NGANI JAKULIJIGANYA 43
NYIMBO NA. 90 Tulimbisyaneje
Ana Mpaka Tulimbane Chamti uli ni Kulikayichila?
“Msimichisyeje yindu yosope.”—1 ATES. 5:21.
CHAKULINGA CHA NGANIJI
Chijitukamuchisye kulola yampaka tutende naga tukusakayichila yakuti Yehofa akusasamala ya m’weji.
1-2. (a) Ana ni yiwusyo yine yapi yakusaliwusya ŵakutumichila ŵa Yehofa? (b) Ana chitukambilane chichi mu nganiji?
ŴANDU ŵamisingu josope akusalikayichilagaa ndaŵi sine. Mwachisyasyo, ndaŵi sine m’bale jwachinyamata mpaka alikayichileje naga Yehofa akusamnonyelaga. Ligongo lya yeleyi jwalakwe mpaka akayichileje naga akusosekwa kubatisidwa. Aganichisyesoni ya m’bale jwine jwele pajwaliji jwachinyamata jwasagwile yakuti amtumichileje Yehofa mmalo mwakusosasosa chipanje. Nambo ligongo lyakuti apano akusile ngakupata mbiya syakwanila kusamalila liŵasa lyakwe. Yeleyi mpaka yimtendekasye kutanda kayichila naga jwasagwile chenene yindu pajwaliji jwachinyamata. Aganichisyesoni ya mlongo jwachikulile jwakulepela kutenda yine yakwe ligongo lya uchekulu. Jwalakwe mpaka adandawuleje ligongo lyakuti akulepela kutenda yindu yajwakombolaga kutenda munyumamo. Ana wawojo pakwete paliwusisye yiwusyo yakuyichisyayi; ‘Ana Yehofa akusambalanjilaga? Ana jwalakwe akusayiwona yindu yambele ndili mkutenda pakumtumichila kuŵa yakusosekwa mnope? Ana ndili jwakuŵajilwape kutenda yineyakwe pakumtumichila Yehofa?’
2 Naga tukulepela kupata kwanga kwa yiwusyoyi, chikulupi chetu mpaka chinandipe soni mpaka yitutendekasye kuleka kumtumichila jwalakwe. Munganiji, chitukambilane yampaka sijile pakutukamuchisya mfundo sya Baibulo (1) patukukayichila kuti Yehofa akusatuŵalanjila, (2) patukukayichila naga twasagwile yindu mwalunda munyumamu, soni (3) patukukayichila naga tuli ŵakusosekwape kwa Yehofa.
YAMPAKA YAKAMUCHISYE KUTI AMALANE NI KULIKAYICHILA
3. Ana ni litala limo lyapi lyampaka litukamuchisye kumalana ni kulikayichila?
3 Litala limo lyampaka litukamuchisye kuti tumalane ni kulikayichila lili kuŵalanga Maloŵe ga Mlungu ni chakulinga chakuti tupate kwanga kwa yiwusyo yetu. Kutenda yeleyi kuchitukamuchisya kuti tuŵe ŵamachili, tujawule pasogolo mwausimu, nambosoni kuŵa “ŵakulimba m’chikulupi.”—1 Akoli. 16:13.
4. Ana mpaka tutende wuli kuti ‘tusimichisyeje yindu yosope’? (1 Atesalonika 5:21)
4 Aŵalanje 1 Atesalonika 5:21. Baibulo jikusatulimbikasya kuti ‘tusimichisyeje yindu yosope.’ Ana mpaka tutende chamti uli yeleyi? Naga tutandite kukayichila yineyakwe mpaka tutende chenene kulola yajikusasala Baibulo pa nganijo. Kwende tuganichisyesoni ya jwachinyamata jwakulikayichila kuti nganaŵa jwakusosekwa pameso pa Mlungu. Ana jwalakwe akusosekwa kukulupilila kuti nganisyo syelesi sili syakulondola? Iyayi, mmalomwakwe akusosekwa ‘kusimichisya yindu yosope’ mwakuwungunya nganisyo sya Yehofa panganijo.
