“Apano Natandite Kunonyela Kulalichila”

NGANISANGALALAGA

Chakutesya chanasa chaliji chakuti, panakwete yaka 13 unasi wangu ni Mlungu nganiwujendaga chenene. Achimjangu ŵa kusukulu, ŵawonekaga kuti akwete ufulu wejinji. Mwamti une naliwonaga kuti ngusigalila. Malamusi gaŵambaga achinangolo ŵangu nambosoni mfundo sya Chiklistu nayiwonaga kuŵa yakusawusya kuyikuya. Kupwatika pelepa, kutenda yausimu nakuwonaga kuti gali masengo gakupesya. Atamose kuti nganingayichilaga yakuti Yehofa apali, nambo nganinalipikanaga kuti naliji najo paunasi.

Nambope nganingamba kwichila kuleka kulalichila. Nalalichilaga panandipanandi ni chakulinga chakuti mbate chakumpa Yehofa. Pambite kukulalichila, nalagaga kuti mbechetane ni mundu ligongo lyakuti nganingosechelaga. Nganingola maulendo gakuwilisya kapena majiganyo ga Baibulo. Yeleyi yandendekasyaga kuti nganonyelaga kulalichila. Mwamti naliwusyaga kuti, ‘Ana mundu mpaka akombole chamtuli kutenda yeleyi wiki jilijose kapena mwesi uliwose?’

Panayiche yaka 17, nasakaga kuti nalitendeleje yindu pajika. Myoyo, nanyakwile tukatundu twangu ni kwawulaga ku Australia. Achinangolo ŵangu ŵadandawile mnope paŵambweni ndili mkutyoka pamlangopa. Jemanjaji ŵadandawulaga, nambope mumtima mwawo ŵaganisyaga kuti chingapitilisye kumtumichila Yehofa.

Panayiche ku Australia, ni panatandite mnope ngayinonyela yindu yausimu. Najombaga mnope kumisongano. Natandite kukamulana mnope ni asikana achimjangu ŵaŵakwete nganisyo syakulandana ni sya une. Jemanjaji ŵasimanikwaga ndaŵi sine pa misongano, nambo ndaŵi syejinji ŵajawulaga kukumwa ukana nambosoni kukuŵina mmabala. Panguganichisya ya munyuma, ngusayiwona kuti naliji jwagaŵikangana. Ligongo natendaga yindu yausimu kwineku ndili mkutenda yakuchilamboku. Mwamti nganingamula chindu chimpepe.

KUCHENGA KWANGAKUJEMBECHEYA KWAKWALIJI KWAMBONE MNOPE

Pali papite yaka yiŵili nasimene ni mlongo jwine, jwele mwangamanyilila ŵangamuchisye kuti njenje umi wangu. Pa ndaŵiji twatamaga asikana msano mnyumba jimpepe. Kaneko twamŵilasile jwakulolela dela yimpepe ni ŵamkwakwe lina lyakwe Tamara kuti ayichile kunyumba jetu. Pandaŵi jele jwakulolela delaju jwasamalilaga yindu yine ya kumpingo, Tamara jwakungulukaga ni m’weji. Yeleyi yasangalasyaga kwabasi. Tamara jwaliji jwakulinandiya soni jwangasawusya kukunguluka najo. Yeleyi yasimonjesyaga mwamti naliwusyaga kuti ana mundu jwausimu jwakusekagasoni chamti yeleyi.

Tamara jwaliji jwakulimbikasya mnope, soni yakutenda yakwe yalosyaga kuti akusawunonyela mnope usyesyene nambosoni utumiki. jwalakwe jwaliji jwakusangalala ligongo lyakuti ŵampaga Yehofa yindu yejinji. Pele une nganisangalalaga ligongo lyakuti nganindendaga yejinji mu utumiki. Mwajwatendelaga yindu mlongoju, nambosoni yaŵatiga pakusangalala yangamuchisye mnope. Chisyasyo chakwe changamuchisye kuganichisya ya usyesyene wakuti, Yehofa akusasakaga kuti wosopewe tumtumichileje jwalakwe “mwakusangalala” nambosoni ‘tuli mkwimba mwakusengwa.’—Sal. 100:2.

