Yiwusyo Yakutyochela Kwa Ŵakuŵalanga

Ana ŵa Mboni sya Yehofa akusosekwa kugawona chamtuli mawebusayiti gakamulichisya masengo pakusaka kupata mundu jwakulombana najo?

Yehofa akusasaka kuti ŵandu ŵalombane asangalaleje soni aŵeje paunasi wambone ni Mlungu. (Mat. 19:4-6) Naga akusaka kulombela, ana mpaka atende yamtuli kuti apate mjawo jwambone? Ligongo lyakuti Yehofa ni juŵatupanganyisye, jwalakwe akusamanyilila yakusosekwa kutenda mundu kuti chakole liŵasa lyambone soni lyakusangalala. Myoyo naga akukamulichisya masengo mfundo sya Yehofa chachiŵa ŵakusangalala. Kwende tukambilane mfundo sine siŵapeleche Yehofa.

Chandanda tukusosekwa kwitichisya maloŵe gakuti, “Mtima wa mundu uli chindu chakunyenga mnope kupunda yindu yosope; kusakala kwakwe kuli kwangapikana mtela kula.” (Yel. 17:9) Ŵandu ŵaŵili ŵakusaka kulombana pasimene nikutanda kuwuchisyana chitomelo, nganisyo syakunonyelana mpaka sitande kukula mwachitema. Sonitu ndaŵi jeleji yikusaŵa yakusawusya kuti atende yindu mwalunda. Jemanjaji naga ali alombene ligongo lyakuti agambile kunonyelana, yakuyichisya yakwe akusasimana ni yakusawusya. (Mis. 28:26) Ni ligongo lyakwe nganiluŵa lunda kuti ŵandu ŵaŵili ŵagambile kusimana kwene ayichile kukambilana ngani sya chinonyelo syasili mumtima mwawo. Kapena kutanda kusalilana yindu yakusaka kutenda kusogolo mkanaŵe kumanyigana chenene.

Pa Misyungu 22:3 pakusati, “Mundu jwakalamuka pati achiweni chindu chakogoya akusajuŵaga, nambo mundu jwakuloŵela akusagamba kupelenganya ni kutanda kuligamba panyuma pakwe pati asimene ni yisawusyo.” Ana pana kogoya kwamtuli kukamulichisya masengo mawebusayiti gakusosela mundu jakulombana najo? Chakutesya chanasa chili chakuti ŵane alijiganyisye mwakupweteka ligongo lyakwamba kujigalika nganisyo ni ŵandu ŵangakwamanyilila ŵagambile kusimana nawo pawebusayiti. Ŵandu ŵane ŵangakulupichika aŵele ali mkukamulichisya masengo makaunti gaunami pakusaka kwajiŵila mbiya ŵandu ŵakuloŵela. Ndaŵi sine ŵandu ŵachinyengo ŵeleŵa akusalambuchisya kuti ali ŵa Mboni sya Yehofa.

Aganichisyesoni ya chakusawusya chine achi. Mawebusayiti gane gakusosela mundu jwakuti alombane najo gakusatenda yindu mwamasamu pakusaka kumanyilila ŵandu ŵampaka aŵajilane kulombana. Pakutenda chakusagula chakusosekwa mnope chakuti chakole liŵasa lyambone, ana mpaka luŵe lunda kukulupilila pologalamu ja pa kompyuta jakutenda kupanganya mundu? Ana mapologalamu ga pakompyuta mpaka gaŵe gakudalilichika mnope pakulandanya ni mfundo sya m’Baibulo?—Mis. 1:7; 3:5-7.

Mfundo ja m’Baibulo jajili pa Misyungu 14:15 jikusati, “Mundu jwakuloŵela akusakulupilila chilichose, nambo mundu jwakalamuka akusalolechesya mwakwendela.” Pakuganichisya ya mundu jwakuti alombane najo chandanda akusosekwa kummanyilila chenene. Nambo kuwonegana pamalo gakunguluchila mpaka yiŵe yakusawusya kutenda yeleyi. Atamose yiŵe kuti akutumichisyana yiwulili soni mautenga, ana yeleyi mpaka yilosye kuti akummanyilila chenene mundujo? Ŵandu ŵane ŵaŵaganisyaga kuti apatile mundu jwakulombana najo ŵakuŵele paŵawonegene pameso ni meso ni mundujo.