5. Ana mpaka tupate chamti uli kwanga kwa Yehofa pa yiwusyo yatukwete?
5 Patukuŵalanga Maloŵe ga Mlungu ‘tukusampikana’ Yehofa ali mkuŵecheta ni m’weji. Nambope kupwatika pakuŵalanga Baibulo tukusosekwa kutenda yejinji ni chakulinga chakuti tupate kwanga kwa yiwusyo yetu kutyochela kwa Yehofa. Tukusosekwa tupateje Malemba gampaka gatukamuchisye kupata kwanga kwa yiwusyo yetu. Kuti tukombole kutenda yeleyi tukusosekwa kuwungunya m’mabuku gele gulu ja Yehofa jikusapeleka. (Mis. 2:3-6) Pandaŵi jatukuwungunyaji mpaka tumŵende Yehofa kuti atukamuchisye kupata kwanga kwa chiwusyo chetu. Kaneko tuwungunyeje mfundo ja m’Baibulo soni yindu yine yampaka yitukamuchisye pachakusawusya chetu. Mpaka tutende chenenesoni kuganichisya ngani sya m’Baibulo sya ŵandu ŵaŵasimene ni chakusawusya chakulandanacho.
6. Ana misongano ja mpingo jikusatukamuchisya chamti uli kumalana ni kulikayichila?
6 Yehofa akusaŵechetasoni ni m’weji pandaŵi ja misongano ja mpingo. Myoyo, naga tukusasimanikwa pamisongano ja mpingo ndaŵi syosope, mpaka tupate mfundo jampaka jitukamuchisye kumalana ni kulikayichila kupitila mu ngani jajikuŵechetedwa kapena mu ndemanga. (Mis. 27:17) Sambano kwende tukambilane yindu yampaka yitukamuchisye pandaŵi jatukulikayichila.
PATUKUKAYICHILA NAGA YEHOFA AKUSATUŴALANJILA
7. Ana ŵandu ŵane akusaliwusyaga yiwusyo yapi?
7 Ana wawojo pakwete paliwusisye kuti, ‘Ana Yehofa akusambalanjilaga?’ Naga akusaliwonaga kuti ali ŵangasosekwa mpaka ayiwoneje kuti nganawa akombwele kuŵa paunasi ŵambone ni Yehofa. Yeleyi ni yayamtendechelesoni Mwenye Daudi. Jwalakwe jwaganisyaga kuti Yehofa ali jwapenani mnope mwamti jwayikene pakuliwusya kuti, ‘Ana mundu nduni kuti ŵalakwe AMBUJE amkumbuchileje? Mwanache jwa mundu nduni kuti [ŵalakwe] amganichisyeje?’ (Sal. 144:3) Ana wawojo mpaka apate kwapi kwanga kwa yiwusyo yeleyi?
8. Mwakamulana ni 1 Samuele 16:6, 7, 10-12, ana Yehofa akusalola chichi mwa ŵandu?
8 Baibulo jikusatujiganya kuti Yehofa akusiŵamanyilila ŵandu ŵakusawonedwa kuŵa ŵangasosekwa ni ŵandu ŵane. Mwachisyasyo, Yehofa ŵamtumisye Samuele kwa Jese kuti akasagule jumo mwa ŵanache ŵakwe kuti chaŵe mwenye jwa Ayisalayeli. Nambo Jese jwagambile kwaŵilanga ŵanache 7 mwa ŵanache ŵakwe 8 kuti asimane ni Samuele. Jwalakwe nganamŵilanga Daudi juŵaliji jwachinondipile.b Nambotu Daudijo ni juŵasagulidwe ni Yehofa. (Aŵalanje 1 Samuele 16:6, 7, 10-12.) Yehofa jwammanyililaga chenene Daudi soni jwamanyililaga kuti jwachinyamataju ŵamnonyelaga mnope jwalakwe.
