NGANI JAKULIJIGANYA 30
Maloŵe Gakulochesya Gakusosekwa Mnope
“Timbiche uŵengani sikati ja m’mwejo ni jwamkongweju.”—GEN. 3:15.
NYIMBO NA. 15 Amlumbeje Jwandanda Kupagwa jwa Yehofa!
YACHITULIJIGANYEa
1. Ana Yehofa ŵatesile chichi Adamu ni Hawa paŵalemwisye? (Genesesi 3:15)
PAŴAGAMBILE kulemwa Adamu ni Hawa, Yehofa ŵapeleche chembecheyo kwa ŵanache ŵawo. Jwalakwe jwatesile yeleyi kupitila m’maloŵe gakulochesya gagali gakusosekwa mnope. Maloŵega gakusimanikwa pa Genesesi 3:15.—Aŵalanje.
2. Ligongo chichi maloŵe gakulochesyega gali gakusosekwa mnope?
2 Maloŵe gakulochesyaga, gakusasimanikwa m’buku jandanda ja m’Baibulo. Nambope yagakusasala mabuku gosope m’Baibulo, yikusakamula ni maloŵega mulitala line lyakwe. Mpela mwayikusaŵela kuti m’gomba ukusakamuchisya kuti msakasa wosope uŵe wakamulana mnope, nombenago maloŵe ga pa Genesesi 3:15 gakusakamuchisya kuti utenga wosope wa m’Baibulo uŵe wakamulana. Utenga wakwe uli wakuti, chachiyika jwakutukulupusya jwachachimjonanga Satana ni wosope ŵali kumbali jakwe.b Kusala yisyene yeleyi yichiŵa yakusangalasya mnope kwa ŵandu wosope ŵakusamnonyela Yehofa.
3. Ana chitukambilane chichi munganiji?
3 Pakwamba ya maloŵe gakulochesya gagali pa Genesesi 3:15, munganiji chitukambilane yiwusyo ayi: Ana ŵani ŵakwasala m’maloŵe gakulochesyaga? Ana maloŵe gakulochesyaga gakwanilichikwe chamtuli? Ana ni umbone wamtuli watukupata ligongo lya maloŵe gakulochesyaga?
ANA ŴANI ŴAKWASALA M’MALOŴE GAKULOCHESYAGA?
4. Ana lijoka ali ŵani? Ana tukumanyilila chamtuli yeleyi?
4 Lilemba lya Genesesi 3:14, 15 likusasala ya “lijoka,” “mwanache” jwa lijoka, “jwamkongwe” soni “mwanache” jwa jwamkongwe. Baibulo jikusatukamuchisya kwamanyilila chenene jemanjaji.c Kwende tutande kukambilana ya “lijoka.” Yaliji yangakomboleka kuti lijoka lisyesyene lipikanichisye yaŵasasile Yehofa mumgunda wa Edeni. Yeleyi yikulosya kuti Yehofa jwaŵechete ku chakupanganyikwa chalunda. Sambano ana Yehofa jwaŵechetanaga ni ŵani? Lilemba lya Chiwunukuko 12:9 likusatusalila mwakupikanika chenene jwali lijoka. Lilembali likusatusalila kuti lijoka likwimila jwakusakala kapena Satana. Nambo ana mwanache jwa lijoka ali ŵani?
LIJOKA
Ali Satana jwele pa Chiwunukuko 12:9 akusamkolanga kuti “chingwena chekulungwa” (Alole ndime 4)
5. Ana ŵanache ŵa lijoka ali ŵani?
5 Ndaŵi sine Baibulo jikusakamulichisya masengo maloŵe gakuti mwanache, pakusala ya ŵandu ŵakusatenda yindu mwakumsyasya mundu jwine jwakwe. Myoyo mpaka twakolanje ŵanduwo kuti ali ŵanache ŵa mundujo. Ni pakwamba ya ŵanache ŵa lijoka, ali malayika gangakulupichika soni ŵandu ŵakusatenda yindu mpela Satana. Jemanjaji akusakana kumlambila Yehofa soni akusiŵasisya ŵandu ŵakwe. Ŵanache ŵa lijoka akupwatikapo malayika gagatyosile kwinani ni kwika pachilambo chapasi mundaŵi ja Nowa. Nambosoni ŵandu ŵakusakala ŵakusatenda yindu mpela atati ŵawo Satana.—Gen. 6:1, 2; Yoh. 8:44; 1 Yoh. 5:19; Yud. 6.
