Ana Kupopela Mpaka Kutukamuchisye Chamtuli?

Pamela paŵalwalaga ulwele wa kansa ŵapite kuchipatala kuti apate chikamuchisyo. Nambope jwalakwe jwapopesilesoni kwa Mlungu kuti amkamuchisye kupilila ulwele wakwe. Ana lipopelo lyamkamuchisye?

Jwalakwe jwatite, “Pandaŵi janapochelaga chikamuchisyo natendaga woga. Nambo pambopesile nakolaga mtendele soni naganisyaga chenene. Apano ngusalagape ni ululu, nambope lipopelo likusangamuchisya kuti nayiwoneje yindu mwakuŵajilwa. Ŵandu pakungomasya ngusajanga kuti, “Nganimba chenene nambo ngusangalala.”

Ngaŵa kuti tupopeleje patulwasilepe basi, nambo jwalijose mpaka aŵende chikamuchisyo kwa Mlungu, pandaŵi jilijose jasimene ni yakusawusya kanga ya mwana kapena yekulungwa. Ana lipopelo mpaka litukamuchisye?

Baibulo jikusasala kuti, “Mwatulile Ambuje msigo wa yakudandawula yenu, ni jwalakwe tachimchenjela, ngasakunda kose kuti mundu jwawo jwagoloka, atenganyiche.” (Salimo 55:22) Maloŵe gelega gali gakulimbikasya. Nambo ana lipopelo mpaka lyakamuchisye chamtuli wawojo? Pakupopela kwa Mlungu mwakuŵajilwa, chachapa yakusaka kuti akombole kumasya yakusawusya yawo.—Alole libokosi lyakuti, “Ana Kupopela Mpaka Kwakamuchisye Chamtuli?”

Ana Kupopela Mpaka Kwakamuchisye Chamtuli?

Kola mtendele wamumtima

“Mkadandaula ni kandu kane kalikose, nambo pa ndaŵi jimkupopela mumŵendeje Mlungu yindu yayikumsoŵa, nipo ndaŵi syosope myiŵendeje yindu yeleyi ni mitima jakutogolela. Mtendele wa Mlungu, wele uli wakupunda umanyilisi wosope wa ŵandu, tiwuchisunga chenene mitima jenu ni nganisyo syenu kupitila mukulumbikana kwenu ni Klistu Yesu.” (Afilipi 4:6, 7) Patukumsalila Mlungu yakusawusya yetu yosope, jwalakwe mpaka atukamuchisye kuti tukole mtendele wamumtima soni kuti tutendeje yindu mwalunda.

Kola Lunda Lwakutyochela kwa Mlungu

“Naga jwine jwa jemanja jwangali lunda amŵende Mlungu, jwakusapeleka kwa mundu jwalijose mwaumbone mtima wakwe, soni mwangamnyosya.” (Yakobo 1:5) Ndaŵi syejinji patulagasiche nganisyo mpaka yiŵe yakusawusya kusagula yindu chenene. Naga tukuŵenda lunda kwa Mlungu kupitila m’lipopelo, jwalakwe mpaka atukumbusye fundo syejinji syatwalijiganyisye m’Baibulo.

Kola machili soni kutulimbikasya

‘Ngukomboleka kutenda yosope yene ligongo Klistu akusandendekasya kuti mbeje jwakulimbangana pa yiliyose yangusimana nayo.’ (Afilipi 4:13) Ligongo lyakuti Yehofa ali Mlungu jwamachili gosope, jwalakwe mpaka atupe machili gakutukamuchisya kulimbana ni yakusawusya yetu yosope kapena kuti tupilile patukulinjidwa. (Yesaya 40:29) Baibulo jikusamkolangasoni Yehofa kuti, “Mlungu jwakusatulimbikasya mitima mnope.” Jwalakwe mpaka atulimbikasye “myisawusyo yetu yosope.”—2 Akolinto 1:3, 4.