9. Ana ni chichi champaka chakamuchisye kumanyilila kuti Yehofa akusiŵaŵalanjila wawojo? (Alolesoni chiwulili.)
9 Aganichisye yindu yatesile kala Yehofa yakulosya kuti akusiŵaŵalanjila wawojo. Jwalakwe jwasasile kuti chachapa malangiso pachakusawusya chilichose chachachisimana nacho. (Sal. 32:8) Yeleyi yikulosya kuti jwalakwe akwamanyilila chenene wawojo. (Sal. 139:1) Pakukamulichisya masengo malangiso ga Yehofa soni kulola yagakuti pakwakamuchisya chachitanda kuyiwona kuti Yehofa akusiŵaŵalanjila wawojo. (1 Mbi. 28:9; Mase. 17:26, 27) Yehofa akusalolasoni yindu yosope yakusatenda pakumtumichila soni kusaka kumpikanila. Jwalakwe akusalolasoni ndamo syambone syakwete wawojo mwamti akusasaka kuŵa nawo paunasi wambone. (Yel. 17:10) Mwamti jwalakwejo chachiwa jwakusangalala naga wawojo akutenda yakomboleka kuti aŵe najo paunasi wambone.—1 Yoh. 4:19.
“Naga mkusosasosa [Yehofa], jwalakwejo chachikunda kuti mumsimane.” —1 Mbi. 28:9 (Alole ndime 9)c
PATUKUKAYICHILA NAGA TWASAGWILE YINDU MWALUNDA MUNYUMAMU
10. Ana ndaŵi sine mpaka tukole yiwusyo yapi patukuganichisya yindu yatwasagwile kutenda munyumamu?
10 Ndaŵi sine ŵandu ŵane mpaka akayichileje naga munyumamo ŵasagwile yindu mwalunda. Komboleka kuti jemanjaji ŵalesile majiganyo gapenani kapena bisinesi jajikatendekasisye kupata mbiya syejinji ni chakulinga chakuti amtumichileje Yehofa. Nambo sambano komboleka kuti papitile yaka yejinji kutyochela ndaŵi jelejo. Myoyo mpaka ŵawoneje achimjawo kuti yikwajendela chenene mwine akupata mbiya syejinji soni akusangalala ni umi. Jemanjaji mpaka atande kudandawula mwine ni kuliwusyaga kuti, ‘Ana natesile chenene kusagula kumtumichila Yehofa? Kapena yeleyi yindendekasisye kuti ngapataga maupile gane?’
11. Ana ni chichi chachamlagasyaga juŵalembile Salimo 73?
11 Naga wawojo akusaliwusyaga yiwusyo mpela yeleyi mpaka atende chenene kuganichisya mujwapikanilaga juŵalembile Salimo 73. Jwalakwe jwawonaga ŵandu ŵele nganamtumichilaga Yehofa ali mkukola yilu yambone, yindu yili mkwajendela chenene soni ali ngakulagasika nganisyo. (Sal. 73:3-5, 12) Jwalakwe paŵawonaga jemanjanji yindu yili mkwajendela chenene, jwatandite kuliwona kuti nganatenda chenene kusagula kumtumichila Yehofa. Yeleyi yamtendekasyaga kulagasika nganisyo ndaŵi syosope. (Sal. 73:13, 14) Ana jwalakwe jwamalene chamti uli ni nganisyo syakulemwechekasi?
12. Mwakamulana ni Salimo 73:16-18, Ana mundu juŵalembile salimoji jwamalene chamti uli ni yindu yayamlagasyaga nganisyo?
12 Aŵalanje Salimo 73:16-18. Jwamasalimoju jwalinganyisye yakwawula kunyumba ja Mlungu. Kweleko jwalakwe jwatandite kuganisya chenene. Mwamti jwayikopochele kuti atamose yawonekaga kuti ŵane yikwajendela chenene nambo nganakola sogolo jambone. Yinduyi yamkamuchisye kola mtendele wamumtima, ligongo lyakumanyilila kuti kusagula kumtumichila Yehofa chili chindu chambone mnope. Yakuyichisya yakwe, jwalinganyisye yakupitilisya kumtumichila Yehofa.—Sal. 73:23-28.
