Ŵana Upile Ŵandu Ŵali Ŵakulupichika kwa Yehofa

1-2. (a) Ana maboma gane gatesile yamtuli pakwasisya ŵandu ŵa Yehofa? Nambo ana ŵandu ŵa Yehofa atesile yamtuli? (b) Ligongo chichi mpaka tuŵe ŵakusangalala atamose patukulagasidwa? (Alolesoni chiwulili cha pachikuto.)

PATUKUŴECHETA pano yilambo yakupunda 30, masengo getu ŵagalekasisye. M’yilambo yine mwa yeleyi ŵakulamulila aŵele ali mkwaŵika mundende abale ni alongo ŵetu. Ana jemanjaji ŵalemwisye chichi? Pangali, sonitu Yehofa ngakusiŵawona abale ni alongo ŵeleŵa kuti ali ŵakulemwa. Nambo yaŵele mkutenda jemanjaji yili kuŵalanga Baibulo, kulijiganya Baibulo, kwasalila ŵane yakusakulupilila soni kusongana pampepe ni ŵakulupilila achimjawo. Nambosoni abale ni alongoŵa ŵakanile kutenda nawo yandale. Mwangasamala kandu kuti akwasisya, jemanjaji akupitilisyape kuŵa ŵakulupichika.b Yeleyi yilosisye kuti ali ŵakulipeleka mnope kwa Yehofa. Kusala yisyene yeleyi yikusiyatendekasya jemanjaji kuŵa ŵakusangalala.

² Ngatukukayichila kuti jemanja aŵele ali mkuyiwona yiwulili ya abale ni alongo ŵalosisye kulimba mtima soni ngope syawo sili mkuwoneka syakusangalala. Jemanjaji ali ŵakusangalala ligongo akumanyilila kuti Yehofa akusiŵanonyela ligongo lya kulupichika kwawo. (1 Mbi. 29:17a) Yesu jwatite, “Ŵana upile ŵandu ŵakulagasidwa ligongo lya chilungamo . . . Msangalale mnope ligongo mboto jenu jili jekulungwa.”—Mat. 5:10-12.

YISYASYO YAMPAKA TUJIGALILE

3. Mwakamulana ni Masengo 4:19, 20, ana ŵandumetume ŵatesile chichi paŵalagasidwaga mu yaka 100 yandanda? Ligongo chichi jemanjaji ŵatesile yeleyi?

³ Abale ni alongo ŵetu akusimana ni yakusawusya mpela yaŵasimene nayo ŵandumetume ŵa mu yaka 100 yandanda paŵalalichilaga yakwamba Yesu. Mwakuwilisyawilisya, ŵakulamula ŵa mu koti jekulungwa ja Ayuda, ŵalamwile ŵandumetumeŵa kuti “aleche kuŵecheta chilichose m’lina lya Yesu.” (Mase. 4:18; 5:27, 28, 40) Ana ŵandumetumeŵa ŵatesile chichi? (Aŵalanje Masengo 4:19, 20.) Jemanjaji ŵamanyililaga kuti mundu jwine jwakwete udindo wekulungwa ni ‘juŵalamwile kuti alalichileje kwa ŵandu soni kutendela umboni mwakwanila’ yakwamba Klistu. (Mase. 10:42) Myoyo, mwakulimba mtima, Petulo ni Yohane ŵasasile kuti chachimpikanila Mlungu kulekangana ni ŵakulamulaŵa. Jemanjaji ŵasasilesoni kuti ngasaleka kuŵecheta yakwamba Yesu. Pelepatu yaliji mpela kuti ŵandumetumeŵa akwawusya ŵakulamulilawo kuti ‘Ana jemanja mkuganisya kuti ulamusi wenu uli wakupunda wa Mlungu?’

4. Mwakamulana ni Masengo 5:27-29, ana ŵandumetume ŵapeleche chisyasyo chamtuli kwa Aklistu ŵasyesyene? Ana mpaka twasyasye chamtuli jemanjaji?

