Yayikusatendekwa Pakwakamuchisya Abale Pasitendekwe Ngosi

Masiku agano ngosi sya chilengedwe nganisiŵa syakusoŵa. Patukwakamuchisya ŵandu ŵasimene ni ngosi tukusasosekwa kutenda yindu mwadongosolo soni mwachitema. Kuti yeleyi yikomboleche Likuga lya Kulongolela lyatamilikasisye mu nyambi jilijose Dipatimenti Jakamuchisya Pasitendekwe Ngosi.

Abale ŵa mu dipatimentiji papikene kuti kwinakwakwe kutendekwe ngosi, ndaŵi jijojo akusiŵajimbila achakulungwa ŵa mumpingo ŵa ku delajo kuti amanyilile mwayiŵelele yindu kwa abale ni alongo. Naga yindu yayijonasiche yili yakuti mpingo nganiwuŵa ukombwele kukamuchisya, ofesi ja nyambi jikusasagula abale ŵakuŵajilwa kuti akalongolele masengo gakwakamuchisya abalewo. Jemanjaji mpaka aŵende ŵakulalichila ŵakulipeleka kuti akakamuchisye nawo kapena mpaka ŵaŵende abale ni alongo kuti apeleche yindu yayikusosechela kapenasoni mpaka akasume yinduyo ni kwapa ŵandu ŵakwayidwe ni ngosijo.

Kutenda yindu chamti myiyi kuli kwakamuchisya. Kukusanandiya masengo, ungapikangana, soni yikusakamuchisya kuti tukajonanga mbiya soni yindu yejinji. Yeleyi nganiyiŵa yikomboleche yikaŵe kuti abale ni alongo agamba kutenda yindu mwakamulana ni mwakuyiwonela jemanjajo.

Abale ŵasagulidwe ni ofesi ja nyambi akusamanyilila mbiya syasikusosekwa soni winji ŵa ŵandu ŵakusosekwa kuti akakamuchisye. Jemanjaji mpaka aŵechetane ni achakulungwa ŵa boma, ŵele ndaŵi syejinji akusatukamuchisya kuti masengo gakwakamuchisya ŵandu gatendekwe mwachitema. Myoyo ngakusosekwa kulokotela mbiya, kutumisya yindu, kapena kwawula kumalo kwajitendekwe ngosi mkanasalilidwe kutenda yeleyo.

Nambope ligongo lyakuti tukusitwanonyela Aklistu achimjetu tukusasaka kwakamuchisya pajitendekwe ngosi. (Aheb 13:16) Ana mpaka tutende chamtuli yeleyi? Chindu chakusosekwa mnope champaka tutende chili kwapopelela Aklistu ŵasimene ni ngosijo soni ŵandu ŵakwakamuchisya. Nambosoni mpaka tupelecheje mbiya syakamuchisya pamasengo gapachilambo chosope. Mwakulongoleledwa ni Likuga lya Kulongolela, ofesi ja nyambi mpaka jimanyilile yampaka atende kuti mbiyasi syakamuchisye mnope abale ni alongo. Naga akusaka kuti chajawule kudela jajitendekwe ngosi kuti akakamuchisye, mpaka alembe Fomu ya Wofuna Kutumikira Mongodzipereka M’dipatimenti Yoona za Mapulani ndi Zomangamanga (DC-50).

ALOLELE FIDIYO JAKUTI KUSEFUCHILA KWA MESI KU BRAZIL, KANEKO AKAMBILANE CHIWUSYO ACHI:

Ana ni chichi chachikwasangalasya mnope payaŵatesile ŵa Mboni sya Yehofa pakwakamuchisya ŵandu ŵaŵasimene ni ngosi ja kusefuchila kwa mesi ku Brazil mu 2020?