope pakumtumichila Yehofa. Pali pagambile kupita kandaŵi kamnono, mlongoju jwaŵilanjidwe ku Sukulu ja Ŵakulalichila ya Uchimwene, mwamti apano jukutumichila mpela mpayiniya jwapadela. Mlongoju jwatite, “Yehofa angamuchisye kuti sangalaleje mnope.” Atamose kuti yikusaŵa yakusawusya kuti tukombole kwenda mwachikulupi, nambope maumbone gatukusapata gali gejinji mnope.

PATUKUPOCHELA MALANGISO GAKUTYOCHELA KU GULU JA YEHOFA

13. Ana chichi champaka chitutendekasye kwenda mwa yindu yakuwoneka ni meso patupochele malangiso gakutyochela ku gulu ja Yehofa?

¹³ Ndaŵi ni katema tukusapochela malangiso gakutukamuchisya kuti tumtumichileje chenene Yehofa. Malangisoga mpaka gatyochele kwa achakulungwa ŵa mu mpingo, kwa jwakulolela dela, ku ofesi ja nyambi, kapena ku Likuga Lyakulongolela. Nambo ndaŵi sine, mpaka yisimanikwe kuti nganitupikanichisya ligongo lyakwe abale atupele malangiso ganegakwe. Mwine mpaka tugambeje kuganichisya mnope yakusawusya yampaka yipagwe ligongo lyakuya malangisogo. Kombolekasoni mpaka tutande ganichisya yakulepela ya abale ŵakutupa malangisogo.

14. Ana chichi champaka chitukamuchisye kwenda mwachikulupi patupochele malangiso gakutyochela ku gulu ja Yehofa? (Ahebeli 13:17)

¹⁴ Patukwenda mwachikulupi, tukusakulupilila kuti Yehofa ni jwakulongolela gulu jakwe soni kuti akumanyilila yatukusimana nayo. Yeleyi yikusatukamuchisya kuti tukachelewa kupikanila malangiso gatupochele. Mwamti tukusatenda yeleyi ni nganisyo syakuŵajilwa. (Aŵalanje Ahebeli 13:17.) Tukusamanyililasoni kuti naga tukupikanila malangisogo tuchikamuchisya kuti abale ni alongo pa mpingo petu aŵe ŵakamulana. (Aef. 4:​2, 3) Atamose kuti abale ŵakusatulongolela ali ŵangali umlama, tukusakulupilila kuti Yehofa chachijaliwa kupikanila kwetu. (1 Sam. 15:22) Mwamti pandaŵi jakwe, Yehofajo chachilinganya yiliyose yayikusosekwa kulinganyidwa.—Mik. 7:7.

15-16. Ana chichi chachamkamuchisye m’bale jwine kupitilisya kwenda mwachikulupi atamose kuti jwakayichilaga malangiso gajwapochele? (Alolesoni chiwulili.)

¹⁵ Ana kwenda mwachikulupi kukusakola umbone wamti uli? Aganichisye chakutendekwa achi. Atamose kuti chiŵecheto chakumanyika mnope ku Peru chili Chisipanishi, ŵandu ŵajinji akusaŵecheta yiŵecheto ya m’chilambomo. Chimo mwa yiŵechetoyi chili Chikechuwa. Kwa yaka yejinji, abale ni alongo ŵakusaŵecheta chiŵechetochi ŵawungunyaga ŵandu ŵa mudela jawo ŵakusaŵecheta chiŵechetochi. Nambope, pakusaka kupikanila malamusi ga boma, jemanjaji ŵachenjile matala gakwalalichilila ŵandu ŵa mudelajo. (Alo. 13:1) Yakuyichisya yakwe, abale ni alongo ŵane ŵatandite kudandawula kuti kuchengako chikusokonasye masengo gakulalichila mudelajo. Nambope, ligongo lyakuti abale ŵakamulene ni kuchengaku, Yehofa jwajaliwaga kulimbichila kwawo mwamti ŵasimanaga ni ŵandu ŵajinji ŵa chiŵechetochi.

¹⁶ M’bale Kevin jwelesoni ali jwamkulungwa jwa mumpingo jwaliji jumo mwa abale ŵaŵadandawulaga ligongo lya kuchengaku. Jwalakwe jwatite, “Naganisyga kuti, ‘Ana sambano chitwapateje chinawuli ŵandu ŵakusaŵecheta Chikechuwa?’” Ana m’baleju jwatesile yamti uli? Jwalakwe jwatite, “Nakumbuchile lilemba lya Misyungu 3:5. Nambosoni naganichisye ya Mose. Yehofa ŵampele malangiso gagawonekaga kuŵa gangakamuchisya. Jwalakwe ŵamsalile Mose kuti ŵakoposye Ayisalayeli ku Iguputo nambo kupitila ku Nyasa Jechejewu, yayawonekaga kuti ngaja kombola kwatila Ayiguputo ŵele pandaŵijo ŵakuyaga.” Atamose yaliji myoyo, Mose jwapikanile, mwamti ligongo lya kupikanila kwa Mose Yehofa jwakulupwisye mwakusimonjesya. (Eks. 14:​1, 2, 9-11, 21, 22) Panyuma pakuganichisya yeleyi, M’bale Kevin jwaliji jwakusachilila kuchenga matala gakulalichilila. Ana yakuyichisya yakwe yaliji yamti uli? Jwalakwe jwatite, “Nasimonjile mnope ni yajwatite Yehofa pakutupa upile. Yaka ya munyumamu, twasosekwaga kwenda mnope mwamti pane twagambaga kusimana ni mundu jumo kapena ŵaŵili ŵakusaŵecheta Chikechuwa. Nambo apano tukusalalichila mnope mu dela jajikwete ŵandu ŵajinji ŵakusaŵecheta Chikechuwa. Yeleyi yitendekasisye kuti tuŵechetaneje mnope ni ŵandu ŵakusaŵecheta chiŵechetochi, kola maulendo gakuwilisya gejinji, soni majiganyo ga Baibulo. Chiŵalanjilo cha ŵandu ŵakusimanikwa pa misongano ja mpingo chikwesilesoni mnope.” Kusala yisyene, Yehofa akusatupa upile naga tukwenda mwachikulupi.

17. Ana alijiganyisye chichi mungani ajino?

¹⁷ Mungani ajino tukambilene yampaka tutende kuti tupitilisye kwenda mwachikulupi m’matala gatatu. Nambope, tukusasosekwasoni kupitilisya kwenda mwachikulupi mu yakutendekwa yiliyose ya paumi wetu mpela patukusagula yakusangalasya, soni patukusagula majiganyo gatukusaka kutenda kapena kukola ŵanache. Chinga tukusagula yamti uli, chakusosekwa mnope chili kunda kuti Yehofa atulongolele mmalo mwakwamba kusagula yindu pakujigalila yindu yatukwamba kuyiwona ni meso getu. Naga tukutenda yeleyi tuchikombola ‘Kumpikanila [Yehofa] Mlungu jwetu mpaka kalakala.”—Mik. 4:5.