MWANACHE JWA LIJOKA
Jili misimu jakusakala soni ŵandu ŵakusamkana Yehofa Mlungu nambosoni ŵakusalimbana ni ŵandu ŵa Mlungu (Alole ndime 5)
6. Ligongo chichi nganituŵa tusasile kuti “jwamkongwe” jwakumsala m’maloŵe gakulochesyaga ali Hawa?
6 Sambano, kwende tulole kuti ana jwamkongwe ali ŵani? Nganituŵa tusasile kuti jwamkongweju jwaliji Hawa. Ligongo chichi tukuŵecheta yeleyi? Agambe ganichisya ayi. Maloŵe gakulochesya gala gasasile kuti mwanache jwa jwamkongwe “tachikasa” mtwe wa lijoka. Mpela mwatuyiwonele kala, lijoka likwimila Satana jwali lilayika lyakusakala. Myoyo mundu jwangali umlama jwakutyochela kwa Hawa nganaŵa akombwele kukasa mtwe wa Satana. Sambano ŵani ŵakatesile yeleyi?
7. Mwakamulana ni lilemba lya Chiwunukuko 12:1, 2, 5, 10, ana jwamkongwe jwakumsala pa Genesesi 3:15 ali ŵani?
7 Buku jakumalisya ja m’Baibulo jikusatusalila ya jwamkongwe jwakumkolanga pa Genesesi 3:15. (Aŵalanje Chiwunukuko 12:1, 2, 5, 10.) Jwamkongwe jweleju nganaŵa jwa pachilambo chapasi. Sajo sya jwamkongweju sipondile pa mwesi. Sonitu pa mtwe pakwe pana chisoti cha Uchimwene chachikwete ndondwa 12. Jwalakwe jwaŵeleche mwanache jwakusimonjesya mnope, jwakwimila Uchimwene wa Mlungu. Uchimwenewu uli kwinani. Myoyo jwamkongweju alisoni kwinani. Jwamkongweju akwimila mbali ja gulu ja Yehofa ja kwinani, gagali malayika gakwe gakulupichika.—Agal. 4:26.
JWAMKONGWE
Ali mbali jakwinani ja gulu ja Yehofa jakupanganyidwa ni yakupanganyikwa yausimu yakulupichika (Alole ndime 7)
8. Ana mwanache jwakusosekwa mnope jwa jwamkongwe ali ŵani? Ana jwaŵele mwanache jwa jwamkongwe chakachi? (Genesesi 22:15-18)
8 Maloŵe ga Mlungu gakusatukamuchisya kumanyilila mwanache jwakusosekwa mnope jwa jwamkongwe. Mwanache jweleju jwaliji jwakuti chachiŵa chisukulu cha Abulahamu. (Aŵalanje Genesesi 22:15-18.) Maloŵe gakulochesyaga gakwanilichikwe. Yili myoyo ligongo lyakuti Yesu jwapagwile mu msela wa nangolo jwakulupichikaju. (Luk. 3:23, 34) Nambope mwanacheju jwasosekwaga kuŵa jwamachili kupunda gakusakola ŵandu. Yili myoyo ligongo lyakuti jwasosekwaga kuti chakase mtwe wa Satana kuti akasimanikwasoni. Myoyo Yesu paŵakwete yaka 30 jwasagulidwe ni msimu weswela wa Mlungu. Yesu paŵagambile kusagulidwa, jwaŵele mbali jakusosekwa mnope ja mwanache jwa jwamkongwe. (Agal. 3:16) Yesu paŵawile ni kwimuka, Mlungu ŵampele “lumbili ni uchimbichimbi wa uchimwene.” Nambosoni ŵampele “ulamusi wosope kwinani ni pasi pano.” Ulamusiwu ukupwatikapo “konanga yitendo ya Satana.”—Aheb. 2:7; Mat. 28:18; 1 Yoh. 3:8.