NATANDILESONI KUNONYELA KULALICHILA

Nasakaga kuti mbeje jwakusangalala mpela Tamara. Nambo kuti sangalaleje, nasosekwaga kuchenga yindu yine paumi wangu. Pajigele ndaŵi jelewu, nambope yatandite kuchenga panandipanandi. Natandite kosechela pangwawula kukulalichila soni natendaga upayiniya wakamuchisya. Yeleyi yangamuchisye kuti woga wanakwete umale soni kuti ngalikayichilaga. Panakamulichisyaga mnope masengo Baibulo pakulalichila, ni panatandite kusangalala mnope ni utumiki. Kaneko natandite kulembesya upayiniya wakamuchisya mwesi wuliwose.

Natandite kukunguluka ni achimjangu ŵamisingu jakulekanganalekangana. Jemanjaji ŵatendaga chenene mu usyesyene soni ŵamtumichilaga Yehofa mwakulipeleka. Chisyasyo chawo chambone, changamuchisye kuti mbicheje yindu yakusosekwa mnope pamalo gandanda soni kuti ndande kuŵalanga Baibulo lisiku lililyose. Masengo gakulalichila gatandite kusangalasya mnope. Mwamti kaneko natandite upayiniya wakutamilichika. Panagambile kutanda upayiniyawu, naliji jwakusangalala mnope soni nanonyelaga kusimanikwa pa misongano.

NAPATILE MJANGU JUSYESYENE JWAKUTENDA NAJO UPAYINIYA

Pali pamasile chaka nasimene ni Alex juŵamnonyelaga mnope Yehofa soni masengo gakulalichila. Jwalakwe jwatumichilaga mpela jwakutumichila jwakamuchisya soni jwatesile upayiniya kwa yaka 6. Alex pakwete patumichile ku Malawi kwa miyesi 8 kudela kwaŵasosekwaga ŵakulalichila ŵajinji. Pajwaliji ku Malawi, jwalakwe jwatamaga ni amishonale. Jemanjaji ŵamlimbikasisye soni ŵamsalile kuti apitilisye kuŵika yindu ya Uchimwene pamalo gandanda.

Une ni Alex twalombene mu 2003, soni apano tukupitilisya kutenda utumiki wandaŵi syosope. Tulijiganyisye yindu yejinji, soni Yehofa atupele upile mmatala gakulekanganalekangana.

TUPATILE UPILE WEJINJI

Mu 2009 ŵatusalile kuti tukatumichileje mpela amishonale pachilumba cha Timor-Leste mchilambo cha Indonesia. Twasangalele mnope patwapikene ngani jeleji, nambo twakwete kawoga panandi. Pali pamasile miyesi msano twakopochele mtawuni jekulungwa ja mchilambochi. Tawuniji jikusakolanjidwa kuti Dili.

Mchilambochi umi waliji wakulekangana mnope ni kwatwatyochele. Myoyo twasosekwaga kusyoŵelela ndamo, chiŵecheto, yakulya nambosoni nyengo sya kumaloko. Patukulalichila twawonaga ŵandu ŵakulaga, ŵangalijiganya soni ŵandu ŵaŵalagaga nganisyo. Twawonagasoni ŵandu ŵajinji ŵaŵakwete maŵasi ligongo lya ngondo soni ya chiwawa.a

