Ana Mpaka Twakamuchisye Chamtuli Ŵakulwala Ulwele wa Kulagasika Nganisyo?

Ana Yeleyi Yikugopolela Chichi?

Mpaka tutenguche mwangasawusya naga mjetu akulwala ulwele wa kulagasika nganisyo. Pakusaka kulosya kuti tukusamnonyela mjetujo, tukusosekwa kutenda yakomboleka kuti tumkamuchisye. Ana mpaka tutende chamtuli yeleyi?

Yampaka Tutende Pakwakamuchisya

‘Aŵeje ŵakwanguya kupikana.’—YAKOBO 1:19.

Litala limo lyampaka tumkamuchisye mjetu lili kumpikanila pakuŵecheta. Akaganisyaga kuti akusosekwa kwanga chilichose champaka aŵechete mjawojo. Chakusosekwa chili chakuti, mjawojo ayiwoneje kuti akumpikanila soni kuti akusamnonyela. Ampikanileje mwakusamala soni aŵambaleje kum’welusya ligongo lya yindu yine yampaka aŵechete. Akumbuchileje kuti mjawojo mpaka aŵechete yindu yine yakuti ngakugopolela yaŵecheteyo mwamti kaneko mpaka atande kudandawula.—Yobu 6:2, 3.

‘Aŵecheteje mwakulimbikasya.’—1 ATESALONIKA 5:14.

Mjawo mpaka alagasicheje nganisyo soni mpaka aliwone kuti ali jwangali mate. Atamose kuti nganaŵa amanyilile yampaka aŵechete, nambo mpaka amlimbikasye soni kumsimichisya kuti akusamnonyela.

“M’mbusanga akusakunonyela ndaŵi ni ndaŵi.”—MISYUNGU 17:17.

Atendeje yakuti amkamuchisyeje mjawojo. Mpaka amwusyeje yindu yakusaka mmalo mwagamba kuganichisya kuti akumanyilila yakusosechela. Naga mjawojo yikumsawusya kuti ŵasalile wawojo yindu yakusosechela, mpaka alinje kumkamuchisya m’litala line. Mwine mpaka amjigale kuti ajawule kumalo ganegakwe kuti akakunguluche. Kapena mpaka amkamuchisye mwakuja kumsumila yindu kumsika, kusamalila pamlango kapena mpaka amkamuchisye kukamula masengo gane.—Agalatiya 6:2.

‘Aŵeje ŵakuwusimana mtima.’—1 ATESALONIKA 5:14.

Amanyilileje kuti ndaŵi sine mjawojo mpaka yimsawusyeje kusala yindu yayili kulukosi kwakwe. Myoyo amsalileje kuti naga pana yindu yine yakusaka kwasalila, wawojo ali wakoseka kumpikanila. Ligongo lyakuti mjawojo akulwala, mpaka yisimanikwe kuti aŵechete kapena kutenda yindu yine yampaka yatumbilikasye. Amanyililejesoni kuti ndaŵi sine mjawojo mpaka ajimuchile kumchiji kapena mpaka alepelekasye kutenda yindu yaŵakamulene. Myoyo pakumkamuchisya, ampikanichisyeje soni aŵeje ŵakuwusimana mtima.—Misyungu 18:24.

Yindu Mpaka Yitande Kumjendela Chenene Mjawo Naga Akumkamuchisya

Farrah,a jwele mjakwe akusalwala ulwele wa kulagasika nganisyo wawukusamtendekasya kuti akasakaga kulya jwasasile kuti, “Ngusaŵaga jwagopoka nichakulinga chakuti mjanguju akomboleje kusalila yayikumlagasya nganisyo. Atamose kuti nganingola litala lyampaka limachisye yakusawusya yakwe, nambope ngusalolechesya kuti ngumpikanila pakusaka kuŵecheta. Ndaŵi sine yakusasaka mjanguju kuli kumpikanila pakuŵecheta. Kutenda yeleyi kukusamkamuchisya kuti mtima wakwe uŵeje mmalo.”

Ha-eun jwakulwala ulwele wa kulagasika mnope nganisyo jwasasile kuti, “Jumo mwa achimjangu ali jwambone soni akusalimbikasya. Jwalakwe ŵambilasile kumangwakwe kuti tukalye yimpepe yakulya. Ligongo lya chinonyelo chakwe, yandendekasisye kuti mbe jwagopoka soni kuti namsalile mwanapikanilaga mumtima. Kusala yisyene yeleyi yalimbikasisye mnope.”

Jacob jwele ŵamkwakwe akusalaga ni ulwele wa kulagasika mnope nganisyo jwasasile kuti, “Kuwusimana mtima kuli kwakusosekwa mnope. Naga ŵamkwangu atesile chindu chinechakawe chakundumbilikasya, ngusamanyilila kuti atesile yeleyo ligongo lya ulwele wa kulagasika nganisyo. Yeleyi yikusangamuchisya kuti ŵambaleje kutumbila mnope soni kuti ndendeje yindu yakwaganichisya ŵamkwangu.”

Enrico jwakulaga ni ulwele wa kulagasika mnope nganisyo jwatite, “Ŵamkwangu akusangamuchisya soni kulimbikasya. Naga ndengwiche ligongo lyakulagasika nganisyo, ŵamkwangu ŵanganganganichisya kuti ndende yindu yine yanguyiwona kuti ngangusosekwa kutenda pandaŵijo. Yeleyitu yikugopolela kuti ndaŵi sine ngakusatenda yindu atamose yakanonyele kuti atende pandaŵijo. Ŵamkwanguŵa ngusinanonyela mnope ligongo ali ŵakoloŵa magasa soni ŵangalinonyela.”