⁴ Kutandila pandaŵiji, ŵandumetumeŵa ŵapeleche chisyasyo chambone chaŵele ali mkukuya Aklistu wosope ŵasyesyene. Ŵandumetumeŵa ŵaliji ŵakusachilila “kumpikanila Mlungu mpela jwakulamulila ngaŵaga ŵandu.” (Aŵalanje Masengo 5:27-29.) Jemanjaji paŵakwapulidwe ligongo lya kulupichika kwawo, ŵakopweche mu koti ja Ayudajo “ali mkusangalala pakuyiwona kuti Mlungu ŵaweni kuŵa ŵakuŵajilwa kulagasidwa ligongo lya lina lya Yesu.” Mwamti ŵapitilisye kulalichila.—Mase. 5:40-42.

5. Ana tukusosekwa kupata kwanga kwa yiwusyo yapi?

⁵ Chisyasyo cha ŵandumetumeŵa chikusayikasya yiwusyo yine. Mwachisyasyo, ana yikakomboleche chamtuli kuti jemanjaji ampikanileje Mlungu mmalo mwa ŵandu, nambo pandaŵi jijojo ni kupikanilagasoni lilamusi lya m’Malemba lyakuti “ŵapikanileje ŵakulamulila”? (Alo. 13:1) Nambi m’weji mpaka tutende uli kuti ‘twapikanileje ŵakulamulila’ mpela muŵaŵechetele ndumetume Paulo, kwineku tuli mkupitilisya kuŵa ŵakulupichika kwa Mlungu jwali jwakulamula jwetu jwamkulungwa mnope?—Tit. 3:1.

“ŴAKULAMULILA”

6. (a) Ana ‘ŵakulamulila” ŵakwakolanga pa Aloma 13:1 ali ŵani? Ana m’weji twawoneje chamtuli jemanjaji? (b) Ana ŵakulamulila akwete machili gamtuli?

⁶ Aŵalanje Aloma 13:1. Palilembali, maloŵe gakuti ŵakulamulila gakusala ya ŵandu ŵakwete udindo wakwalamulila ŵane. Aklistu akusasosekwa kwapikanila ŵakulamulila ŵeleŵa. Ŵakulamulilaŵa akusaŵika malamusi, kutamilikasya mtendele, nambosoni ndaŵi sine akusiŵachenjela ŵandu ŵa Yehofa. (Chiw. 12:16) Mwamti ni ligongo lyakwe akusatulamulaga kuti twapeje jemanjaji yindu mpela misongo, kwapa ulemu, nambosoni kwachimbichisya. (Alo. 13:7) Nambope, ŵakulamulilaŵa akwete maudindo gawo ligongo lyakuti Yehofa ni juŵakundile kuŵa mmaudindogo. Yesu jwasasile mwakupikanika chenene mfundo jeleji pajwawusidwaga yiwusyo ni Pilato. Nambo Pilato pajwamsalilaga Yesu ya machili gakwete kuti mpaka agakamulichisye masengo pakumgopola soni pakumwulaga, Yesujo jwamjanjile kuti “Wawojotu ngamkanakola machili galigose pa une yikaŵe kuti nganagapochela kutyochela kwinani.” (Yoh. 19:11) Mwakulandana ni Pilato, nombe masiku agano machili gakusakola ŵakulamula soni ŵandale gakwete malile.

7. Ana ngatukusasosekwa kwapikanila ŵakulamulila pa yindu yapi? Ana jemanjaji akusasosekwa kumbuchila chichi?

⁷ Aklistu akusapikanila malamusi ga maboma naga ngagakutindana ni malamusi ga Mlungu. Nambo ngatukusitwapikanila ŵandu naga atulamwile kutenda yindu yakutindana ni yakusasaka Mlungu. Mwachisyasyo, ŵakulamulilaŵa mpaka asache kuti ŵachinyamata ajinjile usilikali.c Kapena mpaka alekasye kukamulichisya masengo Baibulo kapena mabuku gakulondesya Baibulo. Nambosoni mpaka atulekasye masengo gakulalichila soni kusongana pampepe ni abale ni alongo ŵetu. Ŵakulamulilaŵa pakukamulichisya masengo udindo wawo mwakulemwecheka, mwakwalagasya ŵakumkuya ŵa Yesu, jemanjaji chachijanga kwa Mlungu. Ngatukukayichila kuti Yehofa akusayiwona yakusatenda ŵakulamulilaŵa.—Jwak. 5:8.

8. Ana pana kulekangana kwamtuli pasikati pa “ŵakulamulila” soni jwakulamulila “Jwakupunda yosope”? Ligongo chichi yeleyi yili yakupikanika?