13. Ana mpaka atende chichi naga akulijimba magambo pa yindu yaŵasagwile munyuma? (Alolesoni chiwulili.)
13 Mpela muyaŵelele ni jwamasalimoju, wawojosoni mpaka apate mtendele wamumtima kutyochela m’maloŵe ga Mlungu. Ana yeleyi mpaka yikomboleche chamti uli? Aganichisyeje yindu yambone yakwete yayikupwatikapo upile wekulungwa wakuŵa paunasi ni Yehofa wanganakola ŵandu ŵakusawoneka kuti yikwajendela chenene. Ŵajinji mwa jemanjaji akusawoneka kuti yindu yikwajendela chenene ligongo akusadalila mnope yindu yakwete. Nambope jemanjaji nganakola chembecheyo chilichose pakwamba yindu ya msogolo. Nambo wawojo akwete yindu yambone yakwatendela Yehofa apano, soni kusogoloku chachapa yejinji yele wawojo nganayiganichisyejepo. (Sal. 145:16) Aganichisyesoni ayi, ana akusamanyilila mwawukaŵelele umi wetu yikaŵe kuti nganitusagula kumtumichila Yehofa? Chindu chatukusosekwa kumanyilila chili chakuti patukusagula kutenda yindu ligongo lya kumnonyela Yehofa soni kwanonyela ŵandu ŵane tuchiŵa ŵakusangalala ndaŵi syosope.
Aganichisyeje yindu yejinji yasasile Yehofa kuti chachatendela kusogoloku (Alole ndime 13)d
PATUKUKAYICHILA NAGA TULI ŴAKUSOSEKWAPE KWA YEHOFA
14. Ligongo chichi ŵandu ŵane akusakayichila kuti ali ŵakusosekwa kwa Yehofa? Ana jemanjaji akusaliwusya chiwusyo chapi?
14 Ŵane mwa ŵakutumichila ŵa Yehofa akusalaga ni uchekulu, kulwalalwala, soni kulaga ligongo lya kulemala. Yeleyi mpaka yatendekasyeje jemanjaji kutanda kukayichila naga ali ŵakusosekwa pameso pa Yehofa. Komboleka jemanjaji mpaka aliwusyeje kuti, ‘Ana ndili jwakusosekwape kwa Yehofa?’
15. Ana mundu juŵalembile Salimo 71 jwasimichisye ya chichi?
15 Nombe mundu juŵalembile Salimo 71 jwasimene ni yakusawusya mpela yeleyi. Jwalakwe jwapopesile kuti, “Akanjasa pa ndaŵi ajino jakuti machili gangu gamasile.” (Sal. 71:9, 18) Atamose kuti yaliji myoyo, jwamasalimoju jwakulupililaga kuti naga akupitilisya kumtumichila Mlungu mwakulupichika jwalakwejo tachipitilisya kumlongolela soni kumkamuchisya. Jwalijiganyisyesoni kuti Yehofa akusasangalala ni ŵandu ŵakusapitilisya kumtumichila atamose kuti akusasimana ni yakusawusya.—Sal. 37:23-25.
16. Ana ŵandu ŵachikulile ali ŵakusosekwape kwa Yehofa mmatala gapi? (Salimo 92:12-15)
16 Naga wawojo ali jwachikulile, aganichisyeje yakusati Yehofa pakwawona jemanja. Jwalakwe mpaka ŵakamuchisye kuti apitilisye kumtumichila mwakulupichika atamose kuti akwete yakusawusya yejinji ya mchilu. (Aŵalanje Salimo 92:12-15.) Mmalo mwaganichisya mnope yindu yanganaŵa akombwele kutenda aganichisyeje mnope yakukombola kutenda. Mwachisyasyo, yindu mpela kulupichika kwawo, soni yakusatendaga pakulosya kwaganichisya ŵane mpaka yalimbikasye jemanjajo. Mpaka ŵasalile ŵane yaŵele ali mkutenda Yehofa pakwakamuchisya jemanja kwa yaka yejinji. Nambosoni mpaka ŵasalile ŵane yakulochesya ya m’Baibulo yakwembecheya kuyiwona yili mkukwanilichikwa. Konjechesya pelepa, akulupililejesoni kuti mapopelo gakusapeleka kwa Yehofa gakwapopelela ŵane gakusaŵa gakamuchisya mnope. (1 Pet. 3:12) Kusala yisyene, chinga yindu yili uli paumi wetu, wosopewe tukwete kanekakwe kampaka tumpe Yehofa soni ŵandu ŵane.
