Yakamuchisya Pakulijiganya

Atandeje Kulijiganya Yindu Yakusosekwa Mnope

Wosopewe ngatukusakola ndaŵi jakwanila jakutendela lijiganyo lyapajika. Ana mpaka tujikamulichisyeje masengo chamtuli ndaŵiji? Chandanda, amalileje ndaŵi jakwanila palijiganyolyo. Mpaka yiŵe yakamuchisya naga akulijiganya mwakusamala yindu yamnono kulekangana ni kulijiganya yindu yejinji pandaŵi jimo.

Kaneko, aganichisye yindu yine yampaka alijiganyesoni. (Aef. 5:15, 16) Yindu yakuyichisyayi mpaka yakamuchisye mnope.

• Aŵalanjeje Baibulo lisiku lililyose. (Sal. 1:2) Mpaka yiŵe yakamuchisya kukuya ndandanda jakuŵalanjila Baibulo ja wiki jilijose jajikusasimanikwa mu kabuku ka Utumiki ni Umi Wetu Wachiklistu.

• Akosecheleje lijiganyo lya Sanja ja Mlonda soni misongano ja mkati mwa wiki. Akosecheleje ni chakulinga chakuti akapelecheje ndemanga.—Sal. 22:22.

• Mpaka atende chenenesoni kupataga ndaŵi jakulolela mafidiyo soni kuŵalanga magasini gagaŵila nambosoni ngani sine syasikusasimanikwa pa jw.org.

• Alinganyeje yakuwungunya ngani jinejakwe jajasangalesye. Mpaka awungunye yakusawusya yakusimana nayo, yiwusyo ya m’Baibulo, kapena kuwungunya ngani jinejakwe ja m’Baibulo jakusaka kujipikanichisya chenene. Kuti amanyilile yejinji ajawule pa jw.org palembile kuti “Yakuti Atende Pakulijiganya.”