MWANACHE JWA JWAMKONGWE
Ali Yesu Klistu soni ŵa 144,000 ŵaŵasagulidwe kuti chalamulile najo yimpepe (Alole ndime 8-9)
9-10. (a) Ana ni ŵanisoni ŵali mbali ja ŵanache ŵa jwamkongwe? Ana ni ndaŵi japi jele jemanjaji akusaŵa ŵanache ŵa jwamkongwe? (b) Ana sambano chitukambilane chichi?
9 Nambotu panasoni ŵanache ŵane ŵa jwamkongweju. Ndumetume Paulo jwasasile ya mbali ja mwanache jwa jwamkongweju pandaŵi jaŵalembele chikalata Aklistu ŵasagulwe ŵa Chiyuda soni ŵanganaŵa Ayuda. Jwalakwe ŵasalile jemanjaji kuti, “Naga jemanja mli ŵakwe ŵa Klistu, ni kuti mli yisukulu ya Abulahamu, ŵakwenela kupochela yiŵatesile chilanga Mlungu.” (Agal. 3:28, 29) Yehofa pamsagwile Mklistu ni msimu wakwe weswela, Mklistujo akusaŵa mbali ja ŵanache ŵa jwamkongwe. Myoyo ŵanache ŵa jwamkongwe ali Yesu pampepe ni ŵa 144,000 ŵachachilamulila ni jwalakwe. (Chiw. 14:1) Jemanjaji akusaganisya soni kutenda yindu mpela Atati ŵawo ŵali Yehofa Mlungu.
10 Pakwika apano tumanyilile ŵakwakolanga pa Genesesi 3:15. Kwende sambano tulole yatesile Yehofa kuti akwanilisye maloŵe gakulochesyaga. Chitulolesoni kuti ana yeleyi yikusatukamuchisya chamtuli m’weji.
ANA YEHOFA ATESILE YAMTULI KUTI AKWANILISYE MALOŴE GAKULOCHESYAGA?
11. Ana lilemba lya Genesesi 3:15 likusagopolela chichi palikusala kuti lijoka lichiluma chindende cha mwanache jwa jwamkongwe?
11 Pa Genesesi 3:15 pakusasala kuti lijoka lichiluma “chindende” cha mwanache jwa jwamkongwe. Yeleyitu yatendekwe. Satana jwakamulichisye masengo Ayuda soni Aloma kuti amwulaje mwanache jwa Mlungu. (Luk. 23:13, 20-24) Mundu pawulele pa chindende mpaka alepeleje kwenda kwa masiku nditu. Mwelemutu ni mwayaŵelele ni Yesu ali awile. Jwalakwe jwatemi m’malembe kwa masiku gatatu soni kwa masiku gelega nganakombolaga kutenda chilichose.—Mat. 16:21.
12. Ana Yesu chachikasa wuli mtwe ŵa lijoka? Ana yeleyi yichitendekwa chakachi?
12 Yesu jwasosekwaga kwimuka kuti maloŵe ga pa Genesesi 3:15 gakwanilichikwe. Ligongo chichi tukuti myoyo? Ligongo lyakuti maloŵe gakulochesyaga gakusasala kuti mwanacheju chachisosekwa kukasa mtwe wa lijoka. Yeleyitu yagopolelaga kuti Yesu jwasosekwaga kwimuka kumalembe mwamti ni yayatendekwe. Palisiku lyatatu Yesu jwajimwiche ni chilu chausimu chele chili changakomboleka kuwa. Pandaŵi jaŵasagwile Mlungu, Yesu tachimkasa Satana kuti akasasimanikwasoni. (Aheb. 2:14) Yesu pampepe ni ŵa 144 000, tachijonanga adani wosope ŵa Mlungu ŵali ŵanache ŵa lijoka.—Chiw. 17:14; 20:4, 10.d
ANA NI UMBONE WAMTULI WATUKUPATA LIGONGO LYA MALOŴE GAKULOCHESYAGA?