⁸ Maloŵe gakuti “ŵakulamulila” gakusagopolela “jwambone, jwamkulungwa, soni jwapenani.” Nambo panasoni maloŵe gane gakuti “Jwakupunda yosope.” Maloŵega gakusagopolela kuti “jwambone mnope, jwamkulungwa mnope, soni jwapenani mnope.” Atamose kuti ŵandu ŵakwete maudindo m’boma akusakolanjidwaga kuti “ŵakulamulila,” nambo pana jwakulamula jwine Jwakupunda yosope. Mwamti m’Baibulo kwa maulendo mcheche, Yehofa Mlungu akusakolanjidwa kuti “Jwakupunda yosope.”—Dan. 7:18, 22, 25, 27.

“JWAKUPUNDA YOSOPE”

9. Ana jwakulochesya Daniele jwayiweni yindu yapi mmesomkulola?

⁹ Kupitila mmesomkulola, jwakulochesya Daniele jwayiweni kuti Yehofa ali jwakupunda maulamusi gosope. Pandanda, Daniele jwayiweni yilombo mcheche yekulungwakulungwa yayajimilaga maulamusi gamachili ga pachilambopa. Yilomboyi yajimilaga ulamusi wa Babiloni, ulamusi wa Amedi ni Apelesi, ulamusi wa Gilisi, soni ulamusi wa Loma nambosoni ulamusi wawukulamulila masiku agano wa Britain ni America wawatyochele mu ulamusi wa Loma. (Dan. 7:1-3, 17) Kaneko Daniele ŵamweni Yehofa Mlungu ali atemi pachitengu cha uchimwene m’luŵala lwamagambo kwinani. (Dan. 7:9, 10) Yindu yakuyichisya yaŵayiweni jwakulochesyaju yikwakalamusya ŵakulamulila ŵa masiku agano.

10. Mwakamulana ni Daniele 7:13, 14, 27, ana Yehofa chachigapeleka kwa ŵani maulamusi ga ŵandu ŵapachilambopa? Ana yeleyi yikulosya chichi pakwamba ya jwalakwe?

¹⁰ Aŵalanje Daniele 7:13, 14, 27. Mlungu akusumula maulamusi gosope ga ŵandu ni kugapeleka kwa ŵane ŵali ŵakuŵajilwa soni ŵamachili mnope. Ana akugapeleka kwa ŵani? Kwa “jwine jwakulandana ni mundu,” jwali Yesu Klistu, soni kwa “ŵaswela mtima ŵa Mlungu Jwakupunda yosope,” ŵali ŵa 144,000 ŵachachilamulila “mpaka kalakala.” (Dan. 7:18) Kusala yisyene, Yehofa ni jwali “Jwakupunda yosope” mwamti jwalakwe jika ni jwakwete machili gakutenda yeleyi.

11. Ana chindu chine chapi chiŵalembile Daniele chakulosya kuti Yehofa ali Jwakupunda maulamusi ga ŵandu?

¹¹ Yindu yaŵayiweni Daniele mmesomkulola gala yikukamulana ni yindu yajwasasile jwalakwe pandanda kuti, “Mlungu jwa kwinani akusakwesya ayimwene ni kwatulusyasoni.” Jwalakwe jwalembilesoni kuti, “Jwakupunda yosope akwete machili gakulamulila ma uchimwene ga ŵandu. Soni komboleka kumsagula mundu jwalijose jwakumsosa kuti aŵe mwenye.” (Dan. 2:19-21; 4:17) Ana Yehofa pakwete pasumwile uchimwene ni kuwupeleka kwa ŵakulamulila ŵane? Elo pakwete patesile yeleyi.

12. Ana ni yisyasyo yapi yayikulosya kuti mundaŵi jamunyuma Yehofa jwatyosisye ŵakulamulila pa yitengu yawo ya uchimwene? (Alole chiwulili.)

