Yiwusyo Yakutyochela Kwa Ŵakuŵalanga

Ana maloŵe ga Paulo ga pa 1 Akolinto 15:29 gakusagopolela kuti Aklistu ŵane ŵa mundaŵi jakwe ŵabatisidwaga mmalo mwa ŵandu ŵawe?

Iyayi, pangali palipose m’Baibulo kapena m’mabuku ga mbili jakala papakusalosya kuti yeleyi yatendekwaga.

Yaŵatesile pakugopolela lilembali m’Mabaibulo gane, yitendekasisye ŵandu kuganisya kuti Aklistu ŵane mu ndaŵi ja Paulo ŵabatisidwaga mmalo mwa ŵandu ŵawe. Mwachisyasyo, Baibulo jine jikusati, “Naga ŵawe ngasajimukasoni ku ŵawe, ana ligongo chichi ŵandu akusabatisidwa mmalo mwa jemanjajo?”—Buku Jeswela

Nambope alole yaŵaŵechete ŵandu ŵane ŵakumanyilila mnope ya Baibulo. Mwachisyasyo, Dr. Gregory Lockwood jwasasile kuti, “Pangali umboni wuliwose m’Baibulo kapena m’mabuku ga mbili jakala wawukusalosya kuti ŵandu ŵabatisidwaga mmalo mwa mundu juŵawile.” Nombe najo Professor Gordon D. Fee, jwalembile kuti, “Pangali umboni wuliwose m’Baibulo kapena m’mabuku ga mu mbili jakala wawukusalosya kuti ubatiso welewu watendekwaga.” Jwalakwe jwasasilesoni kuti, “Ubatisowu ngakusawukolangaga m’malemba ga Malangano Gasambano. Soni pangali umboni wakulosya kuti Aklistu ŵa m’yaka 100 yandanda ŵatendaga ubatiso welewu. Atamose machalichi gagapali panyuma pa chiwa cha ŵandumetume nganigatendaga ubatisowu.”

Baibulo jikusasala kuti ŵakulijiganya ŵa Yesu akusasosekwa ‘kwajiganya ŵandu ŵa ngosyo syosope, kwabatisya . . . , ni kwajiganya yindu yosope’ yele Yesu ŵalamwile. (Mat. 28:19, 20) Mundu mkanabatisidwe ni kuŵa jwakulijiganya jwa Yesu, jwasosekwaga kulijiganya, kulupilila soni kumpikanila Yehofa ni Mwanache jwakwe. Myoyo yaliji yangakomboleka kuti mundu juŵawile soni jwali m’malembe atende yeleyi kapena Mklistu jwine jwali chijumi amtendele yeleyi.—Jwak. 9:5, 10; Yoh. 4:1; 1 Akoli. 1:14-16.

Sambano ana Paulo pelepa jwagopolelaga chichi?

Ŵandu ŵane ku Kolinto ŵakanaga yakuti ŵawe chachijimuka. (1 Akoli. 15:12) Nambo Paulo jwakamuchisye jemanjaji. Jwalakwe jwasasile kuti ‘jwajendaga ni chiwa lisiku ni lisiku.’ Nambopetu jwalakwe jwaliji chiŵela umi. Atamose kuti jwasimanaga ni yakogoya, Paulo jwakulupililaga kuti naga akuwa chachijimuka ni kwawula kwinani mpela mwayaŵelele ni Yesu.—1 Akoli. 15:30-32, 42-44.

Aklistu ŵa ku Kolinto ŵasosekwaga kumanyilila kuti mkanapochele mbote jawo kwinani mpela ŵasagulwe, ŵasosekwaga kusimana kaje ni yakusawusya soni kuwa. Ŵasosekwagasoni kumanyilila kuti pakuŵa “ŵaŵele pampepe ni Klistu Yesu pakubatisidwa” yikusagopolelasoni kuti ‘chachiŵa pampepe ni jwalakwe pa chiwa chakwe.’ (Alo. 6:3) Yeleyi yikugopolela kuti ŵasosekwaga kusimana ni yakulingwa soni kuwa mkanajimuche ni kwawula kwinani mpela muŵatendele Yesu.

Pali papitile yaka yiŵili Yesu ali abatisidwe, jwalakwe ŵasalile ŵandumetume ŵakwe kuti, “ubatiso wele unguja kupochela, jemanja nomwe timkapochele nawo.” (Maliko 10:38, 39) Pelepa Yesu nganasalaga yakuti chachibatisidwasoni m’mesi. Jwalakwe jwagopolelaga kuti panyuma pakuti aŵele jwakulupichika, chachiwa kuti akapochele mbote jakwe. Paulo jwalembilesoni kuti ŵasagulwe “tachiyiwona yakusawusya pamo ni Klistu kuti apochelesoni [uchimbichimbi] pamo ni jwalakwejo.” (Alo. 8:16, 17; 2 Akoli. 4:17) Myoyo jemanjanjisoni ŵasosekwaga kuwa kuti chajimuche ni kwawula kwinani.

Mwakamulana ni yeleyi, kagopolele kakuŵajilwa ka maloŵe ga Pauloga mpaka kaŵe kakuti, “Ana ŵandu ŵakubatisidwa kuti aŵe ŵawe chachitenda uli? Nambi naga ŵawe ngasajimuka, ligongo chichi jemanjajo akubatisidwa kuti aŵe ŵawe?”