Kulalichila kwaliji kwakusangalasya. Mwachisyasyo, nasimene ni kamsikana kane ka yaka 13. Pandaŵiji mamagwe soni babagwe kamsikanaka ŵaliji ali ajasiche. Babagweŵa ŵajasiche jwalakwe mkanaŵe kupagwa. Kamsikanaka nganikakola mundu jwakumkamuchisya mpela mwayikusaŵela ni ŵanache wosope. Ngukumbuchila ndaŵi jine paŵasalilaga mwakapikanilaga kalisile. Ligongo lyakuti nganimbikanaga chenene chiŵecheto chakwechi nganinayipikanichisya yaŵaŵechetaga. Napopesile kwa Yehofa kuti angamuchisye kuti ngombole kumlimbikasya. Kaneko natandite kum’ŵalanjila malemba ga kumlimbikasya. Pali papitile yaka natandite kuyiwona kuti usyesyene utandite kumkamuchisya msikana jula, mwati jwayikene pakuchenga mwaŵawonechelaga soni kaganisye kakwe. Apano kamsikanaka kabatisidwe soni akusatendesya majiganyo ga Baibulo. Jwalakwe ali mliŵasa lyekulungwa lya usimu soni akusalipikana kuti akusanonyeledwa.

Yehofa ajaliwe masengo gakulalichila ku Timor-Leste. Atamose kuti ŵakulalichila ŵane abatisidwe yaka 10 yipiteyo, nambope ŵajinji akutumichila mpela apayiniya, ŵakutumichila ŵakamuchisya soni achakulungwa ŵa mumpingo. Nambo ŵane akukamula masengo gakugopolela mabuku m’yiŵecheto yawo. Ngusasangalala mnope pangwapikana jemanjaji ali mkwimba nyimbo pamisongano, kulola ngope syawo syakusangalala soni ali paunasi wambone ni Yehofa.

NGANINJEMBECHEYAGA KUTI MPAKA MBE JWAKUSANGALALA MYIYI

Umi wa ku Timor-Leste waliji wakulekangana mnope ni ku Australia. Nambo twasangalele mnope kutama kumalo kweleku. Ndaŵi sine twakwelaga minibasi jajagumbalaga mnope ŵandu. Kupwatika pelepa, m’minibasimo mwaŵaga madengu ga somba nambosoni ga liponda pakwawula kumsika. Masiku gane twatendesyaga majiganyo ga Baibulo m’tunyumba twamwanamwana twachitukuta mnope nambosoni mwaŵaga mweŵilile ni ndotosi sya nguku. Atamose kuti nasimanaga ni yosopeyi, nambope mumtima nayiwonaga kuti welewu ni umiwo.

Panguganichisya ya munyuma ngusinayamichila achinangolo ŵangu ligongo lyakuti ŵatesile yampaka akombole pakunjiganya ndamo sya Yehofa soni kungamuchisya atamose pandaŵi jele nganinamtumichilaga Yehofa mwakwanila. Payindu yasimene nayo paumi, nayiweni kuti yalikusaŵecheta lilemba lya Misyungu 22:6 yili yisyesyene. Achinangolo ŵangu akusatunyadilaga mnope soni akusangalalaga pakutuwona tuli mkumtumichila Yehofa. Kutandila mu 2016, une ni ŵamkwangu tuŵele tuli mkukamula masengo ga kulolela dela ja nyambi ja ku Australasia.

Ngusayiwona mpela yaunami kuti pandaŵi jine naganisyaga kuti nganimba ngombwele kukamula masengo ga kulalichila. Nambo apano ngusaganonyela mnope masengoga. Sambano manyilile kuti, mwangasamala kandu ya yakusawusya ya paumi, kusangalala kusyesyene kukusayika ligongo lya kumtumichila Yehofa ni mtima wosope. Une ni Alex tukwanisye yaka 18 tuli mkumtumichila Yehofa yimpepe. Ndaŵi jeleji ni jajili jakusangalasya mnope pa umi wangu. Sambano ngusagawona maloŵe gajwalembile jwamasalimo Daudi kuti gali gasyene, maloŵega gakusati, “asangalaleje wosope ŵakutilila kwa ŵalakwe kuti apakombole ndaŵi syosope kwimba mwa lukondwa.  . . soni wosope ŵakwanonyela ŵalakwe aŵe ŵakondwa mwa ŵalakwe.”—Sal. 5:11.