¹² Yehofa jwalosisye kuti ali jwakupunda “ŵakulamulila” ŵa pachilambopa. Kwende tulole yisyasyo yitatu yakuyichisyayi. Falawo juŵaliji mwenye jwa Iguputo jwajigele ŵandu ŵa Yehofa kuŵa achikapolo ŵakwe, mwamti jwakanaga kwagopola. Nambo Mlungu jwagopwele ŵandu ŵakweŵa soni ŵamjonasile Falawo pa Nyasa Jechejewu. (Eks. 14:26-28; Sal. 136:15) Mwenye Belishesala jwa ku Babiloni jwatesile chindimba mwamti ‘jwalikwesisye mwakusisyana ni AMBUJE ŵakwinani.’ Nambosoni jwaŵele ‘mkujilumba milungu jasilifa soni jagolidi’ mmalo mwa Yehofa. (Dan. 5:22, 23) Nambo Mlungu ŵamtulwisye mundu jwakulikwesyaju. Mwamti “chilo chichocho,” Belishesala ŵawulajidwe soni uchimwene wakwe wapelechedwe kwa Amedi ni Apelesi. (Dan. 5:28, 30, 31) Nombe Mwenye Halodi Agilipa Jwandanda jwa ku Palesitina jwamwuleje ndumetume Yakobo soni kaneko ŵamŵisile mundende ndumetume Petulo, ni chakulinga chakuti amwulaje. Nambo Yehofa jwatesile yakuti yeleyi yikakomboleka. Mwamti “lilayika lya Yehofa lyamkang’andile jwalakwejo,” soni jwawile.—Mase. 12:1-5, 21-23.

13. Apeleche chisyasyo chachikulosya kuti Yehofa jwagomeche magulu ga ŵandu ŵakulamulila.

¹³ Yehofa aŵele ali mkulosyasoni kuti ali jwakupunda pa ŵakulamulila wosope ŵakutendela yindu yimpepe. Jwalakwe jwaputile ngondo Aisalaeli, mwakwakunda kuti awugomeche mkamulano wa achayimwene 31 ŵa ku Kanani ni kusumula chilambo chaŵasalile kuti chachapa. (Yos. 11:4-6, 20; 12:1, 7, 24) Yehofa jwakamuchisyesoni Aisalaeli kuti amgomeche Benihadadi yalumo ni achayimwene 32 ŵa Asiliya.—1 Ayi. 20:1, 26-29.

14-15. (a) Ana Mwenye Nebukadinesa ni Daliyasi ŵasasile yamtuli pakwamba ya ulamusi wa Yehofa? (b) Ana jwa masalimo jwasasile yamtuli yakwamba Yehofa soni ŵandu ŵakwe?

¹⁴ Ndaŵi syosope, Yehofa aŵele ali mkulosya kuti ali jwakulamulila Jwakupunda yosope. Pandaŵi jine Mwenye Nebukadinesa jwa ku Babiloni jwapokaga pakwamba ya ‘machili gakwe ni uchimbichimbi wakwe’ mmalo mwakumchimbichisya Yehofa. Ligongo lya yeleyi Mlungu ŵamtendekasisye masoka. Nambo masokago pagamasile, jwalakwe ‘jwamlambile Mlungu Jwakupunda yosope.’ Jwalakwe jwamanyililesoni kuti ‘Uchimwene [wa Yehofa] uchilamulila mpaka kalakala.’ Jwasasilesoni kuti, “Pangali atamose jumo jwampaka jwalekasye kutenda yakuyisosa.” (Dan. 4:30, 33-35) Panyuma pakuti Daniele alinjidwe kulupichika kwakwe, Yehofa jwamkulupwisye mwisimbo lya masimba. Kaneko Mwenye Daliyasi jwatite, “Ŵandu wosope ŵa mu uchimwene wangu amjogope ni kumchimbichisya Mlungu jwa Daniele. Jwalakwe ali Mlungu jwa umi ni jwampaka kalakala, machili ga uchimwene wakwe ngasigajonasika, ulamusi wakwe ngasiwumala mpaka kalakala.”—Dan. 6:7-10, 19-22, 26, 27.

¹⁵ Jwamasalimo jwasasile kuti, “Yakusaganisya ŵandu ŵamitundu, AMBUJE akusayigalawusya kuŵa yangali mate kose, nganisyo syawo syosope akusigalawusya kuŵa syachabe.” Jwasasilesoni kuti, “Wana upile mtundu wa ŵandu ŵele AMBUJE ali Mlungu jwawo; ŵandu ŵele AMBUJE ŵiŵasagwile kuti aŵe ŵakweŵakwepe.” (Sal. 33:10, 12) Kusala yisyene, gelegatu gali magongo gambone mnope gakuŵela ŵakulupichika kwa Yehofa.