Jwamasalimo jwasasile kuti, “Ngangutama nawo pampepe ŵandu ŵaunami kapena kulongana nawo ŵandu ŵaulamba.” (Sal. 26:4) Ŵandu ŵajinji akusayiwona kuti pangali chakusawusya kulambusya pa mawebusayiti gakusosela ŵandu ŵakuti alombane nawo. Akusatenda yeleyi ni chakulinga chakuti awonecheje kuti ali mundu jwambone. Ŵane mpaka alambusyeje kuti ali ŵa Mboni sya Yehofa. Nambo ana yisyene kuti jemanjajo ali ŵabatisidwe? Ana ali ŵakomangale mwausimu? Ana ali pa unasi wambone ni Yehofa? Ana akwete mbili jambone kumpingo kwawo? Kapena ali “ŵayitendo yakusakala”? (1 Akoli. 15:33; 2 Tim. 2:20, 21) Ana jemanjajo ali ŵagopoka kulombelasoni mwa Malemba? Akusosekwa kumanyilila kwanga kwa yiwusyoyi, nambo mpaka yiŵe yakusawusya kupata kwanga kwa yiwusyoyi naga nganawusya kwa ŵa Mboni sya Yehofa ŵane ŵakummanyilila chenene mundujo. (Mis. 15:22) Jwakutumichila jwa Yehofa jwakulupichika nganaŵa aganisisye yakukamulana ni ŵandu ŵangakulupichika.—2 Akoli. 6:14; 1 Akoli. 7:39.

Pana yakusawusya yejinji yampaka yipagwe ligongo lyakamulichisya masengo mawebusayiti gakusosela mundu jwakulombana najo. Nambope pana matala gambone gampaka akamulichisye masengo pakusaka mundu jwakuti alombane najo soni kuti chakole ulombela wakuchimbichikwa. Ana ni kwapi kwampaka apate mundu jwambone jwampaka alombane najo? Ŵamboni sya Yehofa akusakola upile wakwamanyilila chenene ŵandu ŵane pali pamisongano jampingo soni misongano jekulungwakulungwa kapenasoni malo galigose gasimene pampepe.

Naga yili yangakomboleka kusongana pampepe mpela ndaŵi ja mlili wa kolonafayilasi, tukusakamulichisya masengo yipangiso yamakono pakutendela misongano ja mpingo. Pandaŵi jeleji yikusaŵa yangasawusya kwamanyilila chenene abale ni alongo ŵanganaŵe kulombela. Mpaka aloleje mwakutendela yindu pali pamisongano mpela pakuŵecheta ngani soni kupeleka ndemanga. (1 Tim. 6:11, 12) Nambosoni mpaka apate ndaŵi jakuti akungulucheje panyuma pamisongano. Pakukunguluka ni abale ni alongo pakamulichisya masengo yipangiso yamakono mpaka aloleje mwakutendela yindu mundu jwakumsakajo pali ni achimjakwe. Yeleyi mpaka yakamuchisye kummanyilila chenene mundujo. (1 Pet. 3:4) Pandaŵi jakutanda kummanyilila chenene mpaka alolesoni naga akwete yakulinga yakulandana nambosoni naga akuŵajilana kulombana.

Ŵandu ŵanganaŵa peŵasa pakusaka mundu jwakulombana najo pakamulichisya masengo matala gagali gakamulana ni mfundo sya m’Baibulo, akusakola liŵasa lyakusangalala. Yeleyi yikukamulana ni lilemba lya Misyungu 18:22, lyalikusati, “Mundu jwapatile ŵakongwe [kapena jwamlume] apatile chindu chambone soni AMBUJE amsalalile mtima jwalakwejo.”