17. Ligongo chichi tukusosekwa kuŵambala kulilandanya ni ŵane?
17 Naga wawojo atandite kuliwona kuti nganaŵa atesile yejinji pakumtumichila Yehofa, akakayichilaga kuti jwalakwejo mpaka ayamichile yiliyose yampaka akombole kutenda. Komboleka ndaŵi sine mpaka alandanyeje yindu yakutenda wawojo ni ŵandu ŵane. Nambope mpaka atende chenene kuŵambala kutenda yeleyi. Yili myoyo ligongo Yehofa jwangalandanyaga wawojo ni ŵane. (Agal. 6:4) Mwachisyasyo, Maliya ŵampele Yesu mawuta gakununjila soni gakudula mnope. (Yoh. 12:3-5) Mwakulekangana ni jwalakwejo, jwamkongwe jwamasije jwakulaga jwapeleche tumakobili tuŵili twamtengo wakutuluka mnope. (Luk. 21:1-4) Nambo Yesu nganalandanya yaŵatesile achakongwe ŵaŵiliŵa. Jwalakwe jwayiweni kuti jemanjaji ŵatesile yeleyi ligongo lya chikulupi. Yaŵatesile Yesuyi yalosisye ndendende mwakusatendela yindu Atati ŵakwe. Myoyo mpaka aŵe ŵakusimichisya kuti Yehofa akusalola yiliyose yakusakombola kutenda ligongo lyakuti akusamkulupilila soni akusamnonyela mnope. Mwamti jwalakwe akusayiwona yindu yeleyi kuŵa yakusosekwa mnope chinga yili yekulungwa kapena yamwana.
18. Ana chichi champaka chitukamuchisye kuti tumalane ni kulikayichila? (Alolesoni libokosi lyakuti “Maloŵe ga Yehofa Mpaka Gakamuchisye Kumalana ni Kulikayichila.”)
18 Wosopewe tukusalikayichilaga ndaŵi sine. Nambope mpela mwatuyiwonele munganiji, Maloŵe ga Mlungu mpaka gatukamuchisye kumalana ni kulikayichila. Myoyo, atendeje yakomboleka kuti apateje kwanga kwa yiwusyo yawo, kutenda yeleyi kuchakamuchisya kuti akadandawulaga. Yehofa akusiŵamanyililaga wawojo pajika. Jwalakwe akusayamichila mnope yindu yakusatenda wawojo pakumtumichila, mwamti kusogoloku chachapa yindu yambone yejinji. Myoyo ndaŵi syosope akulupilileje kuti Yehofa akusiŵanonyela soni kwasamalila ŵakutumichila ŵakwe wosope ŵakulupichika.
NYIMBO NA. 111 Magongo Gakuŵela Ŵakusangalala
a NGOPOLELO JA MALOŴEGA: Munganiji chitukambilane kulikayichila kwampaka kututendekasye kuliwona kuti tuli ŵangasosekwa pameso pa Yehofa kapena kulikayichila naga twasagwile yindu mwalunda munyumamu. Nambo nganikuŵa kukayichila kwakusakusala m’Baibulo kwakukusalosya kuti ngatukusamkulupilila Yehofa soni yindu yajwasasile jwalakwejo kuti chachitutendela.
b Atamose kuti Baibulo jangatusalila yaka yisyesyene yajwakwete Daudi pandaŵi jele Yehofa ŵamsagulaga, nambope komboleka kuti jwalakwe jwaliji jwachinyamata.—Alole ngani jajikusasimanikwa mu Sanja ja Mlonda ja Chichewa ja Sepetemba 1, 2011, peji 9, ndime 2.
c KULONDESYA CHIWULILI : Mlongo jwachisikana akuŵalanga Baibulo pakusaka kumanyilila mwakusayiwonela Yehofa yindu yakusasimana nayo.
d KULONDESYA CHIWULILI: M’bale pakukamula masengo gakuswejesya magalasi kuti akomboleje kulisamalila liŵasa lyakwe akuganichisya mwachachisangalalilaga Mpaladaiso.