13. Ana tukusapata umbone wamtuli ligongo lya kukwanilichikwa kwa yakulochesyayi?
13 Naga wawojo ŵalipeleche kuti amtumichileje Mlungu, nikuti kukwanilichikwa kwa maloŵega kukwakamuchisya. Yesu jwayiche pachilambo chapasi mpela mundu. Jwalakwe jwalosyaga chenene ndamo syakwete Atati ŵakwe. (Yoh. 14:9) Patwalijiganyisye yakwamba Yesu twammanyilile Yehofa Mlungu soni twatandite kumnonyela. Pana umbone winesoni watukupata ligongo lya yindu yakusatujiganya Yesu soni yakutenda pakulongolela mpingo wa Chiklistu masiku agano. Jwalakwe jwatujiganyisye yampaka tutende kuti tumsangalasyeje Yehofa. Nambosoni pakuŵa kuti Yesu jwawulele pachindende kapena kuti jwawile, chiwa chakwechi chikusatukamuchisya. Ana chiwa chakwechi chikusatukamuchisya chamtuli? Yesu pajwajimwiche ku ŵawe, jwapeleche kwa Yehofa mbopesi ja mlama ‘jajikusatuswejesya ni kututyochesya ulemwa uliwose.’—1 Yoh. 1:7.
14. Ana tukumanyilila chamtuli kuti yaŵasasile Yehofa mu mgunda wa Edeni nganiyikwanilichikwa ndaŵi jijojo? Alondesye.
14 Maloŵe gakulochesya gaŵaŵechete Yehofa mumgunda wa Edeni galosisye kuti pachijigala ndaŵi kuti yosope yikwanilichikwe. Yaliji yakuti pachijigala ndaŵi kuti mwanache jwa jwamkongwe awonechele, kuti Satana asonganganye ŵakumkuya ŵakwe soni kuti papagwe uŵengani pasikati pa ŵanache ŵa jwamkongwe ni ŵa Satana. Kumanyilila yeleyi kuli kwakusosekwa kwa m’weji. Ligongo yikusatukalamusya kuti chilambo cha Satanachi chichaŵenjeje ŵakutumichila ŵa Yehofa. Pali papite ndaŵi Yesu ŵakalamwisyesoni ŵakulijiganya ŵakwe ya yeleyi. (Maliko 13:13; Yoh. 17:14) Kwa yaka 100 yipiteyi, tuŵele tuli mkujiwona mbali jine ja yakulochesyayi yili mkukwanilichikwa. Ana yeleyi yitendekwe chamtuli?
15. Ligongo chichi chilambo chikusaŵengana ni mwanache jwa jwamkongwe? Ligongo chichi ngatukusosekwa kumjogopa Satana?
15 Satana jwatopoledwe kwinani, Yesu paŵagambile kuŵa Mwenye mu 1914. Satana ali pachilambo chapasi kwembecheya konanjidwa. (Chiw. 12:9, 12) Nambope jwalakwe nganagamba kutama. Satana ali jwakutumbila mnope mwamti akulimbana ni ŵandu ŵa Mlungu. (Chiw. 12:13, 17) Ni ligongo lyakwe chilambo cha Satanachi chikusichaŵenga ŵandu ŵa Mlungu kupundana ni kalakose. Nambope ngatukusosekwa kumjogopa Satana. Mmalomwakwe tukoleje chikulupi chaŵakwete ndumetume Paulo juŵalembile kuti, “Naga Mlungu ali kumbali jetu, ana ŵani ŵampaka asisyane ni uwe?” (Alo. 8:31) Mpela mwatuyiwonele, yindu yejinji yakuyisala pa Genesesi 3:15 yikwanilichikwe kala. Yeleyi yitutendekasyeje kumkulupilila mnope Yehofa.
16-18. Ana kupikanichisya lilemba lya Genesesi 3:15 kwakamuchisye chamtuli ŵamboni ŵane?
16 Yaŵasasile Yehofa pa Genesesi 3:15 mpaka yitukamuchisye patukusimana ni yindu yakulinga chikulupi. M’bale Curtis jwali mishonale ku Guam jwasasile kuti, “Ndaŵi sine ngusasimana ni yindu yayikusalinga kulupichika kwangu kwa Yehofa. Nambo kuganichisya mnope lilemba lya Genesesi 3:15 kungamuchisye kuti nakulupilileje Atati ŵangu ŵakwinani.” M’baleju akusajembecheya ndaŵi jele Yehofa chachimasya yakusawusya yetu yosope.
17 Mlongo Ursula jwa ku Bavaria jwasasile kuti kupikanichisya lilemba lya Genesesi 3:15 kwamkamuchisye kuti akulupilileje kuti Baibulo jili Maloŵe ga Mlungu. Jwalakwe jwasangalele kumanyilila kuti yakulochesya yosope ya m’Baibulo yikusakamulana ni lilembali. Mlongoju jwatite, “Yalimbikasisye kumanyilila kuti Yehofa jwatesilepo kandu ndaŵi jijojo kuti ŵandu akole chembecheyo.”
18 Nombenajo Jessica jwa ku Micronesia jwasasile kuti, “Ngusakumbuchila mwanapikanile mumtima panamanyilile kuti mbatile usyesyene. Maloŵe ga pa Genesesi 3:15 gakukwanilichikwa. Yeleyi yikusangamuchisya kumbuchila kuti Yehofa nganasakaga kuti tusimaneje ni yakusawusya yatukusimana nayo masiku agano. Nambosoni yakulochesyayi yingamuchisye kusimichisya kuti kumtumichila Yehofa kukusandendekasya kola umi wambone apano soni msogolo.”
19. Ligongo chichi ngatukusosekwa kukayichila kuti mbali jakumalisya ja maloŵe gakulochesyaga jichikwanilichikwa?
19 Mpela mwatuyiwonele, lilemba lya Genesesi 3:15 likukwanilichikwa. Pakwikana apano tummanyilile chenene mwanache jwa jwamkongwe soni jwa lijoka. Yesu jwali mbali jakusosekwa mnope ja mwanache jwa jwamkongwe aposile liŵanga lyakwe lya pa chindende soni ali Mwenye jwamachili jwanganaŵa awile. Nambosoni masengo gakusagula mbali jaŵili ja mwanache jwa jwamkongwe gasigele panandi kumala. Mbali jandanda ja maloŵe gakulochesyaga jikwanilichikwe. Yeleyi yitutendekasyeje kuti tukakayichilaga kuti mbali jakumalisya ja yakulochesyayi, jajili kukasa mtwe wa lijoka jichikwanilichikwasoni. Kusala yisyene ŵandu ŵakulupichika chachisangalala mnope Satana pachachijonanjidwa. Kwende tukawujila munyuma patukwembecheya ndaŵi jakusangalasyaji. Mlungu jwetu ali jwakulupichika. Jwalakwe chachikamulichisya masengo mwanache jwa jwamkongwe pakupeleka yindu yambone kwa “mitundu josope ja ŵandu ŵa pa chilambo chosope chapasi.”—Gen. 22:18.
NYIMBO NA. 23 Yehofa Atandite Kulamulila
a Kuti tujipikanichisye chenene Baibulo tukusosekwa kupikanichisya maloŵe gakulochesya gagali pa Genesesi 3:15. Kulijiganya maloŵe gakulochesyaga mpaka kutukamuchisye kuti tumkulupilileje mnope Yehofa soni kuti tukakayichilaga kuti yosope yaŵasasile yichitendekwa.
b Alole kabuku kakuti, Kabuku Kakamuchisya Pakulijiganya Maloŵe ga Mlungu pamtwe wakuti “Utenga wa M’Baibulo.”
c Alole libokosi lyakuti “Yindu Yakusayikolanga pa Genesesi 3:14, 15.”
d Alole libokosi lyakuti “Kukwanilichikwa kwa Yine mwa Yakutendekwa ya pa Genesesi 3:15.”