NGONDO JAKUMALISYA

16. Ana mpaka tuŵe ŵakusimichisya ya chichi pakwamba ya “yakusawusya yekulungwa,” soni ligongo chichi? (Alole chiwulili.)

¹⁶ Pakwika apano tuyiweni yajwatesile Yehofa munyumamu. Nambo ana tukwembecheya kuti kusogoloku jwalakwe chachitenda yamtuli? Tuli ŵakusimichisya kuti Yehofa chachakulupusya ŵakutumichila ŵakwe ŵakulupichika pandaŵi ja “yakusawusya yekulungwa.” (Mat. 24:21; Dan. 12:1) Jwalakwe chachitenda yeleyi pandaŵi jele mkamulano wa yilambo wawukusamanyika kuti Gogi jwa yilambo ya Magogi chachajimuchila ŵandu ŵali ŵakulupichika kwa Yehofa. Atamose yili mkuti mkamulano welewu ukupwatikapo mamembala gosope 193 ga bungwe ja United Nations, jemanjaji ngasakombola kulimbana ni Machili ga Jwakulamula Jwakupunda yosope yimpepe ni asilikali ŵakwe ŵakwinani. Yehofa jwasasile kuti, “Amu ni mwele mu chinjilochesya kwa mitundu josope kuti une ndili jwamachili ni jwamswela. Myoyo pelepo tachimanyilila kuti une ndili AMBUJE.”—Esek. 38:14-16, 23; Sal. 46:10.

17. Ana Baibulo jikusasala kuti mamwenye ga pachilambopa soni ŵandu ŵali ŵakulupichika kwa Yehofa yichatendechela yamtuli?

¹⁷ Kwimuchila kwa Gogi kuchitandikasya ngondo jakumalisya ja Alamagedo. Pandaŵi jeleji Yehofa chachijonanga “mamwenye ga pachilambo chosope.” (Chiw. 16:14, 16; 19:19-21) Mwakulekangana ni yeleyi, “ŵandu ŵakulungama ni ŵitachitama pachilambo chino, soni ŵandu ŵakulupichika ni ŵatachisigalila kutamilichika mwelemo.”—Mis. 2:21.

TUPITILISYE KUŴA ŴAKULUPICHIKA

18. Ana Aklistu ŵasyesyene aŵele ali mkutenda chichi, soni ligongo chichi? (Daniele 3:28)

¹⁸ Kwa yaka yejinji, Aklistu ŵasyesyene aŵele ali mkuŵika umi wawo pangosi ligongo lyakumnonyela Yehofa jwali Jwakuŵajilwa Kulamulila. Jemanjaji akusalingalinga kuŵa ŵakulupichika kwa Yehofa. Yakusatenda jemanjaji yikusalandana ni yaŵatesile Ahebeli ŵatatu ŵaŵaŵele ŵakulupichika kwa Yehofa jwelesoni jwakulupwisye jemanjaji mu ng’aso ja moto.—Aŵalanje Daniele 3:28.

19. Ana Yehofa chachalamula ŵandu ŵakwe pakujigalila chichi? Ana tukusosekwa kutenda chichi apano?

¹⁹ Jwamasalimo Daudi jwalembile yakwamba kusosekwa kwakupitilisya kuŵa ŵakulupichika. Jwalakwe jwatite, “AMBUJE akusalamula ŵandu wosope, Andamule une AMBUJE, mwakulingana ni goloka kwangu ni mwakulingana ni kulupichika kwangu.” (Sal. 7:8) Daudi jwalembilesoni kuti, “Kulupichika kwangu ni kulungamika kwangu kunjenjele une, pakuŵa ngwakulupilila ŵalakwe.” (Sal. 25:21) Chindu chakusosekwa mnope chili kuŵa ŵakulupichika kwa Yehofa. Mwamti tukakunda kuti chilichose chitulepelekasye kuŵa ŵakulupichika kwa jwalakwe. Patukutenda yeleyi, tuchipikana mpela muŵapikanile jwamasalimo juŵalembile kuti, “Ŵana upile ŵele [ŵali ŵakulupichika] ŵele ŵakwenda ali mkukuya malamusi ga AMBUJE.”—